પોતાને આલમગીર કહેવડાવનારા ઔરંગઝેબને પરાજય બાદ મહારાષ્ટ્રમાં દફનાવવામાં આવ્યો: અમિત શાહ

રાયગડ: કેન્દ્રીય ગૃહ પ્રધાન અમિત શાહે શનિવારે છત્રપતિ શિવાજી મહારાજની બહાદુરીની પ્રશંસા કરીને ભારપૂર્વક જણાવ્યું હતું કે ઔરંગઝેબ, જેણે પોતાને આલમગીર ગણાવ્યો અને જીવનભર મહારાષ્ટ્રમાં મરાઠાઓ સામે લડ્યો, તે એક પરાજિત માણસ તરીકે મૃત્યુ પામ્યો અને અહીંની માટીમાં તેને દફનાવવામાં આવ્યો હતો.

અમિત શાહે છત્રપતિ શિવાજી મહારાજની 345મી પુણ્યતિથિ નિમિત્તે રાયગડ કિલ્લા પર તેમને શ્રદ્ધાંજલિ આપી હતી.
તેમણે કહ્યું હતું કે શિવાજી મહારાજના ‘સ્વધર્મ અને સ્વરાજ્ય’ના આદર્શો ભારતની સ્વતંત્રતાના 100મા વર્ષ સુધીમાં મહાસત્તા બનવાની મહત્વાકાંક્ષાને પ્રેરણા આપે છે.

‘હું મહારાષ્ટ્રના લોકોને અપીલ કરું છું કે છત્રપતિ શિવાજી મહારાજને ફક્ત રાજ્ય પૂરતા મર્યાદિત ન રાખો. તેમની પ્રચંડ ઇચ્છાશક્તિ, દૃઢ નિશ્ર્ચય અને હિંમત દેશને પ્રેરણા આપે છે કારણ કે તેમણે સમાજના તમામ વર્ગોને વ્યૂહાત્મક રીતે એક કર્યા હતા,’ એમ શાહે એક સભાને સંબોધતા કહ્યું હતું.

શાહે કહ્યું કે શિવાજી મહારાજે ‘મોગલ શાહી’ (મોગલોના શાસન)ને હરાવ્યું હતું.
‘જે શાસક પોતાને આલમગીર કહેતો હતો તે જીવતો હતો ત્યાં સુધી મરાઠાઓ સામે લડ્યો અને મહારાષ્ટ્રમાં પરાજિત થઈને મૃત્યુ પામ્યો. તેની (ઔરંગઝેબની) કબર (મકબરો) અહીંની ધરતી પર આવેલી છે,’ એમ શાહે કહ્યું હતું.

આ પણ વાંચો: ઔરંગઝેબની કબર ધરાવતા શહેરનું નામ ખુલતાબાદથી બદલીને રત્નાપુર કરાશે

નોંધનીય છે કે, છત્રપતિ સંભાજીનગર જિલ્લાના ખુલતાબાદમાં 17મી સદીના મોગલ સમ્રાટની કબરને દૂર કરવાની જમણેરી સંગઠનોની માગણીને લઈને મહારાષ્ટ્રમાં ભારે રાજકીય વિવાદ થયો હતો.

‘સુપ્રસિદ્ધ મરાઠા યોદ્ધા રાજાના આદર્શો ભારતને તેની સ્વતંત્રતાની શતાબ્દી ઉજવવા અને મહાસત્તા બનવાની યાત્રા દરમિયાન પ્રેરણા આપે છે. નરેન્દ્ર મોદી સરકાર શિવાજી મહારાજના આદર્શો પર કામ કરે છે,’ એમ શાહે કહ્યું હતું.
ગૃહ પ્રધાને રાયગડ કિલ્લાનું વર્ણન કર્યું હતું કે જે મરાઠા રાજ્યની રાજધાની તરીકે સેવા આપતો હતો અને શિવાજી મહારાજની સમાધિ ધરાવે છે, તેને પ્રવાસન સ્થળ કરતાં ભવિષ્યની પેઢીઓ માટે પ્રેરણાનો સ્ત્રોત ગણાવ્યો હતો.

તેમણે શિવાજી મહારાજની માતા જીજાબાઈને ‘સ્વધર્મ’ના રક્ષણ અને ‘સ્વરાજ્ય’ની સ્થાપના માટેના બીજ રોપવાનું શ્રેય આપ્યું હતું. 2047માં ભારત તેની સ્વતંત્રતાની શતાબ્દી તરફ આગળ વધી રહ્યું છે અને મહાસત્તા બનવાની ઇચ્છા ધરાવે છે, ત્યારે શિવાજી મહારાજ પ્રેરણાસ્થાન તરીકે સામે ઊંચા ઊભા છે, એમ તેમણે કહ્યું હતું.

