પતિઓ પણ 100 રૂપિયા આપતા નથી: મંત્રીએ લડકી બહિનના લાભાર્થીઓને ફડણવીસને ટેકો આપવા કહ્યું
(અમારા પ્રતિનિધિ તરફથી)
મુંબઈ: મહારાષ્ટ્રના પ્રધાન અને ભાજપના નેતા જયકુમાર ગોરે ‘મુખ્યમંત્રી માઝી લાડકી બહિણ યોજના’નો લાભ લઈ રહેલી મહિલા મતદારોને આગામી સ્થાનિક સ્વરાજ્ય સંસ્થાની ચૂંટણીમાં મુખ્ય પ્રધાન દેવેન્દ્ર ફડણવીસ પ્રત્યે વફાદાર રહેવા હાકલ કરતાં એવું વિવાદાસ્પદ નિવેદન કર્યું હતું કે પતિઓ પણ મહિલાઓને 100 રૂપિયા આપતા નથી.
શનિવારે સોલાપુર જિલ્લામાં એક ચૂંટણી રેલીને સંબોધતા, રાજ્યના ગ્રામીણ વિકાસ ખાતાના પ્રધાન જયકુમાર ગોરેએ મહિલાઓને એવી સલાહ આપી હતી કે જે પણ પૈસા આપે છે તેમની પાસેથી પૈસા લઈ લેજો, પરંતુ યોજના હેઠળ તેમના બેંક ખાતામાં જમા કરવામાં આવતા 1,500 રૂપિયાનું માસિક સ્ટાઇપેન્ડ યાદ રાખજો અને વફાદાર રહેજો.
આપણ વાચો: લાડકી બહિણ યોજના e-KYC: એક ભૂલ અને બેંક ખાતું ખાલી! અરજી ફોર્મ ભરતી વખતે ‘આ’ સાવચેતી રાખો
‘તમારા પતિઓ તરફથી પણ 100 રૂપિયા પણ મળતા નથી. દેવાભાઉ (ફડણવીસ)એ લાડકી બહેન યોજના શરૂ કરી અને તમને 1,500 રૂપિયા આપ્યા. જો તેઓ સત્તામાં નહીં હોય, તો આ પૈસા તમારા ખાતામાં આવવાનું બંધ થઈ જશે,’ એમ તેમણે સભામાં મહિલાઓને કહ્યું હતું.
246 મ્યુનિસિપલ કાઉન્સિલ અને 42 નગર પંચાયતોની ચૂંટણી બીજી ડિસેમ્બરે યોજાશે અને મતગણતરી ત્રીજી ડિસેમ્બરે થશે. 1.07 કરોડથી વધુ મતદારો 6859 સભ્યો અને 288 નગરાધ્યક્ષોને ચૂંટી કાઢશે.
આપણ વાચો: લાડકી બહિણ યોજનાનો ફટકો: ગણેશોત્સવમાં નહીં મળે ‘આનંદાચા શિધા’, શિવ ભોજન થાળી પણ બંધ થશે?
ગોરેએ વધુમાં કહ્યું હતું કે, ‘કોઈની પાસેથી પૈસા લો, તેનાથી કોઈ ફરક પડતો નથી, પણ તેમને મત ન આપો. જ્યારે તમે મત આપો, ત્યારે દેવાભાઉ દ્વારા આપવામાં આવેલા 1,500 રૂપિયા ભૂલશો નહીં. વફાદાર રહો.’
રક્ષા બંધન દરમિયાન બહેનોને પૈસા ભેટ આપનારા ભાઈઓ પણ આને માટે તેમની પત્નીઓની મંજૂરી લે છે, એમ પણ તેમણે કહ્યું હતું.
મહાયુતિના સાથી પક્ષો પર કટાક્ષ કરતા તેમણે કહ્યું હતું કે શાસક સરકારમાં કેટલાક પક્ષો દાવો કરે છે કે તિજોરી તેમની પાસે છે, પરંતુ અંતિમ મંજૂરી ભાજપ પાસે છે.
