(અમારા પ્રતિનિધિ તરફથી)
મુંબઈ: મુંબઈ સહિત રાજ્યમાં ફરી ચોમાસું સક્રિય થયું છે. હવામાન વિભાગે મુંબઈ અને તેના પડોશી જિલ્લા થાણે અને પાલઘરમાં આગામી પાંચ દિવસ ભારે વરસાદ પડવાની શક્યતા વ્યક્ત કરી છે. મુંબઈ, થાણે અને પાલઘર માટે ગુરુવાર અને શનિવાર-રવિવારના યલો એલર્ટ રહેશે. તો રાયગડ તથા રત્નાગિરીમાં ઓરેન્જ અલર્ટ જાહેર કરીને ભારેથી અતિભારે વરસાદ પડવાની શક્યતા વ્યક્ત કરી છે.
છેલ્લા થોડા દિવસનો વિરામ લીધા બાદ બુધવારે મુંબઈમાં દિવસ દરમ્યાન મધ્મયથી હળવો વરસાદ રહ્યો હતો. મંગળવાર સવારથી બુધવાર સવાર સુધીમાં કોલાબામાં સાત મિ.મી. તો તો સાંતાક્રુઝમાં ચાર મિ.મી. વરસાદ નોંધાયો હતો. બુધવારે આખો દિવસ મુંબઈમાં તીવ્ર વરસાદના ઝાપટાં પડ્યાં હતાં.
આ પણ વાંચો: ગુજરાતમાં આગામી 7 દિવસ ભારે વરસાદની આગાહી, 12 કલાકમાં 101 તાલુકામાં વરસાદ
હવામાન વિભાગના જણાવ્યા મુજબ ગુરુવારે શહેરના અલગ અલગ વિસ્તારોમાં ભારે વરસાદ પડશે અને શુક્રવાર સુધીમાં વરસાદની તીવ્રતા ઓછી થશે. શનિવાર બાદ વરસાદની તીવ્રતામાં વધારો થવાની ધારણા છે.
હવામાનના નિષ્ણાતોના જણાવ્યા મુજબ ભારત પર સર્જાયેલી લો પ્રેશર સિસ્ટમને કારણે હાલ વરસાદ પડી રહ્યો છે. હાલમાં કોઈ ઓફશોર ટ્રફ સર્જાયો નથી પણ ઝારખંડ અને પૂર્વીય મધ્ય પ્રદેશ પર એક લો પ્રેશર છે. એની સાથે જ નૈર્ઋત્યનું ચોમાસું ફરી સક્રિય થયું હોવાની આ બંનેની અસર હેઠળ કોંકણ પ્રદેશમાં વરસાદ પડી રહ્યો છે. મુંબઈમાં છ જુલાઈ બાદ ચોમાસું ફરી તેના અસલી મિજાજમાં આવે એવી શક્યતા છે. પૂર્વ ભારતમાં વધુ એક લો પ્રેશર ડેવલપ થવાની શક્યતા છે અને તે પશ્ર્ચિમ તરફ આગળ વધે એવી શક્યતા છે અને તેની અસર હેઠળ મુંબઈમાં ભારે વરસાદ પડવાની શકયતા છે.
