અમેરિકાની મુલાકાતે પહોંચ્યા ઇટલીના પીએમ જ્યોર્જિયા મેલોની, ડોનાલ્ડ ટ્રમ્પે વખાણ કર્યા, કહ્યું શ્રેષ્ઠ વડા પ્રધાન

નવી દિલ્હી : અમેરિકાના રાષ્ટ્રપતિ ડોનાલ્ડ ટ્રમ્પના ટેરિફ વોરથી સમગ્ર વિશ્વમા ચિંતાનો માહોલ છે. જોકે, આ ટેરિફ લાગુ કરવા માટે ટ્રમ્પે 90 દિવસનો સમય આપ્યો છે. જેના પગલે અમેરિકા અને અનેક દેશો