BMCની ચૂંટણી માટે નિયમમાં મોટા ફેરફાર: સરકારે જાહેર કર્યા નવા અનામત અને રોટેશનના નિયમ
(અમારા પ્રતિનિધિ તરફથી)
મુંબઈ: અર્બન ડેવલપમેન્ટ ડિપાર્ટમેન્ટએ નવ ઓક્ટોબરના રોજ જારી કરેલા એક જાહેરનામામાં મુંબઈ મહાનગર પાલિકાને રોટેશન મુજબ અનુસૂચિત જાતિ, અનુસૂચિત જનજાતિ અને પછાત વર્ગના મહિલાઓ માટે વોર્ડમાં નગરસેવકની બેઠકોના અનામતની ફાળવણી અંગેના નિયમો ઘડવાનો નિર્દેશ આપ્યો છે.
જાહેરનામામાં ફાળવણીની પદ્ધતિ સમજાવતા, પહેલા SC અથવા ST વસ્તીના ટકાવારીના આધારે વોર્ડને ઉતરતા ક્રમમાં ગોઠવવામાં આવશે, અને તે સમુદાયની સૌથી વધુ વસ્તી ધરાવતા વોર્ડથી શરૂ કરીને બેઠકો ફાળવવામાં આવશે.
સરકારે એ પણ સુનિશ્ચિત કર્યું છે કે અનામત બેઠકો આગામી ચૂંટણીઓ દરમિયાન રોટેશન માં થશે, જેથી દરેક વોર્ડને વારાફરતી પ્રતિનિધિત્વ મળે. આ પગલું બેઠક અનામત સંબંધિત અગાઉના તમામ આદેશો, નિયમો અને સૂચનાઓને બદલે છે.
વધુમાં, સૂચના મુજબ, જો અનુસૂચિત જાતિ (SC) અને અનુસૂચિત જનજાતિ (ST) માટેની બેઠકો એક જ વોર્ડમાં આવે છે, તો તે વોર્ડ વધુ વસ્તી ધરાવતી શ્રેણી માટે અનામત રાખવામાં આવશે.
બીજી શ્રેણીનું અનામત પછી વસ્તીના ઉતરતા ક્રમમાં આગામી વોર્ડમાં ખસેડવામાં આવશે. જોકે, જો બંને વોર્ડમાં સમાન વસ્તી હોય, તો અનામત અનુસૂચિત જનજાતિને જશે, કારણ કે તેમની વસ્તી સામાન્ય રીતે ચોક્કસ વિસ્તારોમાં કેન્દ્રિત હોય છે.
જ્યાં એક કરતાં વધુ વોર્ડમાં SC અથવા ST વસ્તીનું પ્રમાણ સમાન હોય, અને તે અનામત રાખવાની છેલ્લી બેઠકને લગતી હોય, તો પસંદ કરવાનો વોર્ડ લોટરી દ્વારા નક્કી કરવામાં આવશે.
SC અને ST માટે બેઠકોનું અનામત નક્કી થયા પછી, પછાત વર્ગના નાગરિકો (બેકવર્ડ ક્લાસ ઓફ સિટીઝન)માટે બેઠકો બાકીના વોર્ડમાંથી લોટરી દ્વારા ફાળવવામાં આવશે. આગામી ચૂંટણીમાં પછાત વર્ગના નાગરિકોને બેઠકો ફરીથી લોટરી દ્વારા ફાળવવામાં આવશે, જેમાં પાછલી ચૂંટણીમાં પછાત વર્ગના નાગરિકો માટે અનામત રાખેલા વોર્ડ અને વર્તમાન ચૂંટણીમાં SC અથવા ST માટે અનામત રાખેલા વોર્ડનો સમાવેશ થતો નથી. શક્ય હોય ત્યાં સુધી, આ અનામતોને પછીની ચૂંટણીઓમાં ફેરવવામાં આવશે જેથી સમય જતાં કોર્પોરેશનના તમામ વોર્ડ આવરી લેવામાં આવે.
સુધરાઈની ચૂંટણી જાન્યુઆરી, ૨૦૨૬ થી ગમે ત્યારે યોજાઈ શકે છે. સુધરાઇના નગરસેવકોનો કાર્યકાળના ૭ માર્ચ, ૨૦૨૨માં સમાપ્ત થયાના લગભગ ચાર વર્ષ પછી થશે ચૂંટણી થશે. હાલ સુધરાઇમાં કારભાર પ્રશાસક હેઠળ છે જે મ્યુનિસિપલ કમિશનર છે.
મુંબઈની ૨૦૧૧ ની જન ગણના મુજબ મુંબઈ ના આ વોર્ડ અનામત થઈ શકે એવો અંદાજ છે.
અનુસૂચિત જાતિ માં આ વોર્ડ જઈ શકે:
૯૩, ૧૧૮, ૧૩૩,૧૪૦,૧૪૧, ૧૪૬, ૧૪૭, ૧૫૧,૧૫૨, ૧૫૫,૧૮૩,૧૮૬, ૧૮૯,૧૯૯, ૨૧૫
અનુસૂચિત જન જાતિ માં આ વોર્ડ જઈ શકે:
૫૩,૫૯
આ પણ વાંચો…મુંબઈમાં કબૂતરખાનાનો વિવાદ: હાઈ કોર્ટના આદેશ બાદ BMCએ શરૂ કરી નવા સ્થળોની શોધ
