રાજ ઠાકરેએ સાધુ ગ્રામ માટે વૃક્ષો કાપવાનો વિરોધ કર્યો

સરકારના ઘટકપક્ષ એનસીપીના નેતા અને વૃક્ષપ્રેમી અભિનેતા સયાજી શિંદે સરકાર વિરોધી વલણ લેવાની ચિમકી ઉચ્ચારી

(અમારા પ્રતિનિધિ તરફથી)
મુંબઈ: કુંભ મેળા પહેલા નાશિકમાં ‘સાધુ ગ્રામ’ બનાવવા માટે મહારાષ્ટ્ર સરકાર દ્વારા વૃક્ષો કાપી નાખવાનો વિરોધ વધી રહ્યો છે, મનસેના નેતા રાજ ઠાકરે અને સત્તાધારી ગઠબંધનના ઘટકપક્ષ એનસીપીના નેતા અને વૃક્ષ પ્રેમી અભિનેતા સયાજી શિંદેએ પણ આ મુદ્દે સરકાર વિરોધી વલણ અપનાવ્યું હોવાથી આ વિવાદ વધવાની શક્યતા જોવાઈ રહી છે.

મનસેના વડા રાજ ઠાકરેએ શનિવારે કહ્યું હતું કે દેવેન્દ્ર ફડણવીસ સરકારે લોકોની લાગણીઓનો આદર કરવો જોઈએ અને સંઘર્ષને વધવા દેવો જોઈએ નહીં. સરકાર પર ‘તકવાદ’ કરવાનો આરોપ લગાવતા, તેમણે કહ્યું હતું કે તે કુંભ મેળાના બહાને વૃક્ષો કાપીને પછી તેમના ‘પ્રિય ઉદ્યોગપતિઓ’ને જમીન દાનમાં આપવાની યોજના ધરાવે છે. તેમણે એમ પણ કહ્યું કે જો સરકાર ‘સંઘર્ષાત્મક વલણ’ અપનાવે છે, તો તેમનો પક્ષ લડાઈમાં લોકોની સાથે ઊભો રહેશે.

બીજી તરફ નાયબ મુખ્ય પ્રધાન અજિત પવારની આગેવાની હેઠળની રાષ્ટ્રવાદી કોંગ્રેસ પાર્ટી (એનસીપી)ના સભ્ય અભિનેતા અને વૃક્ષ કાર્યકર્તા સયાજી શિંદેએ શનિવારે નાશિકના તપોવન વિસ્તારની મુલાકાત લીધી અને કહ્યું કે જો સરકાર વૃક્ષો કાપવા પર અડગ રહેશે તો તેઓ તેની વિરુદ્ધ જશે.

31 ઓક્ટોબર, 2026 થી શરૂ થનારા કુંભ મેળા પહેલા તપોવન વિસ્તારના 1,200 એકરમાં ધાર્મિક નેતાઓ અને સંતો માટે સાધુ ગ્રામનું આયોજન કરવામાં આવી રહ્યું છે. 1,670 વૃક્ષોને પીળા રંગથી દૂર કરવા માટે ચિહ્નિત કરવામાં આવ્યા હતા. પ્રકૃતિ પ્રેમીઓ અને નાગરિકોએ દાવો કર્યો હતો કે કેટલાક વૃક્ષો 100 વર્ષ જૂના છે.

સોશિયલ મીડિયા પોસ્ટમાં રાજ ઠાકરેએ કહ્યું હતું કે આ પહેલી વાર નથી કે નાસિકમાં કુંભ મેળો થઈ રહ્યો છે.
‘જ્યારે મહારાષ્ટ્ર નવનિર્માણ સેના (મનસે) નાસિકમાં સત્તામાં હતી, ત્યારે મનસેને વૃક્ષો કાપવાની જરૂર નહોતી લાગી,’ એમ તેમણે કહ્યું હતું.

રાજ્ય સરકાર પર તેમનો આ હુમલો તેમના પિતરાઈ ભાઈ અને શિવસેના (યુબીટી)ના વડા ઉદ્ધવ ઠાકરેના એક દિવસ પછી આવ્યો છે જ્યારે તેમણે કહ્યું હતું કે તપોવન, જ્યાં પ્રસ્તાવિત સાધુ ગ્રામ બનવાનું છે, તે સ્થાન છે જ્યાં વ્યાપકપણે માનવામાં આવે છે કે ભગવાન રામ, સીતા અને લક્ષ્મણ તેમના વનવાસ દરમિયાન રહ્યા હતા.

સયાજી શિંદેએ પ્રધાન ગિરીશ મહાજનની ટીકા કરી અને કહ્યું કે તેમણે વિવાદાસ્પદ નિવેદનો કરવાથી દૂર રહેવું જોઈએ.

આ પણ વાંચો…એટલે જ મેં રાજ ઠાકરેને છોડી દીધા: ભાજપમાં જોડાયા બાદ રમેશ પરદેશીનું નિવેદન