કોસ્ટલ રોડ: પ્રભાદેવીથી વરલીને જોડતો 550 મીટરનો વેહિકલ અંડરપાસ શુક્રવારથી ટ્રાફિક માટે ખુલ્લો મુકાયો…
(અમારા પ્રતિનિધિ તરફથી)
મુંબઈ: મુંબઈ કોસ્ટલ રોડ પ્રોજેક્ટના છેલ્લા તબક્કાના કામમાં પ્રભાદેવીથી વરલીને જોડતો 550 મીટરનો વેહિકલ અંડરપાસ શુક્રવારથી ટ્રાફિક માટે ખુલ્લો મૂકવામાં આવ્યો છે. આ મહત્વપૂર્ણ લિંક કોસ્ટલ રોડ સુધી એક્સેસ આપે છે આ રોડથી ટ્રાફિક ઓછો થશે અને સમગ્ર શહેરમાં એકંદર કનેક્ટિવિટી વધશે. મુંબઈ ટ્રાફિક પોલીસના નોટિફિકેશન મુજબ, આ રૂટ સવારે 7 વાગ્યાથી મધ્યરાત્રિ 12 વાગ્યા સુધી ફોર-વ્હીલર અને પેસેન્જર બસો માટે ખુલ્લો રહેશે.
મહત્વાકાંક્ષી મુંબઈ કોસ્ટલ રોડ પ્રોજેક્ટમાં મુખ્ય સ્થળોએ મલ્ટી-લેવલ ઇન્ટરચેન્જનો સમાવેશ થાય છે – હાજી અલી, પેડર રોડ (અમરસન ગાર્ડન) અને વરલી સી ફેસ, જેમાં પેડર રોડ પર ચાર, હાજી અલી ખાતે આઠ અને વરલી ખાતે છ માર્ગ (રોડ)છે. જ્યારે મોટાભાગના રોડ છેલ્લા એક વર્ષમાં તબક્કાવાર ખોલવામાં આવ્યા છે, ત્યારે વરલી ઇન્ટરચેન્જ પર 550 મીટર લાંબા, 11 મીટર પહોળા વેહિકલ અંડરપાસનું બાંધકામ ચાલુ હતું. આ વેહિકલ અંડરપાસમાં બે રોડ શામેલ છે રોડ – 3 પ્રભાદેવી અને દાદરને બાંદ્રા સાથે જોડે છે જ્યારે રોડ 5 દાદર અને પ્રભાદેવીને મરીન ડ્રાઇવ સાથે જોડે છે.
પાલિકાના અધિકારીએ જણાવ્યું હતું કે ખાન અબ્દુલ ગફ્ફાર ખાન રોડ નીચેથી પસાર થતો અંડરપાસ પ્રભાદેવી અને દાદરના વાહનચાલકો માટે કોસ્ટલ રોડ સુધી સીધો પ્રવેશ પૂરો પાડે છે. તે વરલીના જેકે કપૂર ચોકથી શરૂ થાય છે અને બિંદુ માધવ ઠાકરે ચોક નજીક બહાર નીકળે છે. આ ટનલ વરલી ઇન્ટરચેન્જ સાથે જોડાય છે, જેનાથી વાહનો ઉત્તરમાં બાંદ્રા તરફ અથવા દક્ષિણ તરફ મરીન ડ્રાઇવ તરફ જઈ શકે છે. લાંબા ગાળે, આ અંડરપાસ શિવડી-વરલી લિંક અને કોસ્ટલ રોડ વચ્ચે એક મહત્વપૂર્ણ કનેક્ટર બનશે, જે શહેરમાં પૂર્વ-પશ્ચિમ કનેક્ટિવિટીને નોંધપાત્ર રીતે વધારશે.
વરલી સીફેસની સમાંતર ચાલતી આ ટનલ ફક્ત એક તરફી દક્ષિણ તરફના ટ્રાફિક માટે ડિઝાઇન કરવામાં આવી છે. તે 10.58 કિમીના કોસ્ટલ રોડ પ્રોજેકટનો એક ભાગ છે, જે મરીન ડ્રાઇવ પર પ્રિન્સેસ સ્ટ્રીટ ફ્લાયઓવરથી બાંદ્રા વરલી સી લિંક સુધી ફેલાયેલો છે. લગભગ રૂ. ૧૩,૦૦૦ કરોડના ખર્ચે તૈયાર કરાયેલા આ પ્રોજેક્ટમાં મરીન ડ્રાઇવથી પ્રેરિત ૭.૫ કિમીનો સી ફેસ પ્રોમોનેડનો પણ સમાવેશ થાય છે, જે ૧૫ જૂન સુધીમાં ખુલવાનો છે. આ જગ્યામાં પ્રિયદર્શિની પાર્કથી વરલી સુધી ફેલાયેલા જોગિંગ ટ્રેક, બેઠક વિસ્તારો અને લેન્ડસ્કેપ્ડ ગ્રીન ઝોન હશે.
