છત્તીસગઢના દંતેવાડામાં 37 નક્સલીઓએ આત્મસમર્પણ કર્યું, 27 પર હતા રૂપિયા 65 લાખના ઇનામ

છત્તીસગઢમાં સુરક્ષાદળો દ્વારા સતત નક્સલ વિરોધી અભિયાન ચલાવવામાં આવી રહ્યું છે. જેમાં આજે દંતેવાડામાં 12 મહિલાઓ સહિત 37 નક્સલીઓએ સુરક્ષા દળો સમક્ષ આત્મસમર્પણ કર્યું છે. પોલીસના જણાવ્યા અનુસાર તેમાંથી 27 નકસલીઓ પર 65 લાખ રૂપિયાના ઇનામ હતા. તેમજ 26 જવાનોની શહીદી માટે જવાબદાર એવા ભીમાએ પણ આત્મસમર્પણ કર્યું છે. આ નક્સલીઓએ દંતેવાડામાં ડીઆરજી ઓફિસમાં વરિષ્ઠ પોલીસ અધિકારીઓની હાજરીમાં આત્મસમર્પણ કર્યું હતું.

20 મહિનામાં 508 નક્સલીઓએ આત્મસમર્પણ કર્યું

આ અંગે દંતેવાડા એસપી ગૌરવ રાયે જણાવ્યું હતું કે, આજે કુલ 37 માઓવાદીઓએ આત્મસમર્પણ કર્યું છે. જેમાં 27 માઓવાદીઓ ઇનામ લઈને આવ્યા હતા. વર્ષ 2024 -25 માં સતત ઓપરેશન હાથ ધરવામાં આવ્યા છે. તેમજ અસંખ્ય એન્કાઉન્ટર થયા અને ઘણા આત્મસમર્પણ થયા છે. આજે છત્તીસગઢ સરકારની પુનર્વસન નીતિનો લાભ લઈને 37 માઓવાદીઓ આત્મસમર્પણ કરી ચૂક્યા છે અને પુનર્વસનથી કાયાકલ્પ અભિયાન હેઠળ મુખ્ય પ્રવાહમાં જોડાયા છે. છેલ્લા 20 મહિનામાં 508 નક્સલીઓએ આત્મસમર્પણ કર્યું છે.

નક્સલીઓને 50,000 રૂપિયાની તાત્કાલિક સહાય મળશે

જેમાં સરકારની પુનર્વસન નીતિ હેઠળ આત્મસમર્પણ કરનારા નક્સલીઓને 50,000 રૂપિયાની તાત્કાલિક સહાય મળશે. વધુમાં, કૌશલ્ય વિકાસ તાલીમ, ખેતીની જમીન અને સામાજિક પુનર્વસન જેવી સુવિધાઓ પણ સુનિશ્ચિત કરવામાં આવી રહી છે. આ પહેલ લોકોને શસ્ત્રો છોડવા માટે પ્રેરણા આપે છે એટલું જ નહીં પરંતુ જીવન માટે નવા રસ્તા પણ ખોલે છે.

આ આત્મસમર્પણમાં મહિલા નક્સલીઓ કેન્દ્રમાં રહી

જેમાં એક નક્સલવાદી ભીમા ઉર્ફે જહાઝ 2020 માં થયેલા ભયાનક મિંપા હુમલામાં સામેલ હતો. જેમાં 26 સૈનિકો શહીદ થયા હતા અને તેમના શસ્ત્રો લૂંટી લેવામાં આવ્યા હતા.આ આત્મસમર્પણમાં મહિલા નક્સલીઓ કેન્દ્રમાં રહી છે. જેમાં ક્રાંતિ ઉર્ફે પોડિયા, કુમલી ઉર્ફે અનિતા અને હુંગી ઉર્ફે રોશની જેવી મહિલા નક્સલીઓ વર્ષ 2024 ના ગોબેલ અને થુલથુલી જંગલોમાં પોલીસ-નક્સલી એન્કાઉન્ટરમાં સામેલ હતી. સુરક્ષા દળો સમક્ષ આત્મ સમર્પણ કરનારા નક્સલીઓનો ભૂતકાળમાં અનેક વિસ્ફોટો કર્યા છે.