મુંબઈ લોકલમાં મુસાફરી કરનારા પ્રવાસીઓ આવી મહત્ત્વની માહિતી, જાણી લેજો નહીંતર…

મુંબઈઃ લોકલ ટ્રેન એ મુંબઈગરાની લાઈફલાઈન છે. આ લાઈફલાઈનના જ મેઈન્ટેનન્સ વર્ક માટે દર રવિવારે રેલવે દ્વારા મેગા બ્લોક હાથ ધરવામાં આવે છે. જો તમે પણ આવતીકાલે કોઈ કામ માટે લોકલ ટ્રેનથી મુસાફરી કરવાના હોવ તો પહેલાં આ સમાચાર વાંચી લો. 30મી નવેમ્બરના મધ્ય અને હાર્બર લાઈન પર તેમ જ પશ્ચિમ રેલવે પર શનિવારે રાતે મેગા બ્લોક હાથ ધરવામાં આવશે.

મધ્ય રેલવે પર સીએસએમટી-વિદ્યાવિહાર અપ-ડાઉન સ્લો લાઈન

મધ્ય રેલવે પર સીએસએમટી-વિદ્યાવિહાર વચ્ચે અપ-ડાઉન સ્લો લાઈન પર સવારે 11 વાગ્યાથી બપોરે 4 વાગ્યા સુધી એમ પાંચ કલાકનો મેગા બ્લોક હાથ ધરવામાં આવશે. બ્લોકના સમય દરમિયાન અપ-ડાઉન સ્લો લોકલ સીએસએમટી-વિદ્યાવિહાર વચ્ચે અપ-ડાઉન ફાસ્ટ લાઈન પર દોડાવવામાં આવશે. આ લોકલ ટ્રેનો ભાયખલા, પરેલ, દાદર, માટુંગા, સાયન અને કુર્લા સ્ટેશન પર ઊભી રહેશે. પાંચ કલાકના આ બ્લોક દરમિયાન મસ્જિદ બંદર, સેન્ડહર્સ્ટ રોડ, ચિંચપોકલી, કરી રોડ સ્ટેશન પર ટ્રેનો ઉપલબ્ધ નહીં રહે.

આ પણ વાંચો: મુંબઈ લોકલઃ રાતે ટ્રેનમાં એકલી મુસાફરી કરી રહેલી મહિલાની સુરક્ષા માટે પોલીસે કર્યું આ કામ, જાણો સમગ્ર કિસ્સો…

હાર્બર લાઈન પર પનવેલ-વાશી અપ-ડાઉન લાઈન

હાર્બર લાઈનની વાત કરીએ કરીએ તો હાર્બર લાઈન પર સવારે 11 વાગ્યાથી બપોરે 4 વાગ્યા સુધી એમ કુલ પાંચ કલાકનો મેગા બ્લોક પનવેલ-વાશી અપ-ડાઉન લાઈન પર હાથ ધરવામાં આવશે. આ સમય દરમિયાન પનવેલ સીએસએમટી વચ્ચે અપ-ડાઉન લાઈન પર ટ્રેન વ્યવહાર બંધઝ રહેશે. બ્લોકના સમય દરમિયાન સીએસએમટી-વાશી વચ્ચે સ્પેશિયલ લોકલ ટ્રેનો દોડાવવામાં આવશે.

ટ્રાન્સ હાર્બર લાઈન પર થાણે-પનવેલ અપ-ડાઉન લાઈન

ટ્રાન્સ હાર્બર લાઈન પર પણ સવારે 11થી બપોરે 4 વાગ્યા સુધી થાણે-પનવેલ વચ્ચે અપ-ડાઉન લાઈન પર મેગા બ્લોક હાથ ધરવામાં આવશે. બ્લોકના સમય દરમિનાય થાણેથી વાશી અને નેરુલ વચ્ચે ટ્રેનો ઉપલબ્ધ રહેશે.

પશ્ચિમ રેલવે પર નાઈટ બ્લોક મુંબઈ સેન્ટ્રલ-માહિમ અપ-ડાઉન લાઈન

પશ્ચિમ રેલવે પર રવિવારે કોઈ મેગા બ્લોક હાથ નહીં ધરવામાં આવે પરંતુ આજે રાતે 12થી વહેલી સવારે 4.15 વાગ્યા સુધી ચાર કલાકનો મુંબઈ સેન્ટ્રલ-માહિમ વચ્ચે અપ-ડાઉન ફાસ્ટ લાઈન પર જમ્બો બ્લોક હાથ ધરવામાં આવશે. બ્લોકના સમય દરમિયાન મુંબઈ સેન્ટ્રલ માહિમ વચ્ચે અપ-ડાઉન ફાસ્ટ લોકલ અપ-ડાઉન સ્લો લાઈન પર દોડાવવામાં આવશે.