અમારી ટીકા કરશો તો વીસની પાછળનું શૂન્ય પણ ગાયબ થઈ જશે: એકનાથ શિંદે

થાણે: બાળાસાહેબ તો બાળાસાહેબ હતા, હું બાળાસાહેબ ન બની શકું. એટલે અમે બાળાસાહેબના વિચારો સાથે આગળ વધ્યા છીએ. અમે સત્તાનો ત્યાગ કર્યો, બહાર ગયા. ખૂબ હિંમત બતાવી. આમછતાં જો કેટલાક લોકો ટીકા, આરોપ અને શ્રાપ આપવાનું ચાલુ રાખશે, એમ કહેતા રહે કે તેમણે બાળાસાહેબના વિચારોનો ત્યાગ કર્યો છે અને પોતાના સ્વાર્થ માટે સત્તા મેળવી છે, તો વીસમાંથી પાછળનું શૂન્ય પણ અદૃશ્ય થઈ જશે, એવા શબ્દોમાં નાયબ મુખ્ય પ્રધાન એકનાથ શિંદેએ ગુરુવારે થાણેમાં પત્રકારો સાથે વાત કરતા શિવસેના (યુબીટી)ને ચેતવણી આપી હતી.

થાણેના ટેમ્ભીનાકા સ્થિત આનંદ આશ્રમમાં સ્વ. બાળ ઠાકરેને શ્રદ્ધાંજલિ આપ્યા બાદ એકનાથ શિંદેએ પત્રકારો સાથે વાતચીત કરી. આ વખતે તેમણે ઠાકરે જૂથ અને વિપક્ષની ટીકા કરી હતી.

મહાયુતિના કાર્યકાળ દરમિયાન, અમે 80 ટકા સામાજિક કાર્ય અને 20 ટકા રાજકારણ બાળાસાહેબની અપેક્ષા મુજબ કર્યું હતું. સામાન્ય માણસને ન્યાય મળવો જોઈએ. અન્યાયની નિંદા થવી જ જોઈએ. અમે બાળાસાહેબના આ મંત્ર અને તેમના ઉપદેશોને અમલમાં મૂકવાનું કામ કર્યું. અમે ઘણી સરકારી યોજનાઓ શરૂ કરી છે. અમે બાળાસાહેબના વિચારો, વિકાસ અને આનંદ દિઘેના સામાન્ય માણસને ન્યાય આપવાના વિચાર અનુસાર કામ કરી રહ્યા છીએ. આ જ કારણ છે કે છેલ્લા અઢી વર્ષમાં રાજ્યનો વિકાસ થયો છે. વિકાસ પ્રોજેક્ટ્સ આગળ વધ્યા છે. તેમણે એમ પણ કહ્યું હતું કે આ બધી યોજનાઓથી આપણી લાડકી બહેનો, ભાઈઓ, યુવાનો અને બીજા બધાને ફાયદો થયો છે.

આ પણ વાંચો : કેઈએમની શતાબ્દી ઉજવણી: KEM Hospital મુંબઈગરાની કરોડરજ્જુ છે: એકનાથ શિંદે

ઇતિહાસમાં પહેલાં ક્યારેય કોઈ ગઠબંધન કે કોઈ પક્ષને આટલી સફળતા મળી નથી. અમે બાળાસાહેબના વિચારોને આગળ ધપાવી રહ્યા છીએ. હવેથી હું જે કંઈ કરવા માંગુ છું, તે મહારાષ્ટ્ર માટે, લોકો માટે કરવા માગું છું. તેથી, આજે પણ, બાળાસાહેબની જન્મજયંતિની ઉજવણી માટે સમગ્ર મહારાષ્ટ્ર અને દેશભરમાં કાર્યક્રમોનું આયોજન કરવામાં આવી રહ્યું છે, અને કાર્યકરોએ જન્મજયંતિ નિમિત્તે શિવોત્સવનું આયોજન કર્યું છે, એમ તેમણે ઉમેર્યું હતું.

અમારી સરકાર બની ત્યારથી અમારા પર આરોપો લગાવવામાં આવી રહ્યા છે. આરોપો લાગ્યા વગર એક પણ દિવસ પસાર થયો નથી, પરંતુ મેં કોઈ આરોપ નથી લગાવ્યો. લોકોએ તેમને જવાબ આપ્યો અને તેમનું સ્થાન બતાવ્યું. ગુરુવારે થાણેમાં પત્રકારો સાથે વાત કરતાં એકનાથ શિંદેએ ઠાકરે જૂથ પર કટાક્ષ કરતા કહ્યું કે જો તેઓ આવા આરોપો અને શ્રાપ આપતા રહેશે તો વીસ પછીનું શૂન્ય પણ અદૃશ્ય થઈ જશે.