વિપુલ વૈદ્ય
મુંબઈ: સ્થાનિક સ્વરાજ્ય સંસ્થાની ચૂંટણીઓના પડઘમ વાગવાનો ઈંતજાર થઈ રહ્યો છે ત્યારે મહાયુતિમાં જ તણાવ જોવા મળી રહ્યો છે. રાજ્યના ઘણા જિલ્લાઓમાં, ચૂંટણીની પૃષ્ઠભૂમિમાં ગઠબંધનને લઈને શિવસેનામાં વિરોધ જોવા મળી રહ્યો છે. આ વિરોધ મુખ્યત્વે સ્થાનિક સંસ્થા અને મ્યુનિસિપલ ચૂંટણીઓની પૃષ્ઠભૂમિમાં શિવસેના દ્વારા યોજાયેલી જિલ્લા સ્તરીય સમીક્ષા બેઠકોમાં જોવા મળ્યો હતો.
ભાજપ દ્વારા થતી હેરાનગતિનું કારણે યુતિમાં કામ કરવા અંગે સેનાના નેતાઓમાં મતભેદ જોવા મળી રહ્યો છે. ભાજપના નેતાઓ ઘણી જગ્યાએ શિવસૈનિકોને ડરાવવાનો પ્રયાસ કરી રહ્યા હોવાથી, આત્મનિર્ભરતાનો નારો હવે શિવસૈનિકોમાં જોર પકડી રહ્યો છે. સૂત્રોએ માહિતી આપી છે કે જિલ્લાવાર બેઠકોમાં અહેવાલ પછી ગઠબંધન અંગે નિર્ણય લેવામાં આવશે.
ક્યા સ્થળે ક્યા કારણોસર યુતિ શક્ય નથી તેની વિગતો નીચે આપી છે.
આપણ વાંચો: સ્થાનિક સ્વરાજ્ય સંસ્થાની ચૂંટણીઓ: જિલ્લા પ્રમુખોની બેઠકમાં ભાજપથી ન ડરવાનો ઉદ્ધવનો હુંકાર
થાણે
થાણે એકનાથ શિંદેનો ગઢ માનવામાં આવે છે, બીજી તરફ પ્રધાન ગણેશ નાઈક અને વિધાનસભ્ય સંજય કેળકરે આત્મનિર્ભરતાનો નારો આપીને શિંદેને પડકાર ફેંક્યો છે. આ કારણે શિવસેનાના પદાધિકારીઓમાં નારાજગીનો માહોલ છે. ભાજપના નેતાઓના આ વલણને કારણે શિવસેનાએ પણ આત્મનિર્ભરતાની તૈયારી શરૂ કરી દીધી છે.
નવી મુંબઈ
નવી મુંબઈ મહાનગરપાલિકામાં ગણેશ નાઈકનું વર્ચસ્વ છે. જોકે, શિંદે અંગેના તેમના નિવેદનને કારણે, નવી મુંબઈમાં શિંદે અને ભાજપ વચ્ચેના સંબંધો અત્યંત વણસ્યા છે, તેથી બંને પક્ષોએ અહીં પણ અલગ-અલગ તૈયારીઓ શરૂ કરી દીધી છે.
કલ્યાણ-ડોંબિવલી
નગરપાલિકામાં ગણપત ગાયકવાડ દ્વારા કરવામાં આવેલી ગોળીબારની ઘટના બાદ, ભાજપ અને શિવસેના વચ્ચેના સંબંધો અત્યંત વણસ્યા છે. તેવી જ રીતે, એવું કહેવામાં આવી રહ્યું છે કે ભાજપ પ્રદેશ પ્રમુખ શિવસેના વિરુદ્ધ પગલાં લઈ રહ્યા છે અને હરીફોને પરોક્ષ રીતે મદદ કરી રહ્યા છે. ઉપરાંત, ભાજપ અહીં પણ આત્મનિર્ભરતાનો નારો આપી રહ્યું હોવાથી, અહીં પણ જોડાણની શક્યતાઓ ધૂંધળી છે.
મીરા-ભાઈંદર
આ મહાનગરપાલિકામાં ભાજપનું એક દાયકાથી વર્ચસ્વ છે. તેથી, અહીં પણ ભાજપ શિંદેની શિવસેનાને ઓછું મહત્ત્વ આપી રહ્યું છે. આ વર્ષે નગરપાલિકાની જવાબદારી રાજ્યના પરિવહન પ્રધાન પ્રતાપ સરનાઈકને સોંપવામાં આવી છે, અને અહીં પણ, ભાજપે સ્વબળની તૈયારી શરૂ કરી દીધી હોવાથી, શિવસેનાએ પણ સ્વતંત્ર પ્રયાસો શરૂ કર્યા છે.
