યુક્રેનની જેલમાં બંધ મોરબીના મુસ્લિમ યુવકે માતા સાથે ફોનમાં શું કરી વાત ?

મોરબી/કીવઃ રશિયા-યુક્રેન વચ્ચે ચાલી રહેલા યુદ્ધ દરમિયાન યુક્રેન અભ્યાસ અર્થે ગયેલો મોરબીના મુસ્લિમ યુવક સાહિલ માજોઠીએ એક વર્ષ બાદ પોતાની માતા સાથે વ્હોટ્સએપ વીડિયો કોલ પર વાત કરી હતી. આ સમયે સમગ્ર વાતાવરણ ગમગીન બની ગયું હતું. 18 મિનિટની વાતચીતમાં 10 મિનિટ સુધી તો માત્ર રડતાં જ રહ્યાં હતાં. સાહિલે વીડિયો કોલ દરમિયાન ભારત સરકારને વિનંતી કરી છે કે તેને જલદી વતન પરત લાવવામાં આવે.

સાહિલની માતા હસીનાબેને જણાવ્યું હતું કે મારો દીકરો સુરક્ષિત છે એે જાણીને મને નવું જીવન મળ્યું છે. સરકાર અને વકીલ જે રીતે મહેનત કરી રહ્યાં છે, મને વિશ્વાસ છે કે મારો સાહિલ ટૂંક સમયમાં મોરબી પરત ફરશે. હાલમાં ભારત સરકારના વિદેશ મંત્રાલય દ્વારા આ બાબતે રાજદ્વારી સ્તરે પ્રયાસો તેજ કરવામાં આવ્યા છે.

ઉલ્લેખનીય છે કે, યુક્રેનની જેલમાં બંધ મોરબીના મુસ્લિમ યુવક સાહિલ મોહમ્મદ હુસૈનનો થોડા દિવસ પહેલા વીડિયો સામે આવ્યો હતો. જેમાં તે રશિયામાં દગો કરીને ફસાવાયો હોવાનું કહેતો હતો. વીડિયોમાં તે લોકોને કોઈપણ સંજોગોમાં રશિયન સેનામાં સામેલ ન થવાની અપીલ કરી રહ્યો છે. તેણે આરોપ લગાવ્યો છે કે તેને કથિત રીતે ખોટા ડ્રગ્સ કેસમાં બ્લેકમેલ કરીને રશિયન સેનામાં સેવા આપવા માટે મજબૂર કરવામાં આવ્યો હતો.

વીડિયો મળ્યા પછી, સાહિલની માતાએ તેના પુત્રની સુરક્ષિત વાપસી માટે દિલ્હીની કોર્ટમાં અરજી દાખલ કરી છે, જેની સુનાવણી ફેબ્રુઆરી 2026માં થશે.

સાહિલ મોહમ્મદ હુસૈને અગાઉના વીડિયોમાં કહ્યું કે તેમના કરાર મુજબ, તેમણે એક વર્ષ માટે રશિયન સેનામાં સેવા આપવાનો હતો. તેને કહેવામાં આવ્યું હતું કે તેમની સેવા પૂર્ણ થયા પછી તેને ભારત પાછા મોકલવામાં આવશે. આ વીડિયો મુજબ એક ઓક્ટોબરના રોજ 16 દિવસની તાલીમ બાદ સાહિલ મોહમ્મદ હુસૈનને પ્રથમ યુદ્ધ મિશન પર મોકલવામાં આવ્યો હતો. જ્યાં તેણે ત્રણ દિવસ પસાર કર્યા હતા. તેમજ પોતાના કમાન્ડર સાથે સંઘર્ષ બાદ તેણે 63મી મેકેનાઈઝડ બ્રિગેડ યુક્રેન સેના સામે આત્મસમપર્ણ કર્યું હતું.

ઉલ્લેખનીય છે કે, ભારત સહિત ત્રીજા પક્ષના દેશોના નાગરિકોને આકર્ષક નોકરીઓ અથવા અન્ય તકોના વચન આપીને રશિયા દ્વારા ફોસલાવવામાં આવ્યા હતા અને પછી તેમને સેનામાં જોડાવા માટે દબાણ કરવામાં આવ્યું હતું. આ વર્ષના જાન્યુઆરીમાં સરકારે આવા ભારતીયોની સંખ્યા 126 જણાવી હતી. આમાંથી 96 ભારત પાછા ફર્યા હતા. જયારે 12 મૃત્યુ પામ્યા હતા અને 16 ગુમ છે.

આ પણ વાંચો…યુક્રેનની જેલમાં બંધ મોરબીના મુસ્લિમ યુવકનો બીજા વીડિયો, રશિયામાં દગો કરીને ફસાવાયો ને………