વિશેષ -ડી. જે. નંદન
ફિલ્મ ઇઝાઝતના એક ગીતમાં કંઇક આવા બોલ છે –
મેરા કુછ સામાન તુમ્હારે પાસ પડા હૈ
સાવન કે કુછ ભીગે ભીગે દિન રખે હૈ
ઔર મેરે એક ખત મે લિપટી રાત પડી હૈ
વો રાત બુજા દો, મેરા સામાન લૌટા દો….
પણ વાસ્તવમાં, ફિલ્મસ્ટારો શ્રાવણના ભીના દિવસો કે પત્રોમાં લપેટાયેલી એક રાત આપવા માટે પછતાવો નથી કરતા, પરંતુ પોતાના એક્સને આપેલી લાખો કરોડોની ભેટ માટે પછતાય છે, જે ભાવુકતામાં આવીને આપી હતી એમ વિચારીને કે જન્મો જન્મ સાથે રહેવાનું છે. પરંતુ બંનેને સાથે ફાવતું નથી અને થોડા દિવસોમાં બંને અલગ થઈ જાય છે. આ સમયે ફિલ્મ સ્ટાર્સને આપવામાં આવેલી પોતાની ભેટ સોગાદો યાદ આવે છે. પરંતુ મોટા ભાગના સ્ટાર્સ મન મારીને રહી જાય છે. જો કે, એવા ઘણા લોકો છે જેઓ કોઈ પણ ખચકાટ વિના નિર્લજજતાથી તેમની ભેટો માગી લે છે અને ઘણા લોકો જાહેરમાં તેનો ઢંઢેરો પણ પીટે છે.
સલમાન અને જેકલીન ફર્નાન્ડિસની મિત્રતા જગજાહેર છે. એવું માનવામાં આવે છે કે સલમાને જેકલીનને બાંદ્રામાં ૧ બીએચકે ફ્લેટ અને ઓડી કાર ગિફ્ટ કરી છે. જો કે તેણે ક્યારેય તેની પાસેથી તે પાછું માગ્યું નથી, પરંતુ ઘણી વખત તે લોકો સાથે વાત કરતી વખતે તેનો ઉલ્લેખ કરે છે અથવા તેના લોકો તેનો ઉલ્લેખ કરતા રહે છે, તેથી જ આજે ઇન્ડસ્ટ્રીમાં અને બહારના લોકો પણ સલમાનને જેકલીન ફર્નાન્ડીઝને આપેલી ગિફ્ટ વિશે જાણે છે. એ જ રીતે શાહરુખ ખાને અભિષેક બચ્ચનને હાર્લી ડેવિડસન મોટર બાઈક ભેટમાં આપી હતી, ફરાહ ખાનને એક કરોડની કિંમતની એક મર્સિડીઝ બેન્ઝ અને રા-વનની ટીમને એક કરોડની પાંચ બીએમડબલ્યૂ કાર ગિફ્ટમાં આપી હતી. આ કાર મેળવનારાઓમાં રજનીકાંત, અર્જુન રામપાલ અને અનુભવ સિન્હા જેવાં નામો ગણવામાં આવે છે. જો કે, જેમણે તેમને પ્રાપ્ત કરી છે, તેઓએ ક્યારેય જાહેરમાં તેનો ઉલ્લેખ પણ કર્યો નથી, પરંતુ બોલીવૂડમાં જે પણ આ વાત સાંભળે છે તે બધા આશ્ર્ચર્યચકિત થઈ જાય છે અને વિચારે છે કે કોઈ વ્યક્તિ કોઈને આટલી મોંઘી ભેટ કેવી રીતે આપી શકે?
એક તરફ, ઘણા પ્રેમીઓ બ્રેકઅપ પછી તેમના એક્સને આપવામાં આવેલી ભેટોને કારણે અસ્વસ્થ અને તણાવ અનુભવે છે, જ્યારે ઘણા લોકો બ્રેકઅપ પછી પણ તેમના પ્રેમીઓ દ્વારા આપવામાં આવેલી આવી ગિફ્ટને હંમેશા સાચવીને રાખે છે. પ્રશ્ર્ન એ છે કે એક્સને આપવામાં આવેલી ગિફ્ટ અંગે કોઈએ વાંધો કે ટીકા કરવી જોઈએ? તમને યાદ હશે કે થોડાં વર્ષો પહેલા, જ્યારે રિતિક રોશન અને કંગના રનૌત વચ્ચેના બ્રેકઅપના સમાચાર દરેક જગ્યાએ વહેતા હતા અને સોશિયલ મીડિયાથી લઈને ટીવી ચેનલો સુધી, બંને એકબીજાને આપેલી ભેટની ચર્ચા કરતા હતા, ત્યારે સોશિયલ મીડિયાથી લઈને પારંપરિક મીડિયા સુધી એ પ્રશ્ર્ન ઉઠાવવામાં આવ્યો હતો કે શું બ્રેકઅપ પછી કોઈના ભૂતપૂર્વને આપવામાં આવેલી ભેટો પર કોઈ રીતે ચર્ચા કરવી જોઈએ? માત્ર મનોવૈજ્ઞાનિકો જ નહીં પરંતુ કાનૂની નિષ્ણાતો પણ કહે છે કે તમે એક વાર કોઈને ગિફ્ટ આપો પછી તે તમારી નથી રહેતી, જે વ્યક્તિને તે આપવામાં આવે છે, તેની થઈ જાય છે.
