એનસીપી નેતા અમોલ મિટકરીએ આઈપીએસ અંજના કૃષ્ણાના દસ્તાવેજોની ચકાસણીની માંગ કરી

મુંબઈ : મહારાષ્ટ્રના નાયબ મુખ્ય પ્રધાન અજિત પવારનો એક મહિલા આઈપીએસ અધિકારીને ઠપકો આપતા અને ગેરકાયદે માટીના ખોદકામ સામેની કાર્યવાહી બંધ કરવાનો આદેશ આપતો વીડિયો વાઈરલ થયો છે. તેની બાદ એનસીપી નેતાએ આઈપીએસ અધિકારી અંજના કૃષ્ણાના દસ્તાવેજોની યુપીએસસી દ્વારા તપાસ કરવાની માંગ કરી છે.આ અંગે મહારાષ્ટ્ર વિધાન પરિષદના સભ્ય અમોલ મિટકરીએ શુક્રવારે યુપીએસસીના સચિવને પત્ર લખ્યો છે.

દસ્તાવેજોની વિગતવાર ચકાસણી કરવા વિનંતી કરી

અમોલ મિટકરીએ પત્રમાં લખ્યું છે કે , આઈપીએસ અધિકારી અંજના કૃષ્ણા દ્વારા રજુ કરવામાં આવેલા શૈક્ષણિક, જાતિ પ્રમાણપત્રો અને અન્ય દસ્તાવેજો પર આશંકા વ્યકત કરી છે. તેમણે યુપીએસસીને ને આ દસ્તાવેજોની વિગતવાર ચકાસણી કરવા વિનંતી કરી છે. તેમજ તેના પરિણામો જે તે વિભાગને મોકલવા પણ જણાવ્યું છે.

વેરિફીકેશનની પ્રકિયામાં પારદર્શિતા સુનિશ્ચિત કરવા પર ભાર

તેમણે આઈપીએસ અધિકારીની સર્ટીફિકેટ વેરિફીકેશનની પ્રકિયામાં પારદર્શિતા સુનિશ્ચિત કરવા પર ભાર મુક્યો છે. તેમણે કહ્યું કે આ તપાસ એટલા માટે જરૂરી છે તેનાથી કોઈ અનિયમિતતાની જાણ થઈ શકે. આ વિવાદ અજીત પવાર સાથે જોડાયેલા વાઈરલ વિડીયો બાદ પ્રકાશમાં આવ્યો છે. જેની બાદ અધિકારીના વર્તન પર સવાલ ઉઠયા છે.

શરૂઆતમાં પવારનો અવાજ ઓળખ્યો નહોતો

ઉલ્લેખનીય છે કે, મરાઠી ન્યૂઝ ચેનલો દ્વારા પ્રસારિત કરવામાં આવેલા આ વીડિયોમાં કરમાળાના સબ-ડિવિઝનલ પોલીસ અધિકારી અંજના કૃષ્ણા સ્થાનિક એનસીપી કાર્યકરના ફોન પર પવાર સાથે વાત કરતા દેખાય છે. તેણે શરૂઆતમાં પવારનો અવાજ ઓળખ્યો નહોતો.

પવારે ત્યાર બાદ પોલીસ અધિકારીને વીડિયો કોલ કર્યો હતો

પવારે ત્યાર બાદ પોલીસ અધિકારીને વીડિયો કોલ કર્યો હતો અને કથિત રીતે ગેરકાયદે ખોદકામ સામે કાર્યવાહી બંધ કરવા કડક સ્વરમાં આદેશ આપ્યો હતો. મુરુમ માટીનો ઉપયોગ રસ્તાના બાંધકામમાં થાય છે. આ દરમિયાન બાબા જગતાપ, નીતિન માલી, સંતોષ કાપરે, અન્ના ધાણે અને 15થી 20 અન્ય લોકો સામે ભારતીય ન્યાય સંહિતાની જાહેર સેવકને તેમની ફરજ બજાવવાથી રોકવા માટે હુમલો કરવો અથવા ગુનાહિત બળનો ઉપયોગ કરવો, ગેરકાયદેસર ભેગા થવું અને પર્યાવરણ સંરક્ષણ કાયદાની સંબંધિત કલમો હેઠળ એફઆઈઆર નોંધવામાં આવ્યો હતો, એમ કુર્દુવાડી પોલીસ સ્ટેશનના એક અધિકારીએ જણાવ્યું.

આ કેસના બંને વીડિયો વાઈરલ થયા

અધિકારીએ જણાવ્યું હતું કે, આ ઘટના 31 ઓગસ્ટે બની હતી જ્યારે મહેસૂલ વિભાગના અધિકારીઓ આઈપીએસ અધિકારી અંજલિ કૃષ્ણા સાથે ગેરકાયદે ખોદકામ સામે કાર્યવાહી કરવા માટે કાપરે પહોંચ્યા હતા. આરોપીઓએ કાર્યવાહીમાં અવરોધ ઉભો કરવાનો પ્રયાસ કર્યો હોવાનો આરોપ છે એમ તેમણે જણાવ્યું હતું. હવે આ કેસના બંને વીડિયો વાયરલ થયા છે.

આ પણ વાંચો…આઈપીએસ અંજના કૃષ્ણા સાથેના ઝઘડા અંગે અજિત પવારનો ખુલાસો