નવા લેબર કાયદામાં મજૂરોના અધિકારો ખતમ થઈ જશે: અરવિંદ સાવંત
(અમારા પ્રતિનિધિ તરફથી)
મુંબઈ: કેન્દ્ર સરકાર દ્વારા ઘડવામાં આવેલા ચાર લેબર કાયદાઓનો વિપક્ષ સતત વિરોધ કરી રહ્યું છે. કોંગ્રેસ તેને પાછો ખેંચવાની માગણી કરી રહી છે, તો શિવસેના (યુબીટી) પણ તેની વિરુદ્ધ છે. ઉદ્ધવ ઠાકરે અને શિવસેના કહે છે કે કેન્દ્રના નવા લેબર કાયદા મજૂરોના અધિકારોનો નાશ કરશે. આને કારણે, અનિશ્ર્ચિતતાની સ્થિતિ ચાલુ થઈ જશે.
શિવસેના (યુબીટી)ના સાંસદ અરવિંદ સાવંતે શનિવારે કેન્દ્ર સરકાર દ્વારા ઘડવામાં આવેલા ચાર નવા લેબર કાયદા લાગુ કરવાની ટીકા કરતા કહ્યું કે તે કામદારોના અધિકારોને ક્ષતિ પહોંચાડશે અને અનિશ્ર્ચિતતા પેદા કરશે. શિવસેના (યુબીટી)ની કામદાર પાંખના વડા સાવંતે કેન્દ્ર સરકાર પર મૂડીવાદીઓ અને અમીરો સાથે સાંઠગાંઠનો આરોપ લગાવ્યો હતો.
તેમણે એમ પણ કહ્યું કે નવા કાયદાને કોર્ટમાં પણ પડકારવામાં આવશે.
કેન્દ્ર સરકારે ઔદ્યોગિક સંબંધો સંહિતા 2020, વ્યવસાયિક સલામતી, આરોગ્ય સંહિતા 2020, સામાજિક સુરક્ષા સંહિતા 2020 અને વેતન સંહિતા 2019ને સૂચિત કર્યા છે, અને આ કાયદાઓ વર્ષ 2020થી પેન્ડિંગ હતા, અને તેમાં ઘણા મોટા સુધારા કરવામાં આવ્યા છે.
નવા સંહિતા પર સાવંતે નારાજગી વ્યક્ત કરતા કહ્યું, ‘આ કાયદા મજૂરોના જીવનને બરબાદ કરશે અને તેમને કોઈ ખાસ અધિકારો આપશે નહીં. ભારતીય કામગાર સેના આ કાયદાઓના અમલનો વિરોધ કરશે.’ તેમણે એમ પણ કહ્યું હતું કે અગાઉના કાયદા હેઠળ, 100 કામદારોને રોજગાર આપનારી કોઈપણ ફેક્ટરીના માલિકે પોતાનું યુનિટ બંધ કરવા માટે રાજ્ય સરકારની પરવાનગી લેવી પડતી હતી, પરંતુ નવા કાયદામાં આ સંખ્યા 300 કરી નાખવામાં આવી છે.
શિવસેનાના નેતા સાવંતે વધુમાં કહ્યું કે જ્યારે ઉદ્ધવ ઠાકરેની મહા વિકાસ આઘાડી (એમવીએ)ની સરકાર સત્તામાં હતી, ત્યારે તેમણે રાજ્યમાં આ કાયદા લાગુ કરવાના કોઈપણ પગલાનો સખત વિરોધ કર્યો હતો.
આ પણ વાંચો…મહાયુતિમાં તિરાડ! શિવસેનાએ એક જ પરિવારના 6 સભ્યોને ટિકિટ આપતા ભાજપ નારાજ,
