દર્શન ભાવસાર
કબીરા ખડા બાજાર મેં… તો નબીરા?..
- બાર મેં!
ખોદ્યો ડુંગર. કાઢ્યો ઉંદર…એ ઉંદર ક્યાં જતો હશે?. - હોમટાઉન ડુંગરમાં.
સૌથી વધુ રિટર્ન શેમાંથી મળે ? - દેણદારો પાસેથી નસીબ સારા હોય તો ! .
ઘેરહાજર અને ઓફિસમાં ગેરહાજર ફાયદો શેમાં? - એનો આધાર પત્ની અને બોસ પર છે…
લગ્ન વિધિમાં સપ્તપદીના બદલે નવપદી હોય તો? - ટાઈમ બહુ જાય અને ગોર મહારાજ વધુ પૈસા માંગે
નવદંપતીને કોડી કેમ રમાડાય છે? - મહેમાનોની હાજરીમાં તીન પત્તી તો ના રમાડાય ને?!
મુકાબલા…એ કઈ બલા છે ? - બથ્થમબથ્થાની.
એક્ટરની જેમ ચીટરની ફેન ક્લબ હોય તો? - બધા રૂપિયાનો રૂદન રાગ આલાપતા હોય.
ધારો કે એક સાંજ આપણે મળ્યા.. આપણે હળ્યા, પણ આ આયખાનું શું…કવિએ શું કહેવું હશે? - મિલન પછી પેલી મને મૂકીને જતી રહી ને બિલ કવિએ ચૂકવવું પડ્યું !
પડોશણ રિસાઈ જાય તો શું કરવું? - મનાવો, પણ માની ગઈ તો માથાકૂટ વધશે
જેને ઘાસચારો કે ભાઈચારો માફક ના આવે એ કોણ? - બિચારો.
સહકાર વિના ઉદ્ધાર નહીં. કેવો સહકાર આપવો? - પ્રસાદી- લાંચ- સમજૂતી કે ચાપાણીના વ્યવહારનો.
મનપસંદની જેમ તનપસંદનો મહિમા કેમ નથી? - ચાલો, તમે શરૂ કરો !
ચાપાણી, છાંટોપાણી, રાતાપાણી.. સામ્યતા શું? - પાણી.. પીવાનું અને દેખાડવાનું!