તેમની ‘રાજમુદ્રા’ (શાહી ચિહ્ન) ભારતીય નૌકાદળના ધ્વજ તરીકે ઉપયોગમાં લેવાય છે, જે રાષ્ટ્ર પર તેમના કાયમી પ્રભાવનું પ્રતીક છે.

આ પણ વાંચો: ઔરંગઝેબની કબરની જાળવણી પાછળ સરકારી પૈસા વેડફવાની જરૂર નથી: મનસે

શાહે ‘સ્વધર્મ’ માટે લડત ચાલુ રાખવા અને શિવાજી મહારાજના સુશાસન અને ન્યાયના ઉપદેશોને સમર્થન આપવાના મહત્વ પર ભાર મૂક્યો.

શાહની સાથે મુખ્ય પ્રધાન દેવેન્દ્ર ફડણવીસ, નાયબ મુખ્ય પ્રધાનો એકનાથ શિંદે અને અજિત પવાર તેમ જ ભાજપના સાંસદ ઉદયનરાજે ભોસલે અને રાજ્યના પ્રધાન શિવેન્દ્રસિંહ ભોસલે હતા, બંને મરાઠા યોદ્ધા રાજાના વંશજો છે.

ફડણવીસે અરબી સમુદ્રમાં શિવાજી મહારાજના સ્મારકના નિર્માણ માટે તેમની સરકારની પ્રતિબદ્ધતાનો પુનરોચ્ચાર કર્યો, અને નોંધ્યું કે આ પ્રોજેક્ટ અંગેની એક અરજી બોમ્બે હાઈકોર્ટમાં પાછી મોકલવામાં આવી છે.
‘અમે આ કેસ કુશળતાપૂર્વક રજૂ કરીશું,’ એમ તેમણે કહ્યું હતું.

ફડણવીસે દિલ્હીમાં શિવાજી મહારાજના રાષ્ટ્રીય સ્મારકની ઉદયનરાજે ભોંસલેની માગણી પણ સ્વીકારી હતી અને અમિત શાહ સાથે આ બાબતે ચર્ચા કરવાનું વચન આપ્યું.

આ પણ વાંચો: ઔરંગઝેબની કબર મુદ્દે દેવેન્દ્ર ફડણવીસે આપ્યું નવું નિવેદન, કબર સંરક્ષિત પણ…

ઉદયનરાજેએ શિવાજી મહારાજના અપમાનને 10 વર્ષની જેલની સજા સાથેનો એક નોંધનીય અને બિનજામીનપાત્ર ગુનો બનાવવાનો કાયદો બનાવવાની માગણી કરી હતી અને સિનેમેટિક ચિત્રણમાં ઐતિહાસિક ચોકસાઈ સુનિશ્ર્ચિત કરવા માટે સેન્સર બોર્ડની સ્થાપનાનો પ્રસ્તાવ મૂક્યો હતો.

‘પોતાનું જીવન બીજાઓને સમર્પિત કરવા છતાં, તેમનું અપમાન થઈ રહ્યું છે. હું માગણી કરું છું કે શિવાજી મહારાજના અપમાનને 10 વર્ષ સુધીની સજા ધરાવતો અને બિન-જામીનપાત્ર ગુનો ધરાવતો કાયદો બનાવવામાં આવે.’
‘સરકાર દ્વારા પ્રમાણિત ઇતિહાસ પર સિનેમેટિક સ્વતંત્રતા અને તથ્યલક્ષી ભૂલોની તપાસ કરવા માટે એક સેન્સર બોર્ડ હોવું જોઈએ,’ એમ તેમણે કહ્યું હતું.

ઉદયનરાજેએ એવી ટિપ્પણી કરી હતી કે અરબી સમુદ્રમાં શિવાજી મહારાજના આગામી સ્મારકમાં પર્યાવરણ અને પર્યાવરણીય મુદ્દાઓને કારણે વિલંબ થયો હશે, પરંતુ તે રાજભવન ખાતે 48 એકર જમીન પર ગમે ત્યારે બનાવી શકાય છે.
ભોંસલેએ સૂચન કર્યું કે વિલંબિત અરબી સમુદ્ર સ્મારક રાજભવન ખાતે 48 એકર જમીન પર બનાવી શકાય છે.
આ અગાઉ અમિત શાહ અને અન્ય મહાનુભાવોએ રાયગડ કિલ્લા નજીક આવેલા પાછડ ખાતે જીજાબાઈને પુષ્પાંજલિ અર્પણ કરી હતી.