ભારતીય મૂળની નિક્કી હેલીએ રાષ્ટ્રપતિની ચૂંટણી પહેલા યુએસ સિક્રેટ સર્વિસ પાસેથી સુરક્ષા કેમ માંગી?

આ વર્ષે નવેમ્બર મહિનામાં અમેરિકામાં સામાન્ય ચૂંટણી છે. આ દરમિયાન રિપબ્લિકન પાર્ટી તરફથી રાષ્ટ્રપતિ પદના ઉમેદવાર બનવાની રેસમાં નિક્કી હેલી ભૂતપૂર્વ રાષ્ટ્રપતિ ડોનાલ્ડ ટ્રમ્પની એકમાત્ર હરીફ છે. યુએસ પ્રમુખપદના ઉમેદવાર બનવાની રેસમાં રહેલી ભારતીય મૂળની નેતા નિક્કી હેલીએ તેમને મળી રહેલી ધમકીઓને ટાંકીને ઈન્ટેલિજન્સ સર્વિસની સુરક્ષાની માંગ કરી છે. નોંધનીય છે કે નિક્કીને અગાઉના બે વખત 30 ડિસેમ્બર અને 1 જાન્યુઆરીએ ધમકીઓ મળી હતી. હેલીની ટીમે જણાવ્યું હતું કે તેણે ગુપ્તચર સેવા સુરક્ષા માટે અરજી કરી છે, પરંતુ અરજી ક્યારે કરવામાં આવી તે જણાવ્યું નથી. પ્રચાર ટીમે એ પણ જણાવ્યું નથી કે તેઓએ સુરક્ષા માટે કયા જોખમને ધ્યાનમાં રાખીને અરજી કરી હતી.

નોંધનીય છે કે દક્ષિણ કેરોલિનામાં નિક્કી હેલીના ઘરે હુમલાની ઘટનાઓ બની છે, જ્યારે તેના માતાપિતા ઘરમાં હાજર હતા. નિક્કી હેલી હાલમાં પ્રચાર કરતી વખતે ખાનગી સુરક્ષાનો ઉપયોગ કરે છે, જોકે સ્થાનિક પોલીસ તેના ચૂંટણી સંબંધિત કાર્યક્રમોમાં હાજર હોય છે. નિક્કી હેલીને તેના કાર્યક્રમોમાં કડક સુરક્ષા વિશે પૂછતા તેણે જણાવ્યું હતું કે જ્યારે તમે કોઈ મોટું કામ કરો છો ત્યારે આવી ધમકીઓ મળવી સામાન્ય વાત છે. પરંતુ આ ધમકીઓ મને મારું કામ કરતા અટકાવી શકશે નહિ. જો કે ઈન્ટેલિજન્સ સર્વિસની સુરક્ષા ત્યારે જ આપવામાં આવે છે જ્યારે સુરક્ષા પ્રધાનની મંજૂરી મળે.

આ ઉપરાંત ઓપિનિયન પોલમાં પણ નિક્કી હેલી પોતાની પાર્ટીના હરીફ ડોનાલ્ડ ટ્રમ્પથી પાછળ છે. પૂર્વ રાષ્ટ્રપતિ ડોનાલ્ડ ટ્રમ્પે તેમને રાષ્ટ્રપતિ પદની રેસમાંથી બહાર નીકળી જવા માટે કહ્યું હતું.

ફેડરલ કાયદા હેઠળ, અગ્રણી ઉમેદવારો કે જે વિપક્ષના હોય તેમને સિક્રેટ સર્વિસ પ્રોટેક્શન આપવામાં આવે છે. ઉલ્લેખનીય છે કે મે 2007 માં તત્કાલિન સીનેટર બરાક ઓબામાને મળતી ધમકીઓને ધ્યાનમાં રાખીને કોંગ્રેસની સમિતિની ભલામણને પગલે સુરક્ષા આપવામાં આવી હતી.