પુણે જમીન ‘કૌભાંડ‘માં મહિલાનું નામ: પોલીસ સમક્ષ નિવેદન નોંધાવવા માટે હાજર થવાનું કહેવાયું
પુણે: રાજ્યમાં હાલ ગાજી રહેલા નાયબ મુખ્ય પ્રધાન અજિત પવારના પુત્ર પાર્થ પવારને સંડોવતા 300 કરોડના જમીન કૌભાંડમાં હવે શીતલ તેજવાનીને પોલીસે સમન્સ પાઠવ્યા છે. શીતલને આ મામલામાં પોતાનું નિવેદન નોંધાવવા માટે પોલીસ સમક્ષ હાજર રહેવા જણાવાયું છે.
પુણેના મુંઢવા વિસ્તારમાં 40 એકરના સરકારી પ્લોટનો આ સોદો વિવાદ બાદ હવે રદ કરવામાં આવ્યો છે. આ પ્લોટની પાવર ઓફ એટર્ની શીતલ તેજવાની પાસે હતી, જે બાદમાં પાર્થ પવારની કંપની અમેડિયા એન્ટરપ્રાઇઝીસ એલએલપીને વેચવામાં આવી હતી.
આ સોદામાં શીતલનું નામ આવ્યા બાદ તે ગાયબ થઇ ગઇ હતી. હવે આ પ્રકરણની તપાસ શરૂ કરાઇ હોવાથી શીતલને પોલીસ સમક્ષ હાજર થવા માટે કહેવામાં આવ્યું છે.
આપણ વાચો: ડુમસ જમીન કૌભાંડમાં CID ક્રાઇમ બ્રાન્ચને મોટી સફળતા, ભાગેડુ અનંત પટેલની ધરપકડ
ઇન્સ્પેક્ટર જનરલ ઓફ પોલીસના કાર્યાલય દ્વારા આ પ્રકરણમાં એફઆઇઆર દાખલ કરાયો છે, જેમાં અમેડિયા એન્ટરપ્રાઇઝીસના સહ-ભાગીદાર દિગ્વિજય પાટીલ, શીતલ તેજવાની તેમ જ સબ-રજિસ્ટ્રાર આર.બી. તરુના નામ છે, જેમની વિરુદ્ધ ઉચાપત અને છેતરપિંડીનો આરોપ છે.
વરિષ્ઠ પોલીસ અધિકારીએ જણાવ્યું હતું કે શીતલને નોટિસ જારી કરવામાં આવી છે. આ નોટિસ તેના મુંબઈના નરીમાન પોઇન્ટ વિસ્તારના કાર્યાલયમાં આપવામાં આવી હતી, જ્યારે પિંપરી-ચિંચવડ વિસ્તારમાં તેના ઘરે પણ નોટિસ જારી કરવામાં આવી છે. શીતલને તેની વિરુદ્ધ નોંધાયેલા કેસમાં નિવેદન નોંધાવવા માટે બોલાવવામાં આવી છે, એમ પોલીસે જણાવ્યું હતું. (પીટીઆઇ)
