ચક્રવાત દિત્વાથી દક્ષિણ ભારતના રાજ્યોમાં ફ્લાઈટ સેવાને અસર, એર ઇન્ડિયાએ એડવાઈઝરી જાહેર કરી

નવી દિલ્હી : શ્રીલંકામાં તબાહી મચાવ્યા બાદ ચક્રવાત દિત્વા ભારતના ચાર રાજ્ય તરફ આગળ વધી રહ્યું છે. જેમાં દક્ષિણ ભારતના ઘણા રાજ્યોમાં ભારે વરસાદ પડી શકે છે. હવામાન વિભાગે શનિવાર અને રવિવારે તમિલનાડુ અને પુડુચેરી માટે ભારે વરસાદ માટે રેડ એલર્ટ જાહેર કર્યું છે. ચક્રવાત ફ્લાઇટ સેવાઓને પણ અસર કરી શકે છે.

એર ઇન્ડિયાએ તેના મુસાફરો માટે એક એડવાઈઝરી જાહેર કરી છે. એર ઇન્ડિયાએ ટ્વિટ કર્યું છે કે ચક્રવાત દિત્વાને કારણે ભારે વરસાદ અને પવનના કારણે ચેન્નાઈ અને દક્ષિણ ભારતના કેટલાક અન્ય શહેરોમાં જતી ફ્લાઇટ્સ પ્રભાવિત થઈ શકે છે.

આપણ વાચો: શ્રીલંકામાં ભારે તબાહી બાદ ચક્રવાત દિત્વા ભારતના ચાર રાજ્ય પર ત્રાટકશે, તંત્ર એલર્ટ મોડમાં

એર ઇન્ડિયાએ ફ્લાઇટની સ્થિતિ તપાસવાની સલાહ આપી

જેમાં એર ઇન્ડિયાએ મુસાફરોને એરપોર્ટ પર જતા પહેલા તેમની ફ્લાઇટની સ્થિતિ તપાસવાની સલાહ આપી છે. મુસાફરો ઓનલાઈન તપાસ કરી શકે છે અથવા સહાય માટે એર ઇન્ડિયાના કોલ સેન્ટરનો સંપર્ક કરી શકે છે.

જોકે, એરલાઇને હજુ સુધી ફ્લાઇટ રદ થવા અંગે કોઈ માહિતી આપી નથી, પરંતુ મુસાફરોને ચક્રવાત નજીક આવતાની સાથે અપડેટ્સ પર નજીકથી નજર રાખવા કહેવામાં આવ્યું છે.

આપણ વાચો: શ્રીલંકામાં ચક્રવાત “દિત્વા” થી 46 લોકોના મોત, પીએમ મોદીએ મદદની જાહેરાત કરી

ઇન્ડિગો એરલાઈન્સે પણ મુસાફરો માટે એડવાઈઝરી જાહેર કરી

આ દરમિયાન, ઇન્ડિગો એરલાઈન્સે પણ મુસાફરોને ચેતવણી આપતી એડવાઈઝરી જાહેર કરી છે. જેમાં ચક્રવાત દિત્વા શ્રીલંકા અને તમિલનાડુના ઘણા સ્થળોની ફ્લાઇટ્સને વિક્ષેપિત કરી શકે છે કારણ કે વાવાઝોડું પશ્ચિમ તરફ આગળ વધે છે. એરલાઇને જણાવ્યું હતું કે ચક્રવાતને કારણે વરસાદ અને પવનની દિશા હવે શ્રીલંકા અને તમિલનાડુના ભાગોને અસર કરી રહી છે. જે કોલંબો, જાફના, પુડુચેરી, થુથુકુડી, તિરુચિરાપલ્લી, ચેન્નાઈ અને મદુરાઈ જતી ફ્લાઇટ્સ પર અસર કરી શકે છે.