બેંગલુરુ : બેંગલુરુ ભાગદોડ કેસમાં કર્ણાટકના મુખ્યમંત્રી સિદ્ધારમૈયાએ મોટી કાર્યવાહી કરી છે. આ ઘટના બાદ પોલીસ ઇન્સ્પેક્ટરથી લઈને કમિશનર સ્તરના અધિકારીઓને સસ્પેન્ડ કરવામાં આવ્યા છે. બુધવારે બેંગલુરુમાં ચિન્નાસ્વામી સ્ટેડિયમની બહાર થયેલી ભાગદોડમાં 11 લોકો માર્યા ગયા હતા. આ ઉપરાંત મોટી સંખ્યામાં લોકો ઘાયલ થયા હતા. આ ઘટના પર થયેલા હોબાળા બાદ સરકારે હવે કાર્યવાહી કરી છે.
પોલીસ કમિશનરને તાત્કાલિક અસરથી સસ્પેન્ડ કરવામાં આવ્યા
બેંગલુરુમાં થયેલી ભાગદોડની ઘટનાનો ઉલ્લેખ કરતા કર્ણાટકના મુખ્યમંત્રી સિદ્ધારમૈયાએ ગુરુવારે સાંજે કહ્યું, “કબ્બન પાર્ક પોલીસ સ્ટેશનના પોલીસ ઇન્સ્પેક્ટર, સ્ટેશન હાઉસ માસ્ટર, સ્ટેશન હાઉસ સેન ડીસીપી, ક્રિકેટ સ્ટેડિયમના ઇન્ચાર્જ, વધારાના પોલીસ કમિશનર, પોલીસ કમિશનરને તાત્કાલિક અસરથી સસ્પેન્ડ કરવામાં આવ્યા છે. સિદ્ધારમૈયાએ કહ્યું કે પ્રથમ દૃષ્ટિએ આ અધિકારીઓ તરફથી બેદરકારી દેખાય છે. આ કારણોસર તેમને સસ્પેન્ડ કરવામાં આવ્યા છે.
સસ્પેન્ડ કરાયેલા પોલીસ અધિકારીઓમાં પોલીસ કમિશનર,એડિશનલ કમિશનર, ડીસીપી સેન્ટ્રલ ઝોન, એસીપી સેન્ટ્રલ ઝોન, એસીપી ઇન્ચાર્જ સ્ટેડિયમ, એસએચઓ કુબ્બન પાર્કનો સમાવેશ થાય છે.
આ પણ વાંચો: બેંગલુરુમાં આઇપીએલની જીતની ઉજવણી દરમિયાન માત્ર 1000 પોલીસ તૈનાત, અપૂરતી સુરક્ષા વ્યવસ્થાની પોલ ખૂલી
કમિશન 30 દિવસમાં આ સંદર્ભમાં રિપોર્ટ રજૂ કરશે
આ ઉપરાંત કર્ણાટકના સીએમ સિદ્ધારમૈયાએ પોલીસને રોયલ ચેલેન્જર્સ બેંગ્લોર (આરસીબી), ડીએનએ ઇવેન્ટ મેનેજમેન્ટ એજન્સી, કર્ણાટક સ્ટેટ ક્રિકેટ એસોસિએશનના પ્રતિનિધિઓની ધરપકડ કરવાનો નિર્દેશ આપ્યો છે. સીએમ સિદ્ધારમૈયાએ વધુમાં જણાવ્યું હતું કે બેંગલુરુમાં થયેલી ભાગદોડની ઘટનાની તપાસ માટે નિવૃત્ત હાઇકોર્ટના ન્યાયાધીશ માઇકલ કુન્હાની અધ્યક્ષતામાં એક સભ્યનું કમિશન બનાવવામાં આવ્યું છે. કમિશન 30 દિવસમાં આ સંદર્ભમાં રિપોર્ટ રજૂ કરશે.
સીઆઈડીને તપાસ સોંપવામાં આવી
સીએમ સિદ્ધારમૈયાએ વધુમાં કહ્યું કે મારા ધારાસભ્ય, મંત્રી, નાયબ મુખ્યમંત્રી કે મુખ્યમંત્રી તરીકેના કાર્યકાળ દરમિયાન આવું ક્યારેય બન્યું નથી. આ ઘટનાએ અમને ખૂબ જ આઘાત પહોંચાડ્યો છે. આ મામલે મેજિસ્ટ્રેટની તપાસ શરૂ કરવામાં આવી છે. આ દરમિયાન, આરસીબી, ડીએનએ ઇવેન્ટ મેનેજમેન્ટ એજન્સી અને કર્ણાટક સ્ટેટ ક્રિકેટ એસોસિએશન સામેની તપાસ હવે સીઆઈડીને સોંપવામાં આવી છે.
