વિધિની વક્રતા! એક તરફ પરિણીતીનો ગૃહ પ્રવેશ અને બીજી તરફ પતિ રાઘવને બંગલો ખાલી કરવો પડશે
નવી દિલ્હીઃ એક તરફ પરિણીતી ચોપરાનું તેના સાસરિયાના ઘરે ભવ્ય સ્વાગત કરવામાં આવ્યું છે, ત્યારે હવે સમાચાર આવ્યા છે કે AAP નેતા રાઘવ ચઢ્ઢાએ સરકારી ટાઈપ 7 બંગલો ખાલી કરવો પડશે. કોર્ટે રાઘવ ચઢ્ઢાને ટાઈપ 7 બંગલો ખાલી કરવાનો આદેશ આપ્યો છે.
દિલ્હીની પટિયાલા હાઉસ કોર્ટે AAP સાંસદ રાઘવ ચઢ્ઢાને મોટો ઝટકો આપ્યો છે. કોર્ટે રાઘવ ચઢ્ઢાને ટાઈપ-7 બંગલો ખાલી કરવાનો આદેશ આપ્યો છે. કોર્ટે રાજ્યસભા સચિવાલયની નોટિસને યોગ્ય માનીને આ આદેશ આપ્યો છે. તમને જણાવી દઈએ કે રાઘવ ચઢ્ઢાને ચોમાસુ સત્ર દરમિયાન રાજ્યસભાની કાર્યવાહીમાં ખલેલ પહોંચાડવા બદલ સસ્પેન્ડ કરવામાં આવ્યા છે.
આમ આદમી પાર્ટીના રાજ્યસભા સાંસદ રાઘવ ચઢ્ઢાને સાંસદ તરીકે લ્યુટિયન ઝોનમાં ટાઈપ 7 બંગલો ફાળવવામાં આવ્યો હતો. નિયમોની બહાર જઈને વીઆઈપી બંગલાની ફાળવણીનો મુદ્દો પાછળથી વેગ પકડ્યો હતો. આ પછી રાજ્યસભા સચિવાલયે તેમનો બંગલો રદ્દ કરી દીધો. AAP સાંસદે રાજ્યસભા સચિવાલયના આ આદેશ વિરુદ્ધ પટિયાલા હાઉસ કોર્ટમાં અરજી કરી હતી.
નિયમ મુજબ પહેલીવાર સાંસદ બનેલા જનપ્રતિનિધિઓ માટે સરકારી આવાસ ટાઈપ-V કેટેગરીમાં ફાળવવામાં આવે છે, પરંતુ રાઘવ ચઢ્ઢાને અસ્થાયી રૂપે ટાઈપ 7 બંગલો ફાળવવામાં આવ્યો હતો. ટાઇપ-VII બંગલો સામાન્ય રીતે ભૂતપૂર્વ કેન્દ્રીય પ્રધાન, રાજ્યપાલ અથવા મુખ્ય પ્રધાનને આપવામાં આવે છે. આ મુદ્દો વિવાદમાં આવ્યા બાદ સંબંધિત એજન્સી દ્વારા અસ્થાયી ધોરણે ફાળવવામાં આવેલ ટાઇપ 7 બંગલો રદ કરવામાં આવ્યો હતો.
કોર્ટના આદેશ પછી જારી કરાયેલા એક નિવેદનમાં, AAP નેતા રાઘવે ફાળવણી રદ કરવાને મનસ્વી અને અભૂતપૂર્વ ગણાવ્યું હતું અને આરોપ મૂક્યો હતો કે તે “તેમના રાજકીય ઉદ્દેશ્યો અને નિહિત હિતોને આગળ વધારવા માટે બીજેપીના કહેવા પર” કરવામાં આવ્યું હતું. તેમણે આવા આવાસોમાં રહેતા અન્ય પ્રથમ વખતના સાંસદો તરફ પણ ધ્યાન દોર્યું હતું અને કહ્યું હતું કે તેઓ “યોગ્ય કાનૂની કાર્યવાહી” કરશે.
