વાનખેડેની ટેસ્ટ માટેની ઑનલાઇન ટિકિટોનું વેચાણ આ તારીખે શરૂ થશે…જાણો સીઝન પાસના ભાવ…

મુંબઈ: આગામી પહેલી નવેમ્બરથી વાનખેડે સ્ટેડિયમમાં ભારતની ન્યૂ ઝીલૅન્ડ સામે સિરીઝની ત્રીજી અને છેલ્લી ટેસ્ટ શરૂ થશે અને એ માટેની ઑનલાઇન ટિકિટોનું વેચાણ શુક્રવાર, 18મી ઑક્ટોબરે શરૂ થશે.

મંગળવારે મુંબઈ ક્રિકેટ અસોસિયેશન (એમસીએ)ની ઍપેક્સ કાઉન્સિલની મીટિંગ બાદ ટિકિટના વેચાણની તારીખ જાહેર કરવામાં આવી હતી.

આ ટેસ્ટના ફ્રી પાસ બૃહદ મુંબઈ મહાનગર પાલિકાની સ્કૂલના બાળકોને તેમ જ હૅરિસ શીલ્ડ તથા જાઇલ્સ શીલ્ડ ટૂર્નામેન્ટોની સેમિ ફાઇનલિસ્ટોને આપવા જોઈએ એવી એમસીએના પ્રમુખ અજિંક્ય નાઇકની દરખાસ્તને ઍપેક્સ કાઉન્સિલે સર્વાનુમતે સંમતિ આપી હતી.

આ પહેલાં ભારત અને ન્યૂ ઝીલૅન્ડની ટીમ વચ્ચે વાનખેડેમાં ડિસેમ્બર, 2021માં મૅચ રમાઈ હતી.

સામાન્ય જનતા માટેના નોર્થ સ્ટૅન્ડ, સચિન તેન્ડુલકર સ્ટૅન્ડ તેમ જ વિજય મર્ચન્ટ સ્ટૅન્ડના સીઝન પાસનો ભાવ 1,500 રૂપિયા રહેશે. સુનીલ ગાવસકર સ્ટૅન્ડનો ભાવ 325 રૂપિયા (ઈસ્ટ લોઅર) અને 625 રૂપિયા (ઈસ્ટ અપર) રહેશે.