કેનેડામાં જય શ્રીરામનો જયઘોષ! અયોધ્યાની પ્રેરણાથી બની નોર્થ અમેરિકાની સૌથી ઊંચી શ્રીરામની મૂર્તિ
મિસિસૉગા/કેનેડા: ભગવાન શ્રીરામની ખ્યાતી ભારત સિવાય પૂર્વના દેશોમાં તો છે જ પરંતુ શું તમે જાણો છો કે ભગવાનમાં શ્રીરામની ખ્યાતીના સીમાડા વિસ્તરીને છેક કેનેડામાં પણ વ્યાપેલા છે. કારણ કે કેનેડાના મિસિસૉગા શહેરમાં ભગવાન શ્રીરામની સૌથી ઉંચી મૂર્તિ સ્થાપવામાં આવી છે. આ મૂર્તિ નોર્થ અમેરિકામાં સ્થાપવામાં આવેલી સૌથી ઉંચી મૂર્તિ છે. મિસિસૉગામાં આવેલા હિંદુ હેરિટેજ સેન્ટર દ્વારા આ મૂતિનું અનાવરણ કરવામાં આવ્યું હતું. આ મૂર્તિની પ્રેરણા અયોધ્યાથી લેવામાં આવી છે.
મળતી વિગતો અનુસાર, આ મૂર્તિને સ્ટીલમાંથી બનાવવામાં આવી છે અને તે 200 કિલોમીટર પ્રતિ કલાકની ઝડપે ફૂંકાતા પવનનો પણ સામનો કરી શકે છે. આ મૂર્તિ 100 વર્ષ સુધી ટકી શકશે, જ્યારે આ મૂર્તિના અલગ-અલગ ભાગો દિલ્હીમાં બનાવવામાં આવ્યા હતા અને ત્યાર બાદ તેમને કેનેડા મોકલવામાં આવ્યા હતા.
કેનેડામાં તેના અલગ-અલગ ભાગોને જોડવામાં આવ્યા. આ પ્રોજેક્ટની શરૂઆત 4 વર્ષ પહેલાં થઈ હતી. આ મૂર્તિની ખાસિયત એ છે કે જ્યારે પણ કોઈ વિમાન ટોરંટોના પિયરસન ઇન્ટરનેશનલ એરપોર્ટ પર ઊતરશે, ત્યારે ઉપરથી આ પ્રતિમા સ્પષ્ટ દેખાશે.”
હિંદુ હેરિટેજ સેન્ટરના સંસ્થાપક આચાર્ય સુરિન્દર શર્મા શાસ્ત્રીએ જણાવ્યું હતું કે, આ સમુદાય માટે એક મોટી ભેટ છે. મિસિસૉગાના મેયર કૅરોલિન પૅરિશે આ પ્રતિમાને મિસિસૉગાના હિંદુ સમુદાય માટે એક સીમાચિહ્ન (માઇલસ્ટોન) ગણાવી અને આ સ્થાપનાના સાંસ્કૃતિક અને આધ્યાત્મિક મહત્ત્વને સ્વીકાર્યું.
હિંદુ હેરિટેજ સેન્ટરે જણાવ્યું કે પ્રતિમાની જે ઊંચાઈ છે, તેમાં નીચેનો સાત ફૂટ ઊંચું પ્લૅટફૉર્મ સામેલ નથી. આ ઉપરાંત ભવિષ્યમાં એક છત્ર એટલે છાયા માટેની પણ વ્યવસ્થા પણ કરવામાં આવશે. જ્યારે આ મૂર્તિ અહીં સ્થાપિત કરવામાં આવી, ત્યારે હજારોની સંખ્યામાં લોકો અહીં પહોંચ્યા હતા અને કાર્યક્રમમાં ભાગ લીધો હતો.
