મુંબઈ: ટીવી સીરીયલ રામાયણના સર્જક રામાનંદ સાગરના પુત્ર આનંદ રામાનંદ સાગર ચોપરાનું 84 વર્ષની વયે નિધન થયું છે. તેઓ લાંબા સમયથી બીમાર હતા. તેમના સાંજે 4.30 વાગ્યે મુંબઈના પવન હંસ સ્થિત હિન્દુ સ્મશાનગૃહ ખાતે તેમના અંતિમ સંસ્કાર કરવામાં આવ્યા. તેમના પરિવારે નિધન પર ઊંડો શોક વ્યક્ત કર્યો.
કરુણા અને સૌમ્ય સ્વભાવથી ઘણા લોકોના હૃદયમાં ખાસ સ્થાન
આનંદ રામાનંદ સાગરના અવસાન અંગેના સત્તાવાર નિવેદનમાં કહેવામાં આવ્યું છે કે, “ખૂબ દુઃખ સાથે સાગર પરિવારે આનંદ રામાનંદ સાગર ચોપરાના દુઃખદ અવસાનની જાહેરાત કરી હતી. વર્ષ 1987 ની મૂળ ટીવી શ્રેણી રામાયણના સર્જક, આનંદ સાગર આર્ટ્સનું સંચાલન કરનારી બીજી પેઢીનો ભાગ હતા. આનંદ રામાનંદ સાગર ચોપરા તેમની કરુણા અને સૌમ્ય સ્વભાવથી ઘણા લોકોના હૃદયમાં ખાસ સ્થાન ધરાવતા હતા. પરિવારના મિત્રો અને તેમને ઓળખતા લોકો તેમને પ્રેમથી યાદ કરશે.
રામાનંદ સાગરના વારસાને આગળ ધપાવ્યો
આનંદ સાગરે રામાનંદ સાગરના વારસાને સાચવવામાં અને આગળ ધપાવવામાં મુખ્ય ભૂમિકા ભજવી હતી. તેમના પિતા દ્વારા સ્થાપિત પ્રોડક્શન હાઉસ, સાગર આર્ટ્સના તેમણે પૌરાણિક અને ભક્તિ પ્રોજેક્ટ્સના નિર્માણ, સર્જનાત્મક દેખરેખ અને સંચાલનમાં નોંધપાત્ર યોગદાન આપ્યું હતું. આનંદ સાગર એવા પ્રોજેક્ટ્સમાં સક્રિયપણે સામેલ રહ્યા જે નવી પેઢીઓને મહાકાવ્ય વાર્તાઓથી પરિચિત કરાવતા હતા. તેમણે હંમેશા ખાતરી કરી કે સાગર બ્રાન્ડ શ્રદ્ધા-આધારિત ટેલિવિઝન પ્રોગ્રામિંગનો પર્યાય બની રહે.
