Brij Bhushan Sharan Singh હવે ક્યારેય ચૂંટણી નહીં લડે, કહ્યું મારે ઘણું કામ કરવાનું છે
નવી દિલ્હી : કૈસરગંજથી લોકસભાના(Loksabha) સાંસદ અને ભારતીય કુસ્તી મહાસંઘના ભૂતપૂર્વ પ્રમુખ બ્રિજ ભૂષણ શરણ સિંહે(Brij Bhushan Sharan Singh) ક્યારેય ચૂંટણી નહીં લડવાની જાહેરાત કરી છે. એક અખબારને આપેલા ઈન્ટરવ્યુમાં વિવિધ રાજકીય મુદ્દાઓ પર વાત કરતી વખતે તેમણે આ જાહેરાત કરી હતી. તેમણે સ્પષ્ટ કહ્યું કે, હું મારા જીવનમાં ફરી ક્યારેય ચૂંટણી નહીં લડું. મારે ઘણું કામ કરવાનું છે. ભાજપે કુસ્તી એસોસિએશનના વિવાદને કારણે આ લોકસભા ચૂંટણીમાં તેમના પુત્ર કરણ ભૂષણને ટિકિટ આપવામાં આવી છે.
મીડિયામાં મારા નિવેદનને ખોટી રીતે રજૂ કરવામાં આવ્યું
આ ઈન્ટરવ્યુ દરમિયાન બ્રિજ ભૂષણ સિંહે ઉત્તર પ્રદેશના મુખ્યમંત્રી યોગી આદિત્યનાથ સાથેના સંબંધોને લઈને સ્પષ્ટતા કરી છે. જ્યારે તેમને યોગી આદિત્યનાથ વિશે પૂછવામાં આવ્યું તો તેમણે યુપીના સીએમને તેમના ગુરુ ભાઈ ગણાવ્યા. બ્રિજભૂષણ શરણ સિંહે કહ્યું કે અમે બંને એક જ ગુરુના શિષ્ય છીએ. અમારા ગુરુ મને યોગી કરતા ઓછો નથી માનતા અમે બંને સારા મિત્રો છીએ. મીડિયામાં મારા નિવેદનને ખોટી રીતે રજૂ કરવામાં આવ્યું.
મારા પર બાહુબલી હોવાનો આરોપ લગાવવામાં આવ્યો
બ્રિજ ભૂષણ શરણ સિંહે પણ પોતાના પુત્ર કરણ ભૂષણને ભાજપના ઉમેદવાર બનાવવાના મુદ્દે પોતાનું નિવેદન આપ્યું. તેમજ તેને ષડયંત્ર ગણાવ્યું છે. બ્રિજ ભૂષણે કહ્યું કે, હું ઈચ્છતો હતો કે કરણ ભૂષણ રેસલિંગ એસોસિએશનના પ્રમુખની ચૂંટણી લડે. તેને રોકવા માટે આ કાવતરું ઘડવામાં આવ્યું છે. છ વખત સાંસદ હોવા છતાં મંત્રી ન બનવાના સવાલ પર તેમણે કહ્યું કે મને જે સન્માન મળ્યું છે તે ભારતમાં બહુ ઓછા લોકોને મળ્યું છે. પરંતુ શરૂઆતથી જ મારા પર બાહુબલી હોવાનો આરોપ લગાવવામાં આવ્યો હતો. જેના કારણે મને નુકસાન થયું છે.
33 વર્ષની ઉંમરે પહેલીવાર સાંસદ બન્યો હતો
બ્રિજ ભૂષણ શરણ સિંહે જણાવ્યું કે, કોંગ્રેસે વર્ષ 1996માં પણ મારી વિરુદ્ધ કાવતરું ઘડ્યું હતું, કલ્પનાથ રાય સાથે મારી ધરપકડ કરવામાં આવી હતી. પછી મારી પત્નીને ચૂંટણી લડવી પડી અને તે સાંસદ બની. આ વખતે મારો પુત્ર કરણ સાંસદ બનશે. સંયોગ જુઓ હું પણ 33 વર્ષની ઉંમરે પહેલીવાર સાંસદ બન્યો હતો અને કરણ પણ 33 વર્ષનો છે.
