29 કિમી લાંબો અને 22 સ્ટેશનો: સરકાર તરફથી પ્રોજેક્ટને લીલીઝંડી: 12000 કરોડના ખર્ચને મંજૂરી
વિપુલ વૈદ્ય
મુંબઈ: થાણે શહેરમાં ઝડપી મુસાફરી માટે રિંગ રોડની જરૂરિયાતને ધ્યાનમાં રાખીને, સરકારે થાણે રિંગ મેટ્રો પ્રોજેક્ટને મંજૂરી આપી હતી. હવે આ પ્રોજેક્ટ અંગે એક મોટી અપડેટ સામે આવી છે. લાંબી રાહ જોયા પછી લાખો થાણેકરોને થોડી રાહત મળી છે. વર્ષોથી અટકેલો થાણે રિંગ મેટ્રો પ્રોજેક્ટ હવે વાસ્તવિકતા બનવાના માર્ગે છે. આ મહત્વાકાંક્ષી પ્રોજેક્ટનું બાંધકામ નવેમ્બરમાં સત્તાવાર રીતે શરૂ થવાની અપેક્ષા છે. આ મેટ્રો પ્રોજેક્ટ મુસાફરીને ઝડપી અને વધુ અનુકૂળ બનાવશે જ, પરંતુ શહેરની સૌથી મોટી ટ્રાફિક જેમની સમસ્યામાં પણ નોંધપાત્ર ઘટાડો કરશે.
132 ઇમારતો હેઠળ મેટ્રો દોડશે
થાણેમાં રિંગ મેટ્રોનું કામ નવેમ્બરમાં શરૂ થવાનું છે. થાણે રેલવે સ્ટેશન અને ન્યુ થાણે રેલવે સ્ટેશન વચ્ચે લગભગ દોઢ કિલોમીટર સુધી મેટ્રો ભૂગર્ભમાં રહેશે. આ મેટ્રો આ વિસ્તારની 132 ઇમારતોની નીચેથી પસાર થશે. મહામેટ્રોએ થાણે મ્યુનિસિપલ કોર્પોરેશન પાસેથી આ ઇમારતોના પાયાની ઊંડાઈ વિશે માહિતી માગી છે.
આ પણ વાંચો : મુંબઈ મેટ્રો-થ્રીના સ્ટેશન પર હવે પ્રવાસીઓને મળશે મફત વાઈફાઈ, જાણો કારણ?
12,000 કરોડ રૂપિયાનો ખર્ચ
થાણે રીંગ મેટ્રો પ્રોજેક્ટ મહારાષ્ટ્ર મેટ્રો રેલ કોર્પોરેશન લિમિટેડ (મહા મેટ્રો) દ્વારા અમલમાં મૂકવામાં આવશે. 12,200 કરોડ રૂપિયાના અંદાજિત ખર્ચે બનેલી આ નવી મેટ્રો લાઇન 29 કિલોમીટર લાંબી હશે. આ મેટ્રો મુસાફરોનો સમય બચાવશે અને શહેરના મુખ્ય રસ્તાઓ પર ટ્રાફિકની ભીડ ઘટાડશે. કેન્દ્રીય મંત્રીમંડળે 2024માં આ પ્રોજેક્ટને મંજૂરી આપી દીધી હતી.
29 કિલોમીટરનો મેટ્રો રૂટ કેવો હશે?
થાણે રીંગ મેટ્રો પ્રોજેક્ટ 29 કિલોમીટર લાંબો છે. આ રીંગ મેટ્રો પ્રોજેક્ટનો 26 કિલોમીટર એલિવેટેડ અને 3 કિલોમીટર ભૂગર્ભમાં હશે. આ રૂટ પર 22 સ્ટેશન હશે. તેમાંથી બે ભૂગર્ભમાં હશે. આમાંથી એક સ્ટેશન સીધું થાણે રેલવે સ્ટેશન સાથે જોડાયેલું હશે. એક અંદાજ મુજબ આ મેટ્રો દ્વારા દરરોજ અંદાજે 7,61,000 મુસાફરો મુસાફરી કરશે.
આ પણ વાંચો : મુંબઈ મેટ્રો-3 પ્રવાસીઓ માટે ખુશખબર: હવે ટિકિટ વિન્ડોની ઝંઝટ નહીં, WhatsApp પર મળશે મેટ્રો ટિકિટ!
થાણે રિંગ મેટ્રો લાઇન પરના મુખ્ય સ્ટેશનો
રાયલા દેવી, વાગળે સર્કલ, લોકમાન્ય નગર બસ ડેપો, શિવાજીનગર, નીલકંઠ ટર્મિનલ, ગાંધીનગર, ડો. કાશીનાથ ઘાણેકર થિયેટર, માનપાડા, ડોંગરીપાડા, વિજયનગરી, વાઘબીળ, પાટલીપાડા, આઝાદ નગર, મનોરમા નગર, કોલશેત ઇન્ડસ્ટ્રીયલ એરિયા, બાલકુમ નાકા, બાલકુમ પાડા, રાબોડી, શિવાજી ચોક, થાણે જંકશન અને નવીન થાણે.
