મરાઠી-હિન્દી વિવાદ:રેલી માટે મંજૂરી આપવામાં આવી હતી, પરંતુ મનસેએ ચોક્કસ રૂટ માગ્યો હતો: ફડણવીસ…
(અમારા પ્રતિનિધિ તરફથી)
મુંબઈ: મહારાષ્ટ્રના મુખ્ય પ્રધાન દેવેન્દ્ર ફડણવીસે મંગળવારે કહ્યું હતું કે પડોશી મીરા ભાઈંદરમાં રેલી માટે પરવાનગી આપવામાં આવી હતી જેમાં મનસે નેતાઓ ભાગ લેવાની યોજના બનાવી રહ્યા હતા, પરંતુ પાર્ટીએ ચોક્કસ માર્ગ પરથી રેલી કાઢવાનો આગ્રહ રાખ્યો હતો જેના કારણે કાયદો અને વ્યવસ્થાને પડકાર મળ્યો હતો.મહારાષ્ટ્ર વિધાન ભવન પરિસરમાં આ મુદ્દે પત્રકારો સાથે વાત કરતા ફડણવીસે કહ્યું, ‘રેલી યોજવાનો કોઈ વિરોધ નથી. માગવામાં આવેલા રૂટ માટે પરવાનગી આપવી મુશ્કેલ હતી. પોલીસે તેમને રૂટ બદલવાની વિનંતી કરી હતી, પરંતુ આયોજકો ચોક્કસ રૂટ પર અડગ રહ્યા હતા.’
‘ટ્રાફિક જૅમ અથવા નાસભાગ જેવી પરિસ્થિતિનું નિર્માણ થઈ શકે એવી શક્યતા લાગે ત્યારે પોલીસ વૈકલ્પિક રૂટ આપવાનો પ્રયાસ કરે છે. આપણે લોકશાહીમાં છીએ, દરેકને રેલી યોજવાનો અધિકાર છે,’ એમ તેમણે કહ્યું હતું.
‘જો તેઓ યોગ્ય રૂટ માટે પરવાનગી માંગે છે, તો અમે આજે અને કાલે પણ પરવાનગી આપીશું. અન્ય એક સંગઠને પોલીસ દ્વારા મંજૂર કરાયેલ રૂટ પરથી રેલી યોજી હતી, પરંતુ આ લોકો ચોક્કસ રૂટ પર અડગ રહ્યા હતા,’ એમ તેમણે ઉમેર્યું હતું.
ઘટનાઓના ક્રમનો ઉલ્લેખ કરતાં, ફડણવીસે કહ્યું હતું કે સોમવારે મોડી રાત્રે સભા યોજવા માટે પરવાનગી માગવામાં આવી હતી, જે મંજૂર પણ કરવામાં આવી હતી.પરંતુ જ્યારે રેલીની વાત આવી ત્યારે તેઓ ચોક્કસ રૂટ માટે આગ્રહ કરી રહ્યા હતા. જો પરવાનગી આપવામાં આવી હોત, તો કાયદો અને વ્યવસ્થાની સ્થિતિ બગડી શકી હોત. છેલ્લા ઘણા વર્ષોથી, આપણે બધા રેલીઓ યોજીએ છીએ અને આ હંમેશાં પોલીસ સાથે પરામર્શ કર્યા પછી આયોજન કરવામાં આવે છે,’ એમ તેમણે ઉમેર્યું હતું.
દરમિયાન, થાણેના મીરા રોડનો ઉપયોગ નવા રાજકીય પ્રયોગોના પરીક્ષણ સ્થળ તરીકે થઈ રહ્યો હોવાના દાવાઓ પર ફડણવીસે કહ્યું હતું કે, મરાઠી વ્યક્તિનું ‘મોટું હૃદય’ હોય છે. દેશ પર હુમલા દરમિયાન, મરાઠી લોકો દેશની ચિંતા કરતા હતા અને સ્વાર્થી રહ્યા નહોતા. મરાઠી વ્યક્તિ છીછરા વિચારો ધરાવી શકતો નથી,’ એમ તેમણે કહ્યું હતું.
આપણ વાંચો : મહારાષ્ટ્રમાં ભાષા વિવાદ: ઉદ્ધવ ઠાકરેએ નિશિકાંત દુબે પર કર્યો વળતો પ્રહાર, ભાજપ પર ભાષાવાદના લગાવ્યા આક્ષેપો
