રોજગારીઃ વિકલાંગ યુવાનોને નોકરી આપવા માટે મહારાષ્ટ્ર સરકારે કર્યા મહત્ત્વના કરાર

મુંબઈઃ મહારાષ્ટ્ર સરકાર ટૂંક સમયમાં વિકલાંગ યુવાનોને આર્થિક રીતે સશક્ત કરવાના ઉદ્દેશ્ય સાથે રોજગારની તકો પૂરી પાડવા માટે સામાજિક સંસ્થા ‘યુથ ફોર જોબ્સ’ સાથે એમઓયુ પર હસ્તાક્ષર કરશે, એમ મુખ્ય પ્રધાન દેવેન્દ્ર ફડણવીસે આજે જણાવ્યું હતું.

ફડણવીસે એક નિવેદનમાં જણાવ્યું હતું કે, રાજ્ય સરકાર અલગ-અલગ વિકલાંગ યુવાનોને તાલીમ અને રોજગારીની તકો પૂરી પાડવા માટે અને આર્થિક આત્મનિર્ભરતા સુનિશ્ચિત કરવા પ્રતિબદ્ધ છે. આ સંબંધમાં રજિસ્ટર્ડ વ્યક્તિઓને આગામી પાંચ વર્ષમાં યુનિક ડિસેબિલિટી ઓળખ પત્ર (યૂડીઆઈડી) પ્રદાન કરવામાં આવશે, જે તેમને રોજગાર અને સ્વ-રોજગારની તકો પુરી પાડશે, એમ તેમણે જણાવ્યું હતું.

આ પણ વાંચો: મહારાષ્ટ્રે 61 એમઓયુ પર હસ્તાક્ષર કર્યા, 15.70 લાખ કરોડ રૂપિયાનું રોકાણ, 16 લાખ નોકરીઓ: ફડણવીસ

શરૂઆતમાં, સંસ્થા વિદર્ભ અને ઉત્તર મહારાષ્ટ્રમાં રાજ્ય સત્તાવાળાઓને રોજગાર અને સ્વ-રોજગારની તકો ઊભી કરવામાં મદદ કરશે અને ભવિષ્યમાં રાજ્યભરમાં આ પહેલને વિસ્તારવાની યોજના ધરાવે છે, એમ ફડણવીસે જણાવ્યું હતું.

તમામ વિકલાંગ વ્યક્તિઓને સરકારી યોજનાઓનો લાભ મળે તે સુનિશ્ચિત કરવા માટે અપડેટેડ ડેટાબેઝ તૈયાર કરવામાં આવી રહ્યો છે. નોંધણી અભિયાન હાથ ધરવામાં આવી રહ્યું છે, અને આવી વ્યક્તિઓને ઓળખપત્ર જારી કરવામાં આવે છે, એમ તેમણે જણાવ્યું હતું.

આ પણ વાંચો: ST કર્મચારીઓ માટે ગુજરાત સરકારનો મોટો નિર્ણય, નોકરી દરમિયાન મૃત્યુ થાય તો મળશે આટલા લાખની સહાય

વડા પ્રધાનના ‘વિકસિત ભારત’ના વિઝનને સાકાર કરવા માટે, કૌશલ્ય આધારિત શિક્ષણ દ્વારા રોજગારીની તકો ઉભી કરવા માટે, કૌશલ્ય વિકાસ વિભાગની સ્થાપના કરવામાં આવી છે. આ અનુસંધાનમાં, રાજ્ય સરકાર પણ યુવાનોના કલ્યાણ માટે મહત્વપૂર્ણ નિર્ણયો લઈ રહી છે, એમ ફડણવીસે જણાવ્યું હતું.

સામાજિક ઉદ્યોગસાહસિક મીરા શેનોય દ્વારા સ્થપાયેલ અને અધ્યક્ષતા ધરાવતી ‘યુથ ફોર જોબ્સ’ સંસ્થાએ મહારાષ્ટ્રમાં કેન્દ્ર અને ગઢચિરોલી જિલ્લા વહીવટીતંત્ર સાથે સફળતાપૂર્વક કામ કર્યું છે, એમ નિવેદનમાં જણાવાયું છે. ફડણવીસે કહ્યું કે રાજ્ય સત્તાવાળાઓ અને સ્થાનિક જિલ્લા વહીવટીતંત્ર આ પહેલ માટે સંપૂર્ણ સમર્થન આપશે.
(પીટીઆઈ)