ધનંજય મુંડેએ નૈતિકતાને આધારે રાજીનામું આપવું જોઈએ: સુળે

મુંબઈ: એનસીપી (એસપી)ના કાર્યકારી પ્રમુખ સુપ્રિયા સુળેએ બુધવારે કહ્યું હતું કે, બીડના સરપંચની હત્યાના કેસ અંગે ટીકાનો સામનો કરી રહેલા મહારાષ્ટ્રના પ્રધાન ધનંજય મુંડેએ ‘નૈતિકતાને આધારે’ રાજીનામું આપવું જોઈએ. પત્રકારો સાથે વાત કરતાં તેમણે કહ્યું હતું કે મસ્સાજોગના સરપંચ સંતોષ દેશમુખની ભયાનક હત્યાને પચાસ દિવસ વીતી ગયા છે, પરંતુ મુંડેના નજીકના સાથી પર આંગળી ચીંધવામાં આવી હોવા છતાં, એનસીપીના પ્રધાનને ભાજપની આગેવાની હેઠળની સરકારમાંથી બરતરફ કરવામાં આવ્યા નથી.

મુંડેના નજીકના સાથી વાલ્મિક કરાડની હત્યા સાથે જોડાયેલા ખંડણી કેસમાં ધરપકડ કરવામાં આવી છે. મુંડે હાલમાં દેવેન્દ્ર ફડણવીસના નેતૃત્વ હેઠળના પ્રધાન મંડળમાં અન્ન અને નાગરીપુરવઠા વિભાગ ધરાવે છે.

‘100 કરોડ રૂપિયાની લાંચના આરોપો લાગ્યા બાદ અનિલ દેશમુખે ગૃહ પ્રધાનપદેથી રાજીનામું આપ્યું હતું. નવાબ મલિક, છગન ભુજબળની અટકાયતી આરોપો પર ધરપકડ કરવામાં આવી હતી અને તેમને જેલમાં ધકેલી દેવામાં આવ્યા હતા,’ એમ તેમણે કહ્યું હતું.

અનિલ દેશમુખ શરદ પવારના નેતૃત્વ હેઠળના એનસીપી (એસપી)ના છે, જ્યારે ભુજબળ અને મલિક નાયબ મુખ્ય પ્રધાન અજિત પવારના નેતૃત્વ હેઠળની એનસીપીમાં છે. ધનંજય મુંડે પણ અજિત પવારના પક્ષના છે.

બારામતીના સાંસદ સુળેએ એવો દાવો કર્યો હતો કે શાસક ભાજપની આગેવાની હેઠળના મહાયુતિના નેતાઓ પણ મુંડેને રાજીનામું માગી લેવાની તરફેણમાં હતા.

આ પણ વાંચો : મહારાષ્ટ્ર સરકારે બીડમાં કાર્યરત માફિયાઓનો અંત લાવવો જોઈએ: સુપ્રિયા સુળે

‘જો હું પ્રધાન હોત અને મારે કારણે મારી પાર્ટી પચાસ દિવસ સુધી આ રીતે હેડલાઇન્સમાં છવાયેલી રહેતી હોત તો હું નૈતિક ધોરણે રાજીનામું આપી દેત. હું પાછળ હટીશ અને મારી પાર્ટીને કહીશ કે હું પાર્ટીને આગળ વધવામાં મદદ કરવા માટે અહીં છું, મારા પક્ષને આ રીતે નુકસાન થતું જોવા માટે નહીં,’ એમ તેમણે કહ્યું હતું.

ધનંજય મુંડેના કેસમાં ‘નફાના પદ’નો મુદ્દો પણ હતો, સુળેએ સામાજિક કાર્યકર્તા અંજલી દમણિયાના આરોપોનો ઉલ્લેખ કરતા કહ્યું હતું કે મુંડે અને તેમની પત્ની બે કંપનીઓમાં ભાગીદાર હતા જેમને રાજ્યની માલિકીની વીજ ઉત્પાદન કંપની, મહાજેન્કો પાસેથી થર્મલ પાવર પ્લાન્ટ્સ દ્વારા ઉત્પન્ન થતી ફ્લાય એશ દૂર કરવાનો કોન્ટ્રાક્ટ મળ્યો હતો.

‘નફાના પદના આરોપોનો સામનો કર્યા પછી સોનિયા ગાંધીએ તાત્કાલિક રાજીનામું આપી દીધું હતું. તેઓ પ્રધાન પણ નહોતા,’ એમ સુળેએ કહ્યું હતું.

રાષ્ટ્રીય સલાહકાર પરિષદના અધ્યક્ષ રહીને નફાના પદ પર રહેવાનો આરોપ લાગ્યા બાદ કોંગ્રેસના નેતાએ 2006 માં લોકસભાના સભ્યપદેથી રાજીનામું આપી દીધું હતું.