આ કોઈ સામાજિક રીતે પરંપરાગત લગ્ન નથી જ્યાં જો તે આગળ ન વધે તો બંને પક્ષો એકબીજાને આપેલી ભેટ પરત કરે. જો કે, જ્યારે જ્હોન અબ્રાહમ અને બિપાશા બાસુનું બ્રેકઅપ થયું ત્યારે ફિલ્મ વર્તુળોમાં એવી ચર્ચા હતી કે જ્હોન બિપાશાને આપેલી કરોડોની ગિફ્ટ પાછી લેશે. પરંતુ આ બ્રેકઅપ પછી જ્હોને ક્યારેય તેની સાથે ખુલીને ચર્ચા કરી નથી. જ્યારે પ્રીતિ ઝિન્ટા અને નેસ વાડિયાની તુ તુ મૈં મૈં, લોકોએ જાહેરમાં સાંભળી છે. એ જ રીતે, કંગના અને રિતિકના બ્રેકઅપ પછી પણ, ભેટોની વાતો ચારે બાજુ વહેતી રહી છે. આજે જ નહીં પરંતુ પહેલાના જમાનામાં પણ જ્યારે સંબંધો તૂટવા પર કેટલાક સ્ટાર્સ ગિફ્ટ્સ અંગે મૌન રહ્યા હતા, તો કેટલાક સ્ટાર્સ વિના સંકોચ બધું બિંદાસ્ત કહી દેતા. રાજેશ ખન્ના અને અંજુ મહેન્દ્રની સ્ટોરી ખૂબ જ ફેમસ છે. કહેવાય છે કે જ્યારે અંજુ મહેન્દ્ર અને રાજેશ ખન્નાનું બ્રેકઅપ થયું ત્યારે અખબારો અને મેગેઝિનોમાં રાજેશ ખન્નાએ અંજુ મહેન્દ્રને આપેલી ભેટ વિશે ચર્ચાઓ થતી હતી અને ગુપ્ત રીતે એવી કાનાફૂસી પણ થઈ હતી કે રાજેશ ખન્ના પોતે આ સમાચાર મીડિયાને આપતા હતા.
ઘણી વખત બોલીવૂડની પ્રખ્યાત હસ્તીઓ વચ્ચે ગિફ્ટ્સ વિશે કાનાફૂસી ચાલતી રહે છે. લોકો તેના પર વાતો બનાવ્યા કરે છે, પરંતુ જ્યારે પોતે બીજાને ગિફ્ટ આપવા અને લેવા વિશે વાત થાય છે, ત્યારે આ બાબતે તેઓ ક્યારેય બોલતા નથી. ઉદાહરણ તરીકે, બોલીવૂડની ગોસિપ માટેની સૌથી ફેવરિટ જોડી અમિતાભ-રેખા વિશે એવું પણ કહેવાય છે કે બંનેએ એકબીજાને મોંઘીદાટ ભેટ આપી છે. પરંતુ આ ગિફ્ટ્સની ચર્ચા બંનેએ પોતે ક્યારેય કરી નથી, આથી ગમે તેટલી ચર્ચા થાય, એટલું ચોક્કસ કહી શકાય નહીં કે કપલ વચ્ચે ભેટની આપ-લે થઈ છે. બોલીવૂડની પ્રખ્યાત પત્રકાર અને અમુક અંશે ગોસિપ કલ્ચરને જન્મ આપનાર સ્વર્ગસ્થ દેવયાની ચૌબુલ અને ‘રાત કે સિતારોં’ જેવી પુસ્તક લખનાર શોભા ડે દ્વારા લખાયેલી ઘણી પ્રખ્યાત કહાનીઓમાં બોલીવૂડ સ્ટાર્સ દ્વારા ગિફ્ટ્સની આપ-લે અંગે ઘણી ચર્ચા થઈ છે, પરંતુ જાહેરમાં ક્યારેય તેની ન તો પુષ્ટિ થઈ કે ન તો નકારી છે.
તો એકંદરે કહેવાની વાત એ છે કે ભલે શ્રાવણની આ ભીની રાતો ન હોય, જેને એક પત્રમાં લપેટીને ગુલઝાર ભેટને એક નવું પરિમાણ આપે છે. પરંતુ કોઈ એ હકીકતને ક્યારેય છુપાવી શકતું નથી કે કેટલીકવાર બોલીવૂડના ઘણા સ્ટાર્સ અને સેલિબ્રિટીઓએ તેમના એક્સને આપવામાં આવેલી મોંઘી ભેટો પર જાહેરમાં દિલગીરી વ્યક્ત કરી છે. આ અર્થમાં સુમિતા સેન અને લલિત મોદી અને તાજેતરમાં મહુઆ મોઇત્રા અને મુંબઈના પ્રખ્યાત હીરા નંદાની ગ્રુપના દર્શન હીરાનંદાની કોણ ભૂલી શકે છે, જેમના વચ્ચે ગિફ્ટ્સ લેવા-દેવા અંગે જાહેરમાં ચર્ચા થઈ હતી.