ઉલ્હાસનગર
થોડા દિવસો પહેલા, ભાજપે ઉલ્હાસનગરમાં શહેરની સમસ્યાઓ પર આક્રમક વલણ અપનાવ્યું હતું. તેના કારણે, મહાયુતિમાં સંબંધો વણસ્યા છે. સ્થાનિક વિધાનસભ્ય કુમાર આયલાનીએ સીધા મ્યુનિસિપલ કમિશનરને આંદોલનની ચેતવણી આપી હતી. અહીં પણ શિવસેના સત્તામાં હતી. અહીં સાથી પક્ષના સાંસદ ડો. શ્રીકાંત શિંદેની તાકાત હોવા છતાં જે રીતે ભાજપ દ્વારા આક્રમક વલણ અપનાવવામાં આવ્યું છે તેનાથી અહીં યુતિમાં ભંગાણ અવશ્ય માનવામાં આવે છે.
આપણ વાંચો: સ્થાનિક સ્વરાજ્ય સંસ્થાની ચૂંટણીઓ પહેલાં છગન ભુજબળનો પ્રધાનમંડળમાં સમાવેશ
અંબરનાથ
ભાજપે અંબરનાથ શહેરની સમસ્યાઓ પર મ્યુનિસિપલ વહીવટને મૂંઝવણમાં રાખવાનું શરૂ કર્યું છે. અભિજીત કરંજુલેએ મ્યુનિસિપલ વિસ્તારમાં સ્ટ્રીટ લાઇટ, રસ્તા અને અન્ય સમસ્યાઓને આગળ ધરીને મ્યુનિસિપલ બંધ કરવાની ચેતવણી પણ આપી છે. અહીં પણ નગરપાલિકામાં શિવસેનાનું વર્ચસ્વ છે અને શિવસેનાને આડકતરી રીતે ફસાવવાનો આ પ્રયાસ ચાલી રહ્યો છે, તેથી અહીં ભાજપ અને શિવસેના વચ્ચે ટક્કર જોવા મળી શકે છે અને બંને અલગ અલગ ચૂંટણી લડશે એવા એંધાણ છે.
બદલાપુર
બદલાપુર શહેરમાં ભાજપના વિધાનસભ્ય કિસન કથોરે અને શિવસેનાના શહેર પ્રમુખ વામન મ્હાત્રે વચ્ચેનો વિવાદ વધુ તીવ્ર બની રહ્યો હોવાની ચર્ચા છે. વિધાનસભ્ય કથોરેએ પાલિકામાં ભ્રષ્ટાચારને મુદ્દે અધિકારીઓને સીધી ચેતવણી આપી છે. પાલિકાના ગેરવહીવટના પુરાવા ભાજપ જનતાને આપશે તેમ કહીને, કથોરેએ પાલિકામાં પ્રભુત્વ ધરાવતી શિવસેનાને આડકતરી રીતે સાણસામાં લેવાનો પ્રયાસ કર્યો હોવાનું માનવામાં આવી રહ્યું છે અને તેથી જ અહીં પણ યુતિમાં ભંગાણ પાક્કું માનવામાં આવે છે.
સાંગલી
સાંગલીમાં, એનસીપીની ટિકિટ પર ખાનપુર તાલુકામાંથી શિવસેનાના વિધાનસભ્ય સુહાસ બાબર સામે ચૂંટણી લડનારા વૈભવ પાટીલને ભાજપમાં પ્રવેશ આપવામાં આવ્યો છે. આ બાબતે શિવસેના અને ભાજપમાં સંઘર્ષના એંધાણ જોવા મળી રહ્યા છે. આગામી મનપાની ચૂંટણીમાં સફળતા મેળવવા માટે વૈભવ પાટીલને ભાજપેે જવાબદારી સોંપી છે અને આ સ્થિતિમાં હવે શિવસેના ભાજપ સાથે કામ કરવા તૈયાર નથી.
સાતારા
સાતારામાં પ્રધાન શંભુરાજ દેસાઈ સામે ચૂંટણી લડનારા સત્યજીત સિંહ પાટણકરને ભાજપમાં પ્રવેશ આપવા સામે નારાજગી પ્રવર્તી રહી છે. જ્યારે બંને પરિવારો ઘણા વર્ષોથી સામ સામે લડી રહ્યા છે ત્યારે તેમને ભાજપમાં પ્રવેશ આપવા પર નારાજગી છે. આ સ્થિતિમાં બંને સાથે મળીને કામ કરે તે અશક્ય માનવામાં આવે છે.
