મુંબઇ સુશોભીકરણનું કામ એક વર્ષ પછી પણ અપૂર્ણ હવે માર્ચ 2024નો ટાર્ગેટ

મુંબઈ: મુખ્ય પ્રધાન એકનાથ શિંદે અને નાયબ મુખ્ય પ્રધાન દેવેન્દ્ર ફડણવીસની હાજરીમાં પાલિકાએ મુંબઈમાં સુશોભીકરણનું કામ પૂરજોશમાં શરૂ કર્યું હતું. પરંતુ એક વર્ષ વીતી જવા છતાં પણ પાલિકા માત્ર 80 ટકા જ સુશોભીકરણનું કામ પૂર્ણ કરી શકી છે, જ્યારે તે કામ મે 2023 સુધીમાં પૂર્ણ કરવાનું હતું. પાલિકાએ હવે સુશોભીકરણનું કાર્ય પૂર્ણ કરવા માટે માર્ચ 2024ની નવી સમયમર્યાદા નક્કી કરી છે. મુંબઈમાં આઠમી ડિસેમ્બર, 2022થી સુશોભીકરણનું કામ શરૂ થયું હતું. ત્યારબાદ પાલિકા કમિશનર આઈએસ ચહલે માર્ચ 2023 સુધીમાં આ કામ પૂર્ણ કરવાનો દાવો કર્યો હતો. બાદમાં સમયમર્યાદા મે સુધી લંબાવવામાં આવી હતી, પરંતુ પાલિકા ડિસેમ્બર 2023 સુધીમાં કામ પૂર્ણ કરવામાં નિષ્ફળ રહી છે. પાલિકા મુંબઈને સુંદર બનાવવા માટે 1,750 કરોડ રૂપિયા ખર્ચી રહી છે. પાલિકાના ડેપ્યુટી કમિશનરે જણાવ્યું કે મુંબઈમાં 1,278 સુશોભીકરણના કામો શરૂ થયા છે, જેમાંથી 1,130 કામ પૂર્ણ થઈ ગયા છે. આ કામો પૈકી 383 કામો શહેરમાં અને 747 કામો પરાંમાં છે. પાલિકાએ અત્યાર સુધીમાં આ કામો પર 500 કરોડ રૂપિયાથી વધુનો ખર્ચ કર્યો છે. જેમાં સ્કાયવોકની લાઇટિંગ માટેના 65 કરોડ રૂપિયાનો પણ સમાવેશ થાય છે. પાલિકાએ તમામ 24 વોર્ડને સુશોભીકરણના કામ માટે 30-30 કરોડ રૂપિયા આપ્યા છે.

ફૂટપાથ અને બીચને ચમકાવવાનો પ્રયાસ

મુખ્ય પ્રધાન શિંદેની સૂચના પર પાલિકા ફૂટપાથ, ટ્રાફિક જંક્શન, બગીચા, દરિયા કિનારા અને ફ્લાયઓવર બ્રિજની નીચે મોટા પાયે સુશોભીકરણનું કામ કરી રહી છે. મુંબઈના તમામ રસ્તાઓ, પુલ, ફૂટપાથ, બગીચાઓ, દરિયા કિનારાને સફાઈ, રંગરોગાન અને લાઈટીંગ દ્વારા સુંદર બનાવવામાં આવી રહ્યા છે. આ ઉપરાંત ફૂટપાથ અને રોડ ડિવાઈડર વચ્ચેની ખુલ્લી જગ્યાઓમાં સુશોભિત ફૂલો અને હરિયાળી છોડ વાવવામાં આવી રહ્યા છે. ફૂટપાથ અને રસ્તાઓના સુધારણામાં આધુનિક, આકર્ષક, ટકાઉ સ્ટ્રીટ ફર્નિચર સ્થાપિત કરવાની પણ યોજના છે. ગાર્ડન વિભાગના સહયોગથી તમામ વોર્ડમાં રોડ ડિવાઈડર વચ્ચેની ખુલ્લી જગ્યાઓમાં સુશોભિત ફૂલો અને હરિયાળું કરવામાં આવી રહ્યું છે.

ગુણવત્તાસભર ફૂટપાથ બનાવવા માટે વધારાની જગ્યામાં સ્ટેમ્પ્ડ કોંક્રીટ અને આકર્ષક લાઈટીંગ કરવામાં આવી રહી છે. મુખ્ય માર્ગો પર સ્ટ્રીટ લાઇટનું બ્યુટીફીકેશન અને ઇલેકટ્રીક પોલની રોશની, સ્કાયવોક પર સફાઇ, પેઇન્ટીંગ અને ઇલેકટ્રીકલ કામ, વૃક્ષારોપણ, ફૂલો, ફુવારા અને બીચ પર લાઇટીંગની વ્યવસ્થા કરવામાં આવી રહી છે. ગેટવે ઓફ ઈન્ડિયા વિસ્તારનું સુશોભીકરણ, દિવાલોનું પેઈન્ટીંગ કરવામાં આવી રહ્યું છે.

વિલંબ માટેના વાસ્તવિક કારણો

પાલિકાનો ભાગ્યે જ કોઈ એવો પ્રોજેક્ટ છે જે સમયસર પૂરો થયો હોય. ભૂતપૂર્વ કોર્પોરેટરો આક્ષેપ કરે છે કે પાલિકા અધિકારીઓની કાર્ય પદ્ધતિ આ માટે મોટાભાગે જવાબદાર છે. સુશોભીકરણ પ્રોજેક્ટના પ્રારંભિક તબક્કામાં ઘણા ટેન્ડરોમાં અધિકારીઓ અને કોન્ટ્રાક્ટર વચ્ચે સાંઠગાંઠના આક્ષેપો થયા હતા, ત્યારબાદ તે ટેન્ડરો રદ કરવામાં આવ્યા હતા અને ફરીથી ચાલુ કરવામાં આવ્યા હતા. વિરોધ પક્ષો દ્વારા સુશોભીકરણના કામમાં ભ્રષ્ટાચારના આક્ષેપોને કારણે વહીવટીતંત્ર પણ દબાણ હેઠળ રહ્યું હતું. વરસાદ દરમિયાન કામની ગતિ પણ ખૂબ જ ધીમી રહી હતી, જેના પર વહીવટીતંત્રએ કોઈ ધ્યાન આપ્યું ન હતું. નબળી ગુણવત્તાના કારણે ઘણી જગ્યાએ ફરીથી કામ કરવામાં આવ્યું હતું. મુંબઈમાં અત્યાર સુધી કરવામાં આવેલ સુશોભીકરણનું કામ બહુ મોટું નથી. બગીચામાં ફર્નિચર, દરિયાકિનારા પર લાઇટિંગ અને અન્ય મોટા કામો હજુ બાકી છે.

• મુંબઈના સુશોભીકરણનો હિસાબ
• 500 કરોડથી વધુનો ખર્ચ કરવામાં આવ્યો
• 65 કરોડમાં સ્કાયવોકની લાઇટિંગ કરવામાં આવી
• 1,278 સુશોભીકરણના કામો શરૂ થયા
• પાલિકાએ 1,130 કામ પૂર્ણ કર્યા
• મુંબઈ શહેરમાં 383 કામો થયા
• ઉપનગરોમાં 747 કામો પૂર્ણ થયા