ઇડી દ્વારા જપ્ત કરાયેલી પ્રોપર્ટી લૉ ટ્રિબ્યુનલ મુક્ત કરી શકે: હાઇ કોર્ટ

મુંબઈ: બોમ્બે હાઈ કોર્ટે કહ્યું છે કે જો ઈન્સોલ્વન્સી એન્ડ બેન્કરપ્સી કોડ 2016માં દર્શાવેલ શરતો પૂરી થાય તો નેશનલ કંપની લો ટ્રિબ્યુનલ (એનસીએલટી) એન્ફોર્સમેન્ટ ડિરેક્ટોરેટ (ઈડી) દ્વારા જોડાયેલ મિલકતોને મુક્ત કરી શકે છે. એનસીએલટીને કોર્પોરેટ દેવાદાર સામે કાર્યવાહીનો અંત કરવાની અને ઇડી જેવી એજન્સીઓ દ્વારા તેની મિલકતો પરની એટેચમેન્ટ ઉઠાવવાની સત્તા છે.
જસ્ટિસ બી.પી. કોલાબાવાલા અને સોમશેખર સુંદરેસનની બનેલી ડિવિઝન બેન્ચે જણાવ્યું હતું કે આઈબીસીની કલમ 31 અને કલમ 32એ હેઠળ, વિધાનમંડળનો એવો સ્પષ્ટ આદેશ છે કે, એક વખત કલમ 32એ હેઠળ રિઝોલ્યુશન પ્લાન મંજુર થઇ જાય તો એનસીએલટી પાસે ઇડીને કોર્પોરેટ દેવાદારની મિલકતો પરથી તેની એટેચમેન્ટ હટાવવાનો નિર્દેશ આપવાની સત્તા છે. બેન્ચે ઇડી દ્વારા દાખલ કરેલી અરજીને ફગાવી દેતી વખતે આ ટિપ્પણી કરી હતી. ઇડી એ એનસીએલટી મુંબઈના 28 એપ્રિલ, 2023ના આદેશને પડકારવા હાઈ કોર્ટનો સંપર્ક કર્યો હતો, જેમાં ડીએસકે સધર્ન પ્રોજેક્ટ્સ પ્રાઈવેટ લિમિટેડની કાર્યવાહીનો અંત જાહેર કરવામાં આવ્યો હતો અને તેની 32.51 કરોડની મિલકતો મુક્ત કરી હતી, જે અગાઉ એજન્સી દ્વારા અટેચ કરવામાં આવી હતી. એજન્સીએ દલીલ કરી હતી કે પ્રિવેન્શન ઓફ મની લોન્ડરિગ એક્ટ, 2002 એટેચમેન્ટના ઓર્ડર સામે અપીલની જોગવાઈ કરે છે. એજન્સીએ ભારપૂર્વક જણાવ્યું હતું કે ટ્રિબ્યુનલે હૈદરાબાદના રહેવાસી શિવ ચરણ, પુષ્પલતા બાઈ અને ભારતી અગ્રવાલને ઓર્ડર પોતે જ જારી કરવાને બદલે પ્રિવેન્શન ઓફ મની લોન્ડરિગ એક્ટ હેઠળ અપીલ દાખલ કરવાની સૂચના આપવી જોઈએ. તેમ ન કરીને એનસીએલટીએ, પ્રિવેન્શન ઓફ મની લોન્ડરિગ એક્ટ ની જોગવાઈઓને બિનઅસરકારક બનાવી. ડીએસકે સધર્ન પ્રોજેક્ટ્સ માટેના રિઝોલ્યુશન પ્લાનને એનસીએલટી દ્વારા 17 ફેબ્રુઆરી, 2023ના રોજ સ્વીકારવામાં આવ્યો હતો.
જો કે, હાઈ કોર્ટે દલીલને એમ કહીને નકારી કાઢી હતી કે આઈબીસીની કલમ 31(1) હેઠળ, રિઝોલ્યુશન પ્લાન મંજૂર કરતી વખતે, એનસીએલટીએ ખાતરી કરવી જોઈએ કે યોજના અસરકારક રીતે અમલમાં આવી શકે.