EVMનું ટેસ્ટિંગ કરાવશે યોગેન્દ્ર પવાર, અજિત પવાર સામે ચૂંટણી લડ્યા હતા

મુંબઇઃ મહારાષ્ટ્ર વિધાનસભાની ચૂંટણીના પરિણામો આવી ગયા છે. શાસક મહાયુતિએ ભવ્ય જીત મેળવી છે ત્યારે વિપક્ષનું માનવું છે કે શાસક યુતિએ આમાં ઘણી ઘાલમેલ કરી છે. તેમણે હારનો ટોપલો EVM પર ઢોળ્યો છે. આટલું ઓછું હોય તેમ રાજ્યભરના ઘણા ઉમેદવારોએ ઇલેક્ટ્રોનિક વોટિંગ મશીન (EVM)માં માઇક્રોકન્ટ્રોલર્સની ચકાસણી માટે અરજીઓ પણ દાખલ કરી છે. પુણેના 21 મતવિસ્તારોમાંથી, 11 ઉમેદવારોએ અધિકૃત રીતે ચૂંટણી પંચને માઇક્રોકન્ટ્રોલરની પુનઃ ચકાસણી કરવા વિનંતી કરી છે.

શરદ પવારની રાષ્ટ્રવાદી કોંગ્રેસ પાર્ટી (NCP)ના બારામતીના ઉમેદવાર યુગેન્દ્ર પવારે 19 EVMના માઇક્રોકન્ટ્રોલર્સની ચકાસણી કરવા માટે જિલ્લા વહીવટીતંત્રને અરજી કરી છે. તેણે આ પ્રક્રિયા માટે ₹8.96 લાખ ચૂકવ્યા છે. માઇક્રોકન્ટ્રોલર વેરિફિકેશન માટે અન્ય અગ્રણી ઉમેદવારોમાં એનસીપીના હડપસરના ઉમેદવાર પ્રશાંત જગતાપ અને કોંગ્રેસના પુણે કેન્ટના ઉમેદવાર રમેશ બાગવેનો સમાવેશ થાય છે.

EVMની ચકાસણી માટેની અરજી 23 નવેમ્બરે ચૂંટણી પરિણામો જાહેર થયાના સાત દિવસમાં સબમિટ કરવાની હતી. સમગ્ર જિલ્લામાં, ઉમેદવારોએ 137 EVM સેટમાં માઇક્રોકન્ટ્રોલર્સની ચકાસણીની માંગણી કરી છે, અને તેના પર થયેલા ખર્ચ માટે ચૂંટણી પંચને સામૂહિક રીતે રૂ. 66.64 લાખ ચૂકવ્યા છે. સુપ્રીમ કોર્ટની માર્ગદર્શિકા મુજબ, જે ઉમેદવારો પોતપોતાના મતવિસ્તારમાં બીજા કે ત્રીજા સ્થાને છે તેઓ તેમના વિધાનસભા મતવિસ્તારમાં ઉપયોગમાં લેવાતા ઈલેક્ટ્રોનિક વોટિંગ મશીનોના 5%ના માઈક્રો કંટ્રોલર્સની ચકાસણી માટે વિનંતી કરી શકે છે.

આ પણ વાંચો : અમિત શાહ આજે મુંબઇ આવશે, મુખ્ય પ્રધાનની જાહેરાત કરશે

ઉમેદવારે આ પ્રક્રિયા માટે લેખિત અરજી કરવી પડશે અને ચકાસણી માટેનો ખર્ચ ઉઠાવવો પડશે. જિલ્લા ચૂંટણી અધિકારીઓએ પુષ્ટિ કરી છે કે તેઓએ રાજ્યના મુખ્ય ચૂંટણી કાર્યાલયને ચકાસણી વિનંતીઓ વિશે જાણ કરી છે. માઇક્રોકન્ટ્રોલરનું કડક દેખરેખ હેઠળ પરીક્ષણ કરવામાં આવશે, જેમાં VVPAT મેન્યુફેક્ચરિંગ કંપનીઓના ઉમેદવારો અને એન્જિનિયરોનો સમાવેશ થશે. ઉમેદવારોમાં, પ્રશાંત જગતાપ હડપસરે તેમના મતવિસ્તારમાં ઉપયોગમાં લેવાતા કુલ EVMમાંથી 27 ની ચકાસણીની માંગ કરી છે, જેના માટે તેમણે લગભગ રૂ.12 લાખ ચૂકવ્યા છે.

રાહુલ કલાટેએ ચિંચવડ વિધાનસભા ક્ષેત્રમાં 25 EVM ચકાસવા માટે અરજી કરી છે, અને આ માટે તેમણે ચૂંટણી પંચને 11 લાખ રૂપિયા ચૂકવ્યા છે. પુરંદરથી કોંગ્રેસના ઉમેદવાર સંજય જગતાપે 9.9 લાખ રૂપિયા ચૂકવીને 21 ઈવીએમની ચકાસણીની માંગ કરી છે.