(અમારા પ્રતિનિધિ તરફથી)
મુંબઈ: મહારાષ્ટ્રના મુખ્ય પ્રધાન દેવેન્દ્ર ફડણવીસે શુક્રવારે જણાવ્યું હતું કે તેમની સરકાર મુંબઈને ‘આધુનિક, સર્વસમાવેશક શહેર’ બનાવવા અને ‘પ્રગતિશીલ’ રાજ્ય બનાવવા માટે તમામ જરૂરી પગલાં લઈ રહી છે.
વિધાનસભામાં વિપક્ષ દ્વારા પ્રાયોજિત ‘અંતિમ અઠવાડિયા પ્રસ્તાવ’ પરની ચર્ચાનો જવાબ આપતા, તેમણે કહ્યું હતું કે આગામી મહિનાઓમાં (મહાનગરપાલિકાની ચૂંટણીઓ પહેલા) મુંબઈને મહારાષ્ટ્રથી અલગ કરવાના પ્રયાસો અંગે અનેક દાવાઓ થશે.
આપણ વાંચો: ‘બાળાસાહેબ જે ન કરી શક્યા, તે દેવેન્દ્ર ફડણવીસે કર્યું’: રાજ ઠાકરે
‘હું બધાને કહેવા માંગુ છું કે, કોઈ પણ વ્યક્તિ, ભલે તે કોઈ પણ હોય, મુંબઈને મહારાષ્ટ્રથી અલગ કરી શકશે નહીં,’ એમ તેમણે કહ્યું હતું.
રેલવે પ્રધાન અશ્ર્વિની વૈષ્ણવે એવી જાણકારી આપી છે કે મુંબઈ ક્ષેત્રમાં દોડતી બધી ઉપનગરી ટ્રેનોને દરવાજાવાળી એર-કન્ડિશન્ડ ટ્રેનોમાં રૂપાંતરિત કરવાની જાહેરાત ટૂંક સમયમાં કરવામાં આવશે, એમ પણ ફડણવીસે જણાવ્યું હતું.
તેમણે ધારાવી ઝૂંપડપટ્ટી પુનર્વિકાસ પ્રોજેક્ટના નામે મુંબઈમાં જમીન અદાણી જૂથને આપવામાં આવી હોવાના વિપક્ષના આરોપને પણ નકારી કાઢ્યો હતો.
ફડણવીસે જણાવ્યું હતું કે, જમીન ડીઆરપી (ધારાવી પુનર્વિકાસ પ્રોજેક્ટ)ને ટ્રાન્સફર કરવામાં આવી છે, જે એક ખાસ હેતુ માટે નિર્મિત સંસ્થા (એસપીવી) છે અને તેમાં રાજ્ય સરકાર ભાગીદાર છે.
આપણ વાંચો: વિજય રેલી નહીં, રૂદાલી સભા હતી! રાજ-ઉદ્ધવના મિલન પર દેવેન્દ્ર ફડણવીસે કર્યો વળતો પ્રહાર
અદાણી જૂથ એક ડેવલપર છે અને 108 હેક્ટરથી વધુ જમીન પર પુનર્વસન અને પુનર્વિકાસ થશે, એમ જણાવતાં તેમણે ઉમેર્યું હતું કે, બધા પાત્ર ઝૂંપડપટ્ટીવાસીઓનું ધારાવીમાં જ પુનર્વસન કરવામાં આવશે. મુખ્ય પ્રધાને એવી ખાતરી આપી હતી કે પુનર્વસન પ્રક્રિયા સાત વર્ષમાં પૂર્ણ થશે.
ધારાવી ફક્ત ઝૂંપડપટ્ટી વિસ્તાર નથી પણ એક આર્થિક કેન્દ્ર પણ છે. આ વિસ્તારના કુંભારો અને ચામડાના કારીગરોને ખાસ કેસ તરીકે પાંચ વર્ષની કરમુક્તિ આપવામાં આવશે, એમ તેમણે જણાવ્યું હતું.
ફડણવીસે એમ પણ કહ્યું હતું કે જેમને ધારાવીમાં ઘર નથી મળતા તેમને શહેરમાં અન્યત્ર રહેવાની વ્યવસ્થા કરવામાં આવશે. એક ભાડાની આવાસ યોજના હશે જ્યાં ભાડૂઆતો, જો તેઓ 12 વર્ષથી ત્યાં રહે છે, તો તેમના નામે ઘર ટ્રાન્સફર કરવામાં આવશે. ‘કુલ મળીને 10 લાખ લોકોને ઘર મળશે,’ એમ તેમણે કહ્યું હતું.
મુંબઈમાં તમામ પ્રકારના જાહેર પરિવહન માટે સિંગલ ટિકિટ સેવા શરૂ કરવા માટેની ટ્રાયલ ચાલી રહી છે, એમ ફડણવીસે જણાવ્યું હતું. તેમણે એમ પણ કહ્યું હતું કે, 2030 સુધીમાં રાજ્યમાં વપરાતી અડધી વીજળી હરિત સ્ત્રોતોમાંથી આવશે.
