(અમારા પ્રતિનિધિ તરફથી)
મુંબઈ: પ્રભાદેવીમાં આવેલા ૧૨૫ વર્ષથી પણ વધુ જૂના એલફિસ્ટન બ્રિજને શુક્રવારે મોડી રાતથી વાહન વ્યવહાર માટે બંધ કરી દેવામાં આવ્યો છે અને મુંબઈ મેટ્રોપોલિટન રિજન ડેવલપમેન્ટ ઓથોરિટી દ્વારા તેને તોડી પાડવાનું કામ પણ ચાલું કરી દેવામાં આવ્યું છે. બ્રિજને બંધ કરવાની સાથે જ આ બ્રિજ પર દોડનારી બેસ્ટ ઉપક્રમની બસના રૂટને ડાઈવર્ટ કરી દેવામાં આવ્યા છે, જેમાં એલફિન્સ્ટન બ્રિજ પર દોડનારી એ-૧૬૨ અને ૧૬૮ નંબરની બસ હવે વાયા કરી રોડ બ્રિજ પરથી દોડશે.
બસનો રૂટ મડકે બુવા ચોક-ડૉ.બાબાસાહેબ આંબેડકર રોડ-કૃષ્ણા દેસાઈ ચોક (ભારત માતા), મહાદેવ પાલવ રોડ(કરી રોડ બ્રિજ)- એન.એમ.જોશી રોડ- દિપક સિનેમા માર્ગે દોડશે. એ-૧૭૭ નંબરની બસ હવે મડકે બુવા ચોકથી આગળ હિંદ માતા સિનેમાં સુધી દોડાવવામાં આવશે. ૨૦૧ નંબરની બસને પરેલ એસટી ડેપો અને સંત રોહિદાસ ચોક પર ડાઈવર્ટ કરી દેવામાં આવી છે.
