છત્તીસગઢમાં ₹6.60 કરોડની રોકડ સાથે 4 ગુજરાતીઓ ઝડપાયા, હવાલાનો કારોબાર હોવાની આશંકા

રાયપુર: છત્તીસગઢના કુમ્હારી ટોલ પ્લાઝા નજીક દુર્ગ પોલીસે શનિવારે મહારાષ્ટ્ર રજિસ્ટ્રેશનની બે સ્કોર્પિયો કારમાંથી ₹6.60 કરોડની રોકડ રકમ જપ્ત કરી હતી. છત્તીસગઢ પોલીસને રાત્રે 2 થી 3 વાગ્યાની આસપાસ ગુપ્ત બાતમી મળી હતી કે કાર મારફતે મોટી માત્રામાં રોકડની હેરફેર થવાની છે. આ બાતમીના આધારે પોલીસે કુમ્હારી ટોલ પ્લાઝા પર વોચ ગોઠવીને તમામ વાહનોની તપાસ શરૂ કરી હતી. જો કે આ દરમિયાન પોલીસ ગુજરાતના ચાર આરોપીઓની ધરપકડ કરી હતી.

ગુપ્ત બાતમીના આધારે કાર્યવાહી

મળતી વિગતો અનુસાર, પોલીસને મળેલી ગુપ્ત બાતમીના આધારે સવારે લગભગ 7:30 થી 8 વાગ્યાની આસપાસ રાયપુર તરફથી આવતી મહારાષ્ટ્ર રજિસ્ટ્રેશનની બે સ્કોર્પિયો કારને રોકવામાં આવીને તેની તપાસ કરવામાં આવી હતી, આ દરમિયાન પોલીસને બંને ગાડીઓની સીટ નીચેથી મોટી માત્રામાં રોકડ મળી આવી હતી. પહેલી ગાડીમાંથી ₹3.60 કરોડ અને બીજી ગાડીમાંથી ₹3 કરોડ મળી આવ્યા હતા.

ગુજરાતથી રાયપુર ગયા હતા આરોપીઓ

પોલીસની પ્રાથમિક તપાસમાં બહાર આવ્યું છે કે આ ચાર આરોપીઓ ગુજરાતના રહેવાસી છે. તેઓ શુક્રવારે બપોરે અથવા સાંજે ગુજરાતથી રાયપુર પહોંચ્યા હતા અને હવે આ બંને ગાડીઓ રાયપુરથી ગુજરાતના સુરત જઈ રહી હતી. પોલીસનું માનવું છે કે આ રકમ હવાલાના કાળા કારોબાર સાથે જોડાયેલી છે. પોલીસે જપ્ત કરાયેલી રકમ અંગે વધુ કાર્યવાહી માટે આવકવેરા વિભાગને જાણ કરી છે અને આ મામલે તપાસ ચાલુ છે.તપાસ દરમિયાન પોલીસે ચાર આરોપીઓની અટકાયત કરી હતી અને તેમની પૂછપરછ ચાલી રહી છે. તેમના મોબાઈલ ફોનમાંથી પણ વધુ માહિતી એકઠી કરવામાં આવી રહી છે.

આ પણ વાંચો…છત્તીસગઢમાં એક કરોડના ઇનામી નક્સલી સહિત 10 નક્સલીઓ ઠાર