થાણે – નવી મુંબઈમાં બે શંકાસ્પદ ડ્રોન દેખાયાં

મુંબઈ: થાણે અને નવી મુંબઈ વિસ્તારમાં શુક્રવારે બે ડ્રોન શંકાસ્પદ રીતે ભ્રમણ કરી રહ્યા હોવાનું એક પ્રાઇવેટ એરલાઇનના પાયલટના ધ્યાનમાં આવતા પોલીસે તપાસ શરૂ કરી હતી એવી જાણકારી એક અધિકારીએ આપી હતી. જોકે કોઈ શંકાસ્પદ બાબત ધ્યાનમાં નથી આવી એમ પણ અધિકારીએ જણાવ્યું હતું. થાણે જિલ્લાના અંબરનાથ અને બેલાપુરમાં તેમજ નવી મુંબઈમાં તળોજા નજીક આકાશમાં બે ડ્રોન ફરી રહ્યા હોવાનું ઈન્ડિગો ફ્લાઇટના પાયલટના ધ્યાનમાં આવતા તેણે એરપોર્ટ સિક્યોરિટી ઓપરેશન કંટ્રોલ સેન્ટરને જાણ કરી હતી. આ જાણકારી મુંબઈ પોલીસને પહોંચાડવામાં આવી હતી અને નવી મુંબઈ તેમજ થાણા પોલીસને સાવધ કરી દેવામાં આવ્યા હતા. (પીટીઆઈ)