એલ્વિશ યાદવની મુશ્કેલીઓ ઓછી થઈ રહી નથી, કોર્ટના આદેશ પર કેસ નોંધાયો

ફોકસ -નિધિ ભટટ્ટ

યુટ્યુબર એલ્વિશ યાદવની મુશ્કેલીઓ ઓછી નથી થઈ રહી. ગુરુગ્રામ કોર્ટના આદેશ બાદ પોલીસે બિગ બોસ ઓટીટી-૨ વિજેતા અલવિશ યાદવ અને ગાયક રાહુલ યાદવ ઉર્ફે ફાઝિલપુરિયા વિરુદ્ધ એક મ્યુઝિક વીડિયોમાં દુર્લભ પ્રજાતિના સાપનો ઉપયોગ કરવા બદલ કેસ નોંધ્યો હતો. એલ્વિશ સામે નવો કેસ આ પહેલા એડિશનલ ચીફ જ્યુડિશિયલ મેજિસ્ટ્રેટ મનોજ કુમાર રાણાની કોર્ટે યાદવ અને ફાઝિલપુરિયા વિરુદ્ધ કેસ નોંધવાનો આદેશ આપ્યો હતો. બંને સામે બાદશાહપુર પોલીસ સ્ટેશનમાં ક્રુઅલ્ટી ટુ એનિમલ્સ એક્ટ અને આઈપીસીની કલમ ૨૯૪ સહિત વિવિધ કલમો હેઠળ કેસ નોંધવામાં આવ્યો છે.

એલ્વિશ યાદવની ધરપકડ થશે?
બાદશાહપુર પોલીસ સ્ટેશનના સ્ટેશન હાઉસ ઓફિસર (એસએચઓ) સતીશ દેશવાલે જણાવ્યું હતું કે કોર્ટના આદેશના આધારે એલ્વિશ યાદવ અને રાહુલ યાદવ વિરુદ્ધ શનિવારે કેસ નોંધવામાં આવ્યો હતો. જો કે હજુ સુધી બંનેની ધરપકડ કરવામાં આવી નથી.

તેમણે કહ્યું કે આગળની કાર્યવાહી ચાલુ છે.

મળતી માહિતી મુજબ આ કેસની આગામી સુનાવણી ૧૦ એપ્રિલના રોજ નક્કી કરવામાં આવી છે. આ તારીખે બાદશાહપુર પોલીસ સ્ટેશનની ટીમ આ કેસમાં કોર્ટમાં અનુપાલન રિપોર્ટ રજૂ કરશે.

ગયા વર્ષે ફરિયાદ મળી હતી
પીપલ્સ ફોર એનિમલ્સ (પીએફએ) ના સભ્ય સૌરભ ગુપ્તાએ ગયા વર્ષે નવેમ્બરમાં નોંધાવેલી ફરિયાદમાં એલ્વિશ યાદવ અને રાહુલ યાદવ ઉર્ફે ફઝીલપુરિયા વિરુદ્ધ એફઆરઆઇ નોંધવાની માગ કરવામાં આવી હતી, જેમાં આરોપ લગાવવામાં આવ્યો હતો કે તેઓએ તેમના મ્યુઝિક વિડિયોમાં સાપની દુર્લભ પ્રજાતિઓનો ઉપયોગ કર્યો હતો.

શું છે આરોપ?
ગુપ્તાએ આરોપ લગાવ્યો હતો કે તેણે વીડિયો શૂટ કરવા માટે એનિમલ વેલફેર બોર્ડ, જિલ્લા વહીવટીતંત્ર અથવા વન વિભાગની પરવાનગી લીધી ન હતી. તેણે કોર્ટમાં અરજી પણ કરી હતી જેમાં જણાવ્યું હતું કે તેને વન્યજીવ તસ્કરી કરતી ટોળકી તરફથી ધમકીઓ મળી રહી છે. તેણે આ પત્ર પંજાબ અને હરિયાણા હાઈકોર્ટના મુખ્ય ન્યાયાધીશ, ગુરુગ્રામના જિલ્લા અને સત્ર ન્યાયાધીશ અને ગુરુગ્રામ પોલીસ કમિશનરને પણ મોકલ્યો છે. પત્રમાં સૌરભને સોશિયલ મીડિયા પર સતત જાનથી મારી નાખવાની ધમકીઓ અને ફરિયાદ પાછી ખેંચવા માટે દબાણનો ઉલ્લેખ કર્યો છે.

કોર્ટે નોટિસ પાઠવી હતી
આ કેસમાં કોર્ટે યાદવ અને ફાઝિલપુરિયાને નોટિસ જારી કરી અને ગુરુગ્રામ પોલીસને આ મામલે તપાસ કરવાનો નિર્દેશ આપ્યો. વિવાદ જાન્યુઆરી ૨૦૨૩ માં ઉભો થયો, જ્યારે યાદવે તેના ગીત ‘૩૨ બોર’ માટે એક મ્યુઝિક વિડિયો રજૂ કર્યો. વિડિયોમાં ઘણા એવા દ્રશ્યો દેખાડવામાં આવ્યા હતા જેમાં યાદવ અને અન્ય ડાન્સર્સ સાપ સાથે જોવા મળ્યા હતા. ઉલ્લેખનીય છે કે અગાઉ ૨૩ માર્ચે, એલ્વિશ યાદવને યુટ્યુબર સાગર ઠાકુર ઉર્ફે મેક્સટર્ન સંબંધિત હુમલાના કેસમાં ગુરુગ્રામ કોર્ટે જામીન આપ્યા
હતા.