Bangladesh માં ક્યારે યોજાશે ચૂંટણી, મોહમ્મદ યુનુસે આપી જાણકારી

ઢાકા : બાંગ્લાદેશમાં(Bangladesh)હિંદુઓ પર થઈ રહેલા હુમલા અને ફેલાઈ રહેલી અવ્યવસ્થા વચ્ચે ચૂંટણીની તારીખ બાબતે મોટું અપડેટ આવ્યું છે. શેખ હસીના સરકારને સત્તા પરથી હટાવવામાં આવ્યા બાદ વચગાળાની સરકાર બાંગ્લાદેશમાં શાસન કરી રહી છે. આ વચગાળાની સરકારના વડા મોહમ્મદ યુનુસ છે. સત્તા સંભાળ્યા બાદથી વચગાળાની સરકાર પાસે ચૂંટણીની તારીખો જાહેર કરવાની માંગ કરવામાં આવી છે. હવે વધતા દબાણ વચ્ચે મોહમ્મદ યુનુસે કહ્યું છે કે 2025ના અંતમાં અથવા 2026ની શરૂઆતમાં ચૂંટણી યોજાશે.

માત્ર સમયપત્રકની વાત કરી

મીડિયા અહેવાલ મુજબ, ભૂતપૂર્વ વડા પ્રધાન ખાલિદા ઝિયાના નેતૃત્વવાળી BNP સહિત મુખ્ય રાજકીય પક્ષો દેશમાં ટૂંક સમયમાં ચૂંટણી ઇચ્છે છે. ટીકા અને વિરોધ છતાં યુનુસે ચૂંટણીની તારીખો જાહેર કરી નથી પરંતુ માત્ર સમયપત્રકની વાત કરી છે. ચૂંટણીની તારીખો અંગે યુનુસે કહ્યું કે તેમણે વારંવાર દરેકને મોટા સુધારા પૂર્ણ કર્યા બાદ ચૂંટણી કરાવવાની અપીલ કરી છે.

ઓછામાં ઓછા છ મહિનાનો સમય લાગી શકે છે

મોહમ્મદ યુનુસે કહ્યું કે જો રાજકીય સહમતિ સધાઈ જાય તો નાના સુધારા સાથે મતદાર યાદીમાંથી ભૂલોને દૂર કરી શકાય તો 2025ના અંત સુધીમાં ચૂંટણી યોજવી શક્ય બની શકે છે. તેમણે કહ્યું કે જો અમે ચૂંટણી પ્રક્રિયામાં જરૂરી સુધારાના સ્તર પર કામ કરીએ અને ચૂંટણી સુધાર આયોગની ભલામણો સાથે સહમત થઈએ તો તેમાં ઓછામાં ઓછા છ મહિનાનો સમય લાગી શકે છે.

Also Read – Bangladesh ભારત વિરુદ્ધ ચીનની મદદથી રચી રહ્યું છે ષડયંત્ર, ફાઈટર જેટ ખરીદવાની તૈયારી

સંસદમાં કુલ 350 બેઠકો 50 બેઠકો મહિલાઓ માટે અનામત

આ દરમિયાન બાંગ્લાદેશમાં ચૂંટણી પ્રક્રિયા ભારતમાં લોકસભા ચૂંટણી જેવી જ છે. અહીં સંસદના સભ્યોની ચૂંટણી ભારતની જેમ જ થાય છે. એટલે કે એક પણ વધુ મત મેળવનાર ઉમેદવાર જીતશે. ચૂંટણી પરિણામો જાહેર થયા પછી, સૌથી મોટા પક્ષ અથવા જોડાણના સાંસદો તેમના નેતાને પસંદ કરે છે અને તે વડા પ્રધાન બને છે. અહીં સંસદમાં કુલ 350 બેઠકો છે. જેમાંથી 50 બેઠકો મહિલાઓ માટે અનામત છે. અનામત બેઠકો માટે કોઈ ચૂંટણી નથી. જ્યારે સામાન્ય ચૂંટણી દર પાંચ વર્ષે 300 બેઠકો માટે યોજાય છે.