મોદી કેબિનેટમાં સ્થાન પામનારા પુણેના મુરલીધર મોહોલની મેયરથી MP સુધીની સફર
પુણે : દેશમાં છેલ્લા બે મહિનાથી ચાલી રહેલી લોકસભા ચૂંટણીના પરિણામો 4 જૂને જાહેર કરવામાં આવ્યા હતા. ભાજપની આગેવાની હેઠળની એનડીએને 292 બેઠકો મળી હતી જ્યારે કોંગ્રેસના નેતૃત્વવાળી ભારત અઘાડીને 232 બેઠકો મળી હતી. વડાપ્રધાન મોદીએ 400 પારનો નારો આપ્યો હતો. પરંતુ તે શક્ય બની શક્યું નહી, તેથી હવે મોદી NDAના ઘટક પક્ષો સાથે ત્રીજી વખત વડાપ્રધાન તરીકે શપથ લેવા જઈ રહ્યા છે. આજે દિલ્હીમાં રાષ્ટ્રપતિ ભવન ખાતે ભવ્ય શપથ ગ્રહણ સમારોહ યોજાયો છે. આ શપથવિધિ સમારોહ માટે વિવિધ રાજ્યોના સાંસદોના ફોન આવ્યા હોવાનું જાણવા મળે છે. મહારાષ્ટ્રમાંથી 6 થી 7 સાંસદોના નામ ચર્ચામાં છે. એવા અહેવાલ છે કે પૂણેના મેયર પદ પરથી સીધા સાંસદ બનેલા મુરલીધર મોહોલને મંત્રી તરીકે શપથ લેવાનો ફોન આવ્યો છે. પૂણે મ્યુનિસિપલ કોર્પોરેશનના મેયર બન્યા બાદ પ્રથમ વખત સાંસદ બનેલા મોહોલને મંત્રી પદની ઓફર કરવામાં આવતાં પુણેવાસીઓ ઘણા ખુશ છે.
પુણે લોકસભા મતવિસ્તારમાં મહાયુતિના મુરલીધર મોહોલ, મહાવિકાસ અઘાડીના રવીન્દ્ર ધાંગેકર, વંચિતના વસંત મોરે, MIMના અનિસ સુંદકે સહિત 35 ઉમેદવારો મેદાનમાં હતા. જોકે, ખરી લડાઈ મુરલીધર મોહોલ અને રવિન્દ્ર ધાંગેકર વચ્ચે હતી. કોથરુડ, શિવાજીનગર, પુણે કેન્ટોનમેન્ટ અને પાર્વતી એમ ચાર વિધાનસભા મતવિસ્તારોમાં ભાજપના વિધાનસભ્યો છે. ગત ચૂંટણીમાં ભાજપના ગિરીશ બાપટ ચૂંટાયા હતા. હવે આ ચૂંટણીમાં મુરલીધર મોહોલ 1 લાખ 23 હજાર 167 મતોથી ચૂંટાયા છે.
આ પણ વાંચો : જાણો મોદી સરકાર 3.0માં સાથી પક્ષોનો કેટલો હશે હિસ્સો? કોણ બનશે મંત્રી
પુણેના સાંસદ મુરલીધર મોહોલ કોથરુડ વિસ્તારમાં રહે છે. તેમણે આરએસએસમાંથી સામાજિક કાર્યની શરૂઆત કરી હતી. તે પછી તેમણે રાજકારણમાં પ્રવેશ કર્યો. કોરોના મહામારી દરમિયાન મોહોલ પુણેના મેયર પદ પર હતા. તે સમયે તેમણે પોતાના જીવની પરવા કર્યા વિના લોકસેવાનું કામ કર્યું હતું. ત્યારથી પૂણે શહેરમાં તેમની પ્રતિષ્ઠા વધી ગઈ હતી. પૂણેના સાંસદ પદ માટે ભાજપના ઘણા સ્થાનિક નેતાઓના નામ ચર્ચામાં હતા, પરંતુ મોહોલનું કામ જોઈને તેમને લોકસભાની ટિકિટ આપવામાં આવી હતી. તેમણે આ તકનો લાભ ઉઠાવ્યો અને અંતે સાંસદ બનવાનું ગૌરવ મેળવ્યું. મુરલીધર મોહોલને પહેલીવાર સાંસદ પદ મળ્યું છે. મોદીની કેબિનેટમાં તેમને મંત્રીપદની ઓફર કરવામાં આવી છે.
મોદીની ત્રીજી કેબિનેટમાં મહારાષ્ટ્રના છ સાંસદોના નામ લગભગ નિશ્ચિત છે જ્યારે એક સાંસદ અંગે ચર્ચા ચાલી રહી છે. મહારાષ્ટ્રમાં ભાજપ દ્વારા ચૂંટાયેલા લોકોમાં પૂર્વ કેન્દ્રીય પ્રધાન નીતિન ગડકરી અને પીયૂષ ગોયલને ફરીથી મંત્રી પદ મળશે. રિપબ્લિકન પાર્ટી ઑફ ઇન્ડિયાના રામદાસ આઠવલેને પણ ફરીથી રાજ્યમંત્રી પદ મળે તેવી શક્યતા છે. આ ઉપરાંત ભાજપમાંથી સતત ત્રીજી વખત સાંસદ બનેલા રાવેરના રક્ષા ખડસે અને પુણેથી મેયર પદેથી સીધા સાંસદ બનેલા મુરલીધર મોહોલને મંત્રી તરીકે શપથ લેવા માટે ફોન આવ્યો છે. તેની સાથે એકનાથ શિંદેના 7 સાંસદો ચૂંટાયા બાદ બુલઢાણાના સાંસદ પ્રતાપરાવ જાધવને શપથ ગ્રહણ માટે ફોન આવ્યો હોવાનું કહેવાય છે
