મુખ્ય પ્રધાન ઓનલાઈન ભૂૂમિપૂજન કરશે
(અમારા પ્રતિનિધિ તરફથી)
મુંબઈ: મુંબઈ સહિત દેશ-વિદેશના પર્યટકો માટે પર્યટનનું એક નવું આકર્ષણ ઉપલબ્ધ થવાનું છે. મુંબઈ મહાનગરપાલિકા દ્વારા મુલુંડ (વેસ્ટ) પરિસરના નાહુરમાં એક્ઝોટિક બર્ડ પાર્ક (વિદેશી પક્ષી ઉદ્યાન) ઊભું કરવામાં આવી રહ્યું છે. આંતરરાષ્ટ્રી દરજ્જાના આ પક્ષીગૃહનું ભૂમિપૂજન મુખ્ય પ્રધાન દેવેન્દ્ર ફડણવીસના શુભહસ્તે રવિવારના સાંજે ઓનલાઈન કરવામાં આવવાનું છે.
સુધરાઈએ નાહુરમાં એક્ઝોટિક બર્ડ પાક બનાવી રહી છે. આ પાર્કમાં સ્કાલૅટ મકાઉ, ટોકો ટુકાન, હંસ, શાહમૃગ, ગલાહ કૉકૅટૂ, એક્લેક્ટસ પોપટ, સન કૉનૂર, ગોલ્ડન કૉનૂર, સેનેગર પોપટ, જાર્ડિન પોપટ, સિલ્વર ફીઝંટ જેવી તેજસ્વી અને દુર્લભ પ્રજાતિઓ હશે, જેમાં સ્ટેનલેસ સ્ટીલ ટેન્સાઈલ વાયર મેશથી કુદરતી લાગે તે મુજબના ઘર બનાવવામાં આવવાના છે. આ પ્રોજેક્ટમાં બગીચો, તળાવ, પક્ષીઓ માટે ઘર, વાડો અને કૃત્રિમ રોકવર્ક પણ ઊભું કરવામાં આવવાનું છે. આ પ્રોજેક્ટમાં પશુચિકિત્સા હૉસ્પિટલ, ક્વોરન્ટાઈન ઝોન સહિત અન્ય સુવિધા પણ હશે. પર્યટકો માટે બર્ડ શો, અંડરગ્રાઉન્ડ પાર્કિંગ, એવી સિસ્ટમ, ઈકો ફેન્ડ્રલી લાઇટિંગની સિસ્ટમ વગેરે પણ હશે.
પાલિકાના કબજામાં રહેલી લગભગ ૧૭,૧૩૯.૬૪ ચોરસ મીટર ક્ષેત્રફળની જગ્યામાંથી ૧૦,૮૫૯ ચોરસ મીટર ક્ષેત્રફળની જગ્યા પર વિદેશી પક્ષીઓ માટે બર્ડ પાર્ક બનાવવામાં આવવાનું છે. બર્ડ પાર્કમાં ટિકીટ ઘર, શૌચાલય, અંડરગ્રાઉન્ડ પાર્કિંગ જેવી સુવિધા પણ અહીં ઉપલબ્ધ હશે. આ બર્ડ પાર્કને કારણે પક્ષી તથા પ્રાણી અને પર્યાવરણ વિષયમાં લોકોમાં જાગરૂકતા આવશે. તેમ જ પાલિકાની આવકમાં પણ વધારો થશે. બર્ડ પાર્કનું બાંધકામ વીરાતા જિજાબાઈ ભોસલે વનસ્પતિ ઉદ્યાન અને પ્રાણીસંગ્રહાલયમાં બાંધવામાં આવલે બર્ડપાર્ક જેવું હશે.
નાહુરના આ વિદેશી પક્ષી ઉદ્યાનમાં પક્ષીઓ માટે ૨૪ અલાયદા રહેઠાણ પ્રસ્તાવિત છે. વિશ્ર્વભરના દુર્લભ અને રંગબેરંગી પક્ષીઓ અહીં જોવા મળશે. પક્ષીઓને નૈસર્ગિંક ઘરનો અનુભવ થાય તે મુજબ અહીં વ્યવસ્થા કરવામાં આવવાની હોવાનું પાલિકાએ જણાવ્યું હતું.
મુખ્ય પ્રધાન રવિવારે ઓનલાઈન બર્ડપાર્કનું ભૂમિપૂજન કરશે. એ સાથેજ મુલુંડ વેસ્ટમાં બાંધવામાં આવેલી શ્રીમતી મનસાદેવી તુલસીરામ અગ્રવાલ જનલર હૉસ્પિટલની નવી બિલ્ડિંગનું લોકાપર્ણ પણ કરશે.
આપણ વાંચો: પાલિકાની ‘સ્વચ્છતા મંથન’ સ્પર્ધા
