નરેશ શાહ
સિરિયલ કિલરનો કોન્સેપ્ટ-વિષય આમ જુઓ તો હવે ચવાઈને ચુંથાઈ ગયેલો છે. એકને એક તરીકાથી, એક જ પ્રકારનું કથાતત્ત્વ ધરાવતી કથામાં લોકોની હત્યા પાછળનું પગેરું શોધવાની મથામણ અને માનસિક વિકૃતિ ધરાવતા હત્યારાની બેકગ્રાઉન્ડ ધરાવતી સ્ટોરી…
સિરિયલ કિલિંગની આવી કથામાં એક તબક્કા પછી રોમાંચનું સ્થાન કંટાળો લઈ લે એવું મોટાભાગની ફિલ્મો અને વેબસિરીઝમાં બનતું આવ્યું છે, પરંતુ ‘ઝી ફાઈવ’ પરસ્ટ્રીમ થયેલી વિક્રાંત મેસી, રાધિકા આપ્ટે, પ્રાચી દેસાઈ, અનંત મહાદેવન, વીદુ દારાસિંગ, રોહિત રોય જેવી તગડી સ્ટારકાસ્ટ ધરાવતી ‘ફોરેન્સિક’, પણ સિરિયલ કિલરની વાત કરતી એક સસ્પેન્સ થ્રીલર ફિલ્મ છે, જે તમને આખી ફિલ્મ દરમિયાન સચોટ અનુમાનના ઠેબાં ખવડાવે છે અને છેલ્લે…
દહેરાદૂન, મસુરી અને ઋષિકેશના લોકાલ પર ચકરાવા લેતી ‘ફોરેન્સિક’ તેના શરૂઆતની દૃશ્યોથી જ ધારણાં બંધાવી દે છે કે, આ એક બાર-તેર વરસના બાળકને સિરિયલ કિલર દર્શાવતી ફિલ્મ હશે અને એ દિગ્દર્શક વિશાલ કૂરિયા અને રાઈટિંગ ટીમના લેખકો અધિર ભટ્ટ, અજીત જગતાપ અને વિશાલ કપૂર સામે ચાલીને તમારા દિમાગમાં ઠસાવી દે છે અને ઘટનાઓ પણ એ જ રીતે બનતી રહી છે. મસૂરીમાં રહેતી ટીનએજ બાળકીઓની એકાએક હત્યા થવા માંડે છે.
અનોખી વાત એ છે કે જે બાળકીનો જન્મદિવસ હોય, એ જ બાળકીની, એ જ દિવસે હત્યા થઈ રહી છે. મસૂરીના પોલીસ વડા આ કેસની તપાસ સબ ઈન્સ્પેક્ટર મેધા શર્મા (રાધિકા આપ્ટે)ને સોંપે છે અને તેને મદદ મળી રહે એ વાસ્તે ફોરેન્સિક એક્સપર્ટ જોની ખન્ના (વિક્રાંત મેસી)ને પણ ઈન્વેસ્ટિગેશનમાં સામેલ કરે છે. મેધા અને જોની અલગ પડી ગયેલાં પ્રેમી છે, કારણ કે જોની ખન્નાના મોટાભાઈ રોહિત રોય અને મેધાની મોટી બહેનના જીવનમાં ચાર-પાંચ વરસ પહેલાં એક ભૂચાલ આવી ગયો છે.
મેધાની મોટી બહેનની નાની દીકરીનું આકસ્મિક મૃત્યુ થતાં મોટી બહેન પણ આઘાતમાં આપઘાત કરી લે છે. બનેવીની આ બેકાળજીને કારણે સબ ઈન્સ્પેક્ટર મેધા શર્મા પોતાની મોટી ભાણેજ આલિયાને પોતાની સાથે રહેવા લઈ આવી છે અને… તેના પિતાને આલિયા મળે, એ મેધા શર્માને હરગિઝ મંજૂર નથી. સંબંધોના આવા ચકરાવા વચ્ચે જ નાની બાળકીઓની તેના જ જન્મદિવસે હત્યા થવા માંડે છે.
ફોરેન્સિક એક્સપર્ટ જોની ખન્ના આધુનિક સાધનો તેમ જ પોતાની તીવ્ર વિચક્ષણ બુદ્ધિથી પ્રથમ હત્યાના બનાવનું ઈન્વેસ્ટિગેશન કરતાં એ તારણ પર આવે છે કે હત્યારો ચારેક ફૂટની હાઈટ અને ચાલીસ કિલો આસપાસનું વજન ધરાવનારો છે. સી.સી. ટીવી ફૂટેજ પરથી ખ્યાલ આવે છે કે એક ઠિંગણો (વામન કદ) માણસ પણ ઘટનાસ્થળે ઉપસ્થિત હતો. તેની શોધખોળ ચાલે છે અને ‘ફોરન્સિક’ની આ એક ઈન્ટરેસ્ટિંગ સિક્વન્સ છે કારણ કે તેમાં એક સાથે અનેક વામન કદ (ઠીંગણા)ના લોકો દેખાડવામાં આવ્યા છે…
અહીં એક લેખકની સૌથી મોટી સફળતા એ છે કે, એ બધું એવી રીતે દર્શાવે છે કે દર્શકના મનમાં વાત સજજડ રીતે ચોંટી જાય અને એ પછી સચોટ રીતે જ એ ધારણાનું ખંડન થાય. ‘ફોરન્સિક’માં આવું ત્રણથી ચાર વખત બને છે. દર્શક દર વખતે હત્યારા વિશેની પોતાની એક ધારણાંને સાચી પડતી હોવાનું માને, ત્યાં જ એ પડી ભાંગે અને શંકાનું ટ્રિગર અન્ય વ્યક્તિ તરફ ફંટાઈ થઈ જાય. આ લેખક ટીમની સફળતા છે.
બેશક, આ ‘ફોરેન્સિક’ માં એવી વાતો પણ છે, જે તરત ગળે ન ઊતરે. સાયકિયાટ્રિસ્ટ (અનંત મહાદેવન, પ્રાચી દેસાઈ)ની ટ્રિટમેન્ટ કે સેક્સ ચેન્જની વાત કદાચ, પહેલી વખત સિનેમામાં આવી છે અને એ ય પાછો મુખ્ય મુદ્દો નથી ફિલ્મનો.
એમ છતાં એટલું તો કહેવું પડે કે, ‘ફોરેન્સિક’ સિરિયલ કિલિંગની એક સસ્પેન્સ ફિલ્મ છે અને આ રહસ્યનું તત્ત્વ જ ‘ફોરેન્સિક’નો પ્લસ પોઈન્ટ છે. આ ફિલ્મ એ વાત પણ પુરવાર કરે છે કે ફોરેન્સિક સાયન્સ ગમે તેટલું સચોટ પગેરું શોધે- અંગૂલિનિર્દેશ કરે પણ માનવ દિમાગનું શાતિરપણું તેનાથી વધુ ચડિયાતું હતું, છે અને રહેશે!
આ પણ વાંચો…ફિલ્મનામાઃ `ફોન અગર સ્માર્ટ હો ગયા તો મૈં બેવકૂફ હો જાઉંગા…’
