(અમારા પ્રતિનિધિ તરફથી)
મુંબઈ: મુંબઈ અને આસપાસના વિસ્તારોમાં સીએનજી પંપો પર મંગળવારે સતત બીજા દિવસે પણ લાંબી લાઇનો જોવા મળી હતી, કારણ કે મુખ્ય ગેસ પાઇપલાઇનને નુકસાનને કારણે પુરવઠો ખોરવાયો હતો અને વાહનો માટે રિફ્યુઅલિંગમાં અવરોધ સર્જાયો હતો. જોકે, મંગળવારે મોડી સાંજે એમજીએલ દ્વારા એવી જાહેરાત કરવામાં આવી હતી કે ગેઈલની મુખ્ય પાઈપલાઈનમાં પડેલું ભંગાણ દુરસ્ત કરી નાખવામાં આવ્યું છે અને સ્થિતિ પૂર્વવત્ થઈ ગઈ છે.
મહાનગર ગેસ લિમિટેડ (એમજીએલ) દ્વારા સંચાલિત મોટાભાગના સીએનજી પંપો પર વહેલી સવારથી લાંબી લાઇનો જોવા મળી હતી, ખાસ કરીને કાળી-પીળી ટેક્સીઓ અને ઓટોરિક્ષાઓની, જેમાં ઘણા ડ્રાઇવરોએ સામાન્ય રીતે 15 થી 30 મિનિટની સરખામણીમાં ત્રણથી ચાર કલાક રાહ જોવાનો વારો આવ્યો હોવાની ફરિયાદ કરી હતી.
આપણ વાચો: સીએનજી લાઈનમાં ભંગાણ: જનજીવન ખોરવાયું
મહાનગર ગેસ લિમિટેડના જણાવ્યા મુજબ, રવિવારે રાષ્ટ્રીય કેમિકલ્સ એન્ડ ફર્ટિલાઇઝર્સ (આરસીએફ)ના કમ્પાઉન્ડની અંદર ગેઈલની મુખ્ય સપ્લાય પાઇપલાઇનને થર્ડ પાર્ટી નુકસાન થયા બાદ વડાલા ખાતે સિટી ગેટ સ્ટેશનમાં ગેસ પ્રવાહમાં અવરોધ ઉભો થયો હતો, જે શહેરમાં કોમ્પ્રેસ્ડ નેચરલ ગેસ (સીએનજી)ના સપ્લાય માટેનું મુખ્ય સ્થળ છે.
‘હું સવારના 4 વાગ્યાથી સીએનજી પંપની કતારમાં રાહ જોઈ રહ્યો છું અને મને હજુ પણ ખબર નથી કે મારું વાહન ક્યારે રિફિલ થશે, કારણ કે મારી આગળ ઘણી બધી ટેક્સીઓ છે,’ એમ એક ટેક્સી ડ્રાઈવર સીતારામ રજકે જણાવ્યું હતું. તે તારદેવમાં એમજીએલના સીએનજી પંપ પર રિફિલિંગ માટે લાંબી કતારમાં રાહ જોઈ રહ્યો હતો.
રજકે કહ્યું કે તે વહેલીતકે સીએનજી રિફિલ કરવા માગે છે, રસ્તાઓ પર ઓછી કેબ કાર્યરત હોવાથી સારી કમાણી કરવાની આશા રાખે છે. ઘરગથ્થુ પાઇપ્ડ નેચરલ ગેસ (પીએનજી) સપ્લાય પર કોઈ અસર પડી ન હોવાનો દાવો પણ એમજીએલ દ્વારા કરવામાં આવ્યો હતો.
આપણ વાચો: ગેસ પાઈપલાઈનને નુકસાન બાદ સીએનજી સપ્લાયને ફટકો પડતા ઓટો, ટેકસી અને બસને અસર…
પેટ્રોલ ડીલરો દ્વારા જણાવાયું છે કે ઓછા દબાણવાળા પંપોને ડિસ્પેન્સિંગ ઘટાડવાની ફરજ પડી હતી અથવા કામચલાઉ ધોરણે કામગીરી બંધ કરવાની ફરજ પડી હતી. પેટ્રોલ ડીલર્સ એસોસિએશનના જણાવ્યા અનુસાર, મુંબઈ શહેરમાં લગભગ 150 સીએનજી પંપ છે અને ઘણા સોમવાર સવારથી ગેસના ઓછા દબાણને કારણે કાર્યરત નથી.
કેટલીક એપ-આધારિત કેબ્સ પેટ્રોલ પર સ્વિચ કરી હતી, પરંતુ મોટાભાગની કાળી-પીળી ટેક્સીઓ, જેમણે જાળવણી ખર્ચ ઘટાડવા માટે પોતાનો પેટ્રોલ વિકલ્પ દૂર કર્યો હતો, તેમને આવો કોઈ લાભ મળ્યો નહોતો અને તેમને કામગીરી બંધ કરવાની ફરજ પડી હતી, એમ ડીલરો દ્વારા જણાવાયું હતું.
બૃહન્મુંબઈ ઇલેક્ટ્રિક સપ્લાય એન્ડ ટ્રાન્સપોર્ટ (બેસ્ટ) ઉપક્રમના સૂત્રોએ જણાવ્યું હતું કે કેટલાક ડેપોમાં પુરવઠો પ્રભાવિત થવાને કારણે તેની કેટલીક સીએનજી બસો મોડી પડી હતી અથવા રૂટ ઘટાડવાની ફરજ પડી હતી. જોકે, યુટિલિટીએ સત્તાવાર રીતે જણાવ્યું હતું કે કામગીરી પર કોઈ અસર થઈ નથી.
‘પાઈપલાઈનના સમારકામ પછી મંગળવારે સાંજે વડાલામાં પુરવઠો પુન:સ્થાપિત થયો હતો અને એમજીએલના નેટવર્કમાં ગેસ પુરવઠો સામાન્ય થઈ ગયો હતો,’ એમ જણાવતાં તેમણે થયેલી અસુવિધા બદલ નાગરિકો સમક્ષ દિલગીરી વ્યક્ત કરી હતી.
