નવી દિલ્હીઃ લોકસભા ચૂંટણી પહેલા ભાજપે આમ આદમી પાર્ટી અને કોંગ્રેસને મોટો ઝટકો આપ્યો છે. આમ આદમી પાર્ટી અને કોંગ્રેસના ઘણા નેતાઓ ભાજપમાં જોડાઈ ગયા છે. આ તમામ નેતાઓ દિલ્હી ભાજપના પ્રમુખ વીરેન્દ્ર સચદેવા અને વિપક્ષના નેતા રામવીર સિંહ બિધુરીની હાજરીમાં ભાજપમાં જોડાયા છે.
આમ આદમી પાર્ટીના વિન્દ્યા મલ્હોત્રા ભાજપમાં જોડાયા છે. વિન્દ્યા મલ્હોત્રાએ વર્ષ 2017માં રમેશ નગરથી MCDની ચૂંટણી લડી હતી. તેઓ આમ આદમી પાર્ટીના જિલ્લા સચિવ પણ રહી ચૂક્યા છે. એક સમયે AAP નેતા રાઘવ ચડ્ડા સાથે કામ કરી ચૂકેલા આલોક સેઠ પણ ભાજપમાં જોડાઈ ગયા છે. મોહન ટાઉનમાંથી વોર્ડ પ્રમુખ મોહનકુમાર શર્મા પણ ભાજપમાં જોડાયા છે. રાજેન્દ્ર નગરથી AAPના મહાસચિવ અભિષેક સેઠી ભાજપમાં જોડાયા છે. આ સિવાય આમ આદમી પાર્ટીના સોશિયલ મીડિયા કોઓર્ડિનેટર રીટા વશિષ્ઠ પણ ભાજપમાં જોડાયા છે.
આ બધા સિવાય કોંગ્રેસના ઘણા નેતાઓ પણ ભારતીય જનતા પાર્ટીમાં જોડાયા હતા. દિલ્હીની છતરપુર વિધાનસભા બેઠક પરથી 2020માં કોંગ્રેસની ટિકિટ પર વિધાનસભા ચૂંટણી લડનાર સતીશ લોહિયા પણ ભાજપમાં જોડાઈ ગયા છે. દિલ્હી પ્રદેશ કોંગ્રેસ સમિતિના સચિવ રહી ચૂકેલા વિજય મલ્હોત્રા પણ ભાજપમાં જોડાયા છે. કોંગ્રેસના પૂર્વ પ્રવક્તા રાજીવ ગંભીર અને જીવીએસ ચૌહાણ સહિત કોંગ્રેસના ઘણા નેતાઓએ ચૂંટણી પહેલા પક્ષ બદલ્યો છે.
AAP-કોંગ્રેસના નેતાઓના BJPમાં જોડાવા પર રામવીર સિંહ બિધુરીએ કહ્યું, ‘હું છેલ્લા 15-20 દિવસથી જોઈ રહ્યો છું કે AAP અને કૉંગ્રેસના ઘણા નેતાઓ વડાપ્રધાન નરેન્દ્ર મોદીમાં વિશ્વાસ વ્યક્ત કરી રહ્યા છે. મને વિશ્વાસ છે કે દિલ્હીમાં લોકસભા ચૂંટણીમાં ભાજપને 70 ટકાથી વધુ વોટ મળશે.
