અકોલાના ખેડૂતોને સરકારી પાક વીમા યોજના હેઠળ નજીવી રકમ મળતા ખેડૂતો નારાજ; આ ‘મજાક’ છે
મુંબઈ: મહારાષ્ટ્રના અકોલા જિલ્લાના કેટલાક ગામડાઓના ખેડૂતોએ ભારે વરસાદને કારણે થયેલા પાકના નુકસાન માટે કેન્દ્રીય વીમા યોજના હેઠળ વળતર તરીકે રૂ. ૩ અને રૂ. ૨૧ જેટલું નજીવું વળતર મળ્યું હોવાનો દાવો કર્યો હતો, અને આ સહાયને તેમની દુર્દશાનું “અપમાન” અને “મજાક” ગણાવી હતી.
સપ્ટેમ્બરમાં થયેલા અતિ વરસાદને કારણે અકોલા જિલ્લામાં સોયાબીન, કપાસ અને મગના પાકને વ્યાપક નુકસાન થયું છે. રાજ્ય સરકારે ખાતરી આપી હતી કે દિવાળી પહેલા અસરગ્રસ્ત ખેડૂતોને નાણાકીય રાહત પૂરી પાડવામાં આવશે.
આપણ વાંચો: પૂરગ્રસ્ત ખેડૂતો માટે મહારાષ્ટ્ર સરકારનું રૂ. 31,628 કરોડનું વળતર પેકેજ
ખેડૂતોના જણાવ્યા મુજબ, તેમણે વળતરની પ્રક્રિયા માટે મહેસૂલ અધિકારીઓને તેમના જમીન રેકોર્ડ, આધાર અને બેંક વિગતો સહિત તમામ જરૂરી દસ્તાવેજો સબમિટ કર્યા હતા. સરકાર પાસે ભંડોળ ઉપલબ્ધ હોવા છતાં ભંડોળ ટ્રાન્સફરમાં વિલંબ થયો હતો. કેટલાક લોકોએ સ્થાનિક મહેસૂલ કર્મચારીઓ દ્વારા ઔપચારિકતાઓ પૂર્ણ કરવામાં બેદરકારીનો પણ આરોપ લગાવ્યો હતો.
પ્રધાનમંત્રી ફસલ બીમા યોજના હેઠળ, વળતરની રકમ સીધી ખેડૂતોના બેંક ખાતામાં જમા કરવામાં આવે છે, પરંતુ ઘણા કિસ્સાઓમાં ૩ રૂપિયા થી ૨૧.૮૫ ની વચ્ચે રકમ જમા કરવામાં આવી હતી.
આપણ વાંચો: Budget 2025: સરકાર આ વખતે લેશે પંદર લાખ કરોડ રુપિયાની લોન…
વળતર તરીકે નજીવી રકમ મળવાથી ગુસ્સે ભરાયેલા, દિનોડા, કાવસા અને કુતાસા ગામના ખેડૂતોએ જિલ્લા કલેક્ટરની કચેરી ખાતે વિરોધ પ્રદર્શન કર્યું, તે દરમિયાન તેમણે કલેક્ટરને ચેક આપીને રકમ પરત કરી હતી.
યુથ કોંગ્રેસના પ્રવક્તા કપિલ ધોકે કહ્યું કે, “જો તમે ખેડૂતનું સન્માન ન કરી શકો, તો ઓછામાં ઓછું તેમનું અપમાન તો ન કરો. આ સહાય નહીં પણ મજાક છે.”
ખેડૂતોએ માંગ કરી છે કે સરકાર વળતરના આંકડાઓની સમીક્ષા કરે અને વાસ્તવિક નુકસાનના મૂલ્યાંકનના આધારે વાજબી ચુકવણીની જાહેરાત કરે. તેમણે અધિકારીઓને પાકના નુકસાનનું વાસ્તવિક મૂલ્યાંકન કરવા અને અસરગ્રસ્ત ખેડૂતોને તાત્કાલિક અને પૂરતી રાહત સુનિશ્ચિત કરવા વિનંતી કરી છે. પીટીઆઈ
