કબૂતરખાનાઓને સુપ્રીમ કોર્ટમાં રક્ષણ નહીં: સરકાર હવે શું કરશે? ફડણવીસે કબૂતરોના રક્ષણની યોજના જાહેર કરી

(અમારા પ્રતિનિધિ તરફથી)
મુંબઈ: સુપ્રીમ કોર્ટે કબૂતરખાનાઓ બંધ કરવાના બોમ્બે હાઈકોર્ટના નિર્ણયને સમર્થન આપ્યું છે. આ સંદર્ભમાં અરજી ફગાવી દેવામાં આવ્યા બાદ રાજ્ય સરકાર હવે શું કરશે? એવી ઈંતેજારી બઘાને થઈ રહી છે, ખાસ કરીને અબોલ કબૂતરની ચિંતા થાય છે.

મુંબઈ મ્યુનિસિપલ કોર્પોરેશન દ્વારા કબૂતરખાનાઓ પર લાદવામાં આવેલા પ્રતિબંધને મુંબઈ હાઈકોર્ટે સમર્થન આપ્યું છે. હાઈકોર્ટે સરકારને આ સંદર્ભમાં નિષ્ણાતોની સમિતિ નિયુક્ત કરવા પણ કહ્યું. દરમિયાન, આ કોર્ટના આદેશને સુપ્રીમ કોર્ટમાં પડકારવામાં આવ્યો હતો. સુપ્રીમ કોર્ટે બોમ્બે હાઈકોર્ટના નિર્ણયને માન્ય રાખ્યો હતો અને દખલ કરવાનો ઇનકાર કર્યો હતો. કાનૂની દાવપેચમાં ફસાયેલા કબૂતરખાનાઓ અંગે સરકાર હવે શું કરશે? એવી ચર્ચા શરૂ થઈ ગઈ છે, ત્યારે રાજ્યના મુખ્યપ્રધાન દેવેન્દ્ર ફડણવીસે આ અંગે પોતાનો અભિપ્રાય વ્યક્ત કર્યો છે.

ચોમાસા સત્રમાં કબૂતરખાનાઓનો મુદ્દો ઉઠાવવામાં આવ્યો હતો અને આ મુદ્દો ચર્ચાના કેન્દ્રમાં આવ્યો હતો. વિધાનસભ્યોએ કબૂતરખાનાઓ બંધ કરવાની માંગ કર્યા પછી, મુંબઈ મહાનગરપાલિકાએ મુંબઈમાં કબૂતરખાનાઓ બંધ કરી દીધા હતા અને વિવાદ શરૂ થયો હતો. વિવાદ વધ્યો અને મામલો કાનૂની દાવપેચમાં ફસાઈ ગયો.

કબૂતરખાનાઓ અંગે રાજ્ય સરકારની આગામી યોજના શું છે?

સુપ્રીમ કોર્ટે બોમ્બે હાઈકોર્ટના નિર્ણયને પડકારતી અરજી ફગાવી દીધી હતી. ન્યાયાધીશ જે.કે. મહેશ્વરી અને વિજય બિશ્નોઈની બેન્ચે આ મામલે દખલ કરવાનો ઇનકાર કર્યો હતો અને અરજદારોને ફરીથી હાઈકોર્ટનો સંપર્ક કરવાની મંજૂરી આપી હતી.

સુપ્રીમ કોર્ટે અરજી ફગાવી દીધા પછી, મુખ્યપ્રધાન દેવેન્દ્ર ફડણવીસે કહ્યું, “ઠીક છે. કોર્ટનો આદેશ ગમે તે હોય, અમે તેનું પાલન કરીશું. અમે એ પણ પ્રયાસ કરીશું કે હવે કેટલાક લોકોની લાગણીઓ આ સાથે સુસંગત થાય; તેથી જો મુંબઈના નિર્જન ભાગ… સંજય ગાંધી રાષ્ટ્રીય ઉદ્યાન અથવા આવા વિસ્તારોને વન વિભાગના નિયમોમાં સમાવીને આવી ખોરાકની વ્યવસ્થા પૂરી પાડી શકાય, તો અમે તેના પર પણ વિચાર કરી શકીએ છીએ,” ફડણવીસે કહ્યું.

મુંબઈ હાઈકોર્ટે કહ્યું હતું કે કબૂતરખાના બંધ કરવાનો નિર્ણય મુંબઈ મ્યુનિસિપલ કોર્પોરેશનનો હતો અમે આવો આદેશ આપ્યો નથી. અમે ફક્ત મનપાના નિર્ણય પર સ્ટે આપવાનો ઈનકાર કર્યો હતો.

આપણ વાંચો:  સવારે ફક્ત બે કલાક ચણ નાખવાની પરવાનગી આપવાની માગણી