મુંબઈ: નાગપાડા વિસ્તારમાં નામાંકિત મોબાઇલ કંપનીઓની ડુપ્લિકેટ એસેસરીઝ તથા પેનડ્રાઇવ અને મેમરી કાર્ડ વેચતી દુકાનો પર પોલીસે રેઇડ પાડી હતી અને 2.54 કરોડ રૂપિયાની મતા જપ્ત કરી હતી, એમ અધિકારીએ જણાવ્યું હતું.
નાગપાડા પોલીસ સ્ટેશનની હદમાં લકડા બજાર તેમ જ શુકલાજી સ્ટ્રીટ ખાતે આવેલી દુકાનોમાં નામાંકિત મોબાઇલ કંપનીઓની ડુપ્લિકેટ એસેસરીઝ ઉપરાંત પેનડ્રાઇવ અને મેમરી કાર્ડ વેચવા માટે સંગ્રહ કરી રાખવામાં આવ્યાં છે.
આપણ વાંચો: Nita Ambaniની કરોડોની ડાયમંડ રિંગ અને અંબોડામાં 20 કેરેટની ડાયમંડ એસેસરીઝ, કિંમત એટલી કે…
દુકાનદારો સોશિયલ મીડિયા પર જાહેરાત આપીને ડુપ્લિકેટ એસેસરીઝ મોટા પ્રમાણમાં લોકોને વેચી રહ્યા છે, એવી માહિતી ક્રાઇમ બ્રાન્ચના સીબી ક્ધટ્રોલને આધારભૂત સૂત્રો પાસેથી મળી હતી, જેને પગલે કાર્યવાહી કરવાનું નક્કી કરાયું હતું.
દરમિયાન આ અંગે ખાતરી કર્યા બાદ પોલીસની બે ટીમ તૈયાર કરવામાં આવી હતી અને બંને ટીમે બુધવારે ઉપરોક્ત દુકાનો પર રેઇડ પાડી હતી. રેઇડ દરમિયાન દુકાનમાંથી ડુપ્લિકેટ એસેસરીઝ તેમ પેનડ્રાઇવ અને મેમરી કાર્ડનો જથ્થો મળી આવ્યો હતો.
પોલીસે દુકાનોમાંથી 2.54 કરોડ રૂપિયાની મતા જપ્ત કરીને ત્રણ જણને તાબામાં લીધા હતા. દરમિયાન કંપનીના પ્રતિનિધિએ આ પ્રકરણે નાગપાડા પોલીસ સ્ટેશનમાં ફરિયાદ નોંધાવી હતી, જેને આધારે કોપીરાઇટ એક્ટ હેઠળ ગુનો દાખલ કરવામાં આવ્યો હતો.