રાયગઢ
પ્રધાન ભરત ગોગાવલે સામે શિવસેના (યુબીટી)થી વિધાનસભા ચૂંટણી લડનારા સ્નેહલ જગતાપને એનસીપીમાં પ્રવેશ આપવામાં આવ્યા બાદ શિવસેના અને એનસીપી સામસામે લડી રહી છે. રાયગઢમાં એનસીપી સામે બળવો કરીને શિવસેનાના વિધાનસભ્ય મહેન્દ્ર થોર્વે સામે અપક્ષ ઉમેદવાર તરીકે ઉભા રહેલા સુધાકર ખરેને પ્રવેશ આપવામાં આવ્યા બાદ શિવસેના-એનસીપી વચ્ચેનો મુકાબલો ચરમસીમાએ પહોંચી ગયો છે.
નાશિક
નાસિકમાં ત્રણ પક્ષો, એનસીપી, શિવસેના અને ભાજપ વચ્ચે ખુલ્લેઆમ શીત યુદ્ધ ચાલી રહ્યું છે. ભુજબળ અને સુહાસ કાંદે વચ્ચે વિવાદ છે. આ ઉપરાંત, ભાજપ નગરપાલિકામાં સોથી વધુ બેઠકો જીતવાનું લક્ષ્ય રાખી રહ્યું છે.
જળગાંવ
ભાજપે શિવસેનાના પાચોરા વિધાનસભા વિધાનસભ્ય કિશોર અપ્પા પાટીલના હરીફ વૈશાલી સૂર્યનવશીને પ્રવેશ આપ્યો છે. માત્ર પ્રવેશ જ નહીં, પણ ભંડોળ પણ આપવામાં આવી રહ્યું હોવાથી, કિશોર અપ્પાએ ખુલ્લેઆમ કહ્યું છે કે કોઈ જોડાણ નહીં થાય. તેમણે એવી લાગણી પણ વ્યક્ત કરી છે કે ભાજપ અમને ખતમ કરવા માટે તૈયાર છે.
ધુળે
ધુળેમાં ભાજપના વિધાનસભ્ય અમરીશ પટેલ પાસે એકમાત્ર સત્તા છે. આવી સ્થિતિમાં, શિંદે જૂથ ત્યાં ખૂબ મજબૂત ન હોવાથી, શિવસેનાના પદાધિકારીઓને યોગ્ય સન્માન ન મળી રહ્યું હોવાથી અસંતોષનો સૂર જોવા મળી રહ્યો છે.
હિંગોલી
શિંદે સેનાના જિલ્લા પ્રમુખ અને વિધાનસભ્ય સંતોષ બાંગરે વસમત અને કળમનુરીમાં આયોજિત કાર્યક્રમમાં આત્મનિર્ભરતાનો નારો આપ્યો હતો. ભાજપના જિલ્લા પ્રમુખ અને ભૂતપૂર્વ વિધાનસભ્ય ગજાનન ઘુગેએ પણ સ્પષ્ટ કર્યું હતું કે જો મહાયુતિ નહીં થાય, તો અમે એકલા ચૂંટણી લડીશું.
નાંદેડ
નાંદેડમાં પણ ચિત્ર અલગ નથી. ભાજપના મિલિંદ દેશમુખ શિવસેનાના વિધાનસભ્ય બાલાજી કિનીકર સામે મેદાનમાં હતા. બાલાજી જીત્યા, પરંતુ સેનાના પદાધિકારીઓ હજુ પણ માને છે કે ભાજપ દ્વારા દેશમુખને લોજિસ્ટિક્સ પૂરું પાડવામાં આવી રહ્યું છે. આવી સ્થિતિમાં અહીં આગામી ચૂંટણીમાં યુતિ અશક્ય છે.
અહિલ્યાનગર
આ જિલ્લામાં શિવસેનાની બહુ તાકાત નથી, પરંતુ ભાજપ તેમની સાથે અપમાનજનક વર્તન કરી રહી હોવાનો ગુસ્સો છે. તેથી, યુતિમાં જોડાવા અંગે જિલ્લામાં મૂંઝવણ છે.
નંદુરબાર
નંદુરબારના શિવસેનાના વિધાનસભ્યે એક બેઠકમાં એવી ફરિયાદ કરી હતી કે ભૂતપૂર્વ જિલ્લા પ્રમુખ ભાજપ માટે કામ કરી રહ્યા છે, ત્યારબાદ અહીં પણ ભાજપ સાથેના સંબંધો તણાવપૂર્ણ હોવાની ચર્ચા છે.
