(અમારા પ્રતિનિધિ તરફથી)
થાણે: થાણે જિલ્લાના મુંબ્રાના ગાવદેવીમાં ડુંગર પર શનિવારે ટ્રેકિંગ કરવા ગયેલા અને અંધારું થતા રસ્તો ભૂલી જતા પાંચ યુવકો ફસાઈ ગયા હતા. ફાયરબ્રિગેડ અને સ્થાનિક રહેવાસીઓ દ્વારા શનિવારે મોડી રાતના તેમને શોધી કાઢવામાં આવ્યા હતા અને પોલીસને સોંપ્યા હતા.
ડિઝાસ્ટર મેનેજમેન્ટના જણાવ્યા મુજબ શનિવારે બપોરના ત્રણેક વાગ્યાની આસપાસ મુંબ્રામાં રહેતા ૧૮ વર્ષના પાંચ યુવકો મુંબ્રા બાયપાસ પર આવેલા ગાવદેવીમાં આદિવાસી પાડામાં ઉપર ડુંગર પર બપોરના ટ્રેકિંગ માટે ગયા હતા. જોકે અંધારું થઈ જતા પાછા ફરવા સમયે તેઓ રસ્તો ભૂલી ગયા હતા. પાછો આવવા માટે રસ્તો નહીં મળતા તેમણે ભારે જહેમત બાદ ફાયરબ્રિગેડ સાથે સંપર્ક કરીને મદદ માગી હતી.
ફાયરબ્રિગેડે દ્વારા સ્થાનિક રહેવાસીઓની મદદથી રાતના ૧૧.૩૦ વાગ્યાની આસપાસ ડુંગર પર ફસાઈ ગયેલા પાંચેને બચાવી લીધા હતા. પાંચેય યુવકો મુંબ્રામાં રહેતા, જેમાં સૈયદ અયુબ, શૌએબ ખાન, અમૂર ખાન, અરહાન ખાન અને મુદદશીર ગુફારેનો સમાવેશ થાય છે.
