મુંબઈ ‘ગેસ ચેમ્બર’ બની રહ્યું છે: વર્ષા ગાયકવાડ

(અમારા પ્રતિનિધિ તરફથી)
મુંબઈ: મહારાષ્ટ્રના ભૂતપૂર્વ પ્રધાન અને કોંગ્રેસના નેતા વર્ષા ગાયકવાડે શનિવારે રાજ્ય સરકાર પર મુંબઈમાં વધતા વાયુ પ્રદૂષણને રોકવામાં નિષ્ફળ જવાનો આરોપ લગાવ્યો હતો અને એવો દાવો કર્યો કે પીએમ 2.5નું સ્તર ‘ખતરનાક’ સ્તરે પહોંચી ગયું છે અને શહેર ‘ગેસ ચેમ્બર’ બની રહ્યું છે.

મુંબઈ કોંગ્રેસ દ્વારા શહેરમાં હવાની કથળી રહેલી ગુણવત્તાના મુદ્દે આયોજિત એક બેઠકમાં બોલતા, ગાયકવાડે હાર્વર્ડ યુનિવર્સિટીના એક અભ્યાસનો ઉલ્લેખ કર્યો હતો, જેમાં એવો અંદાજ લગાવવામાં આવ્યો હતો કે મુંબઈમાં દર વર્ષે લગભગ 5,100 લોકો પ્રદૂષણને કારણે મૃત્યુ પામે છે.

આપણ વાચો: અમદાવાદ પ્રદૂષણના ભરડામાં, AQI 300ને પાર

‘આ ફક્ત આંકડા નથી. આ એવા પરિવારો છે જેઓ તેમના પ્રિયજનો ગુમાવી રહ્યા છે,’ એમ તેમણે જણાવ્યું હતું. તેમણે એવો આરોપ લગાવ્યો હતો કે ‘ભ્રષ્ટ મહાયુતિ સરકારની કોન્ટ્રાક્ટર-ફર્સ્ટ, પીપલ-લાસ્ટ મોડેલને કારણે અને સલામતી વિના બેફામ બાંધકામ, પર્યાવરણ સંબંધિત નિયમોનું ઉલ્લંઘન, ખુલ્લી જગ્યાઓ અને ઇકો-સેન્સિટિવ ઝોનનું વિતરણ અને વૃક્ષો કાપવાને શહેરમાં વધી રહેલા પ્રદૂષણના સ્તર માટે જવાબદાર મુખ્ય પરિબળો ગણાવ્યા હતા.

કોંગ્રેસના નેતાએ કહ્યું હતું કે શહેરને ‘વિકાસના નામે ગેસ ચેમ્બરમાં ફેરવવામાં આવી રહ્યું છે’ અને ઉમેર્યું હતું કે બાળકો બીમાર પડી રહ્યા છે અને સિનિયર સિટિઝન્સ શ્ર્વાસ લેવામાં મુશ્કેલી અનુભવી રહ્યા છે. ‘જો આ જાહેર આરોગ્ય સેવાની કટોકટી નથી, તો શું છે?’ એવો સવાલ ગાયકવાડે ઉઠાવ્યો હતો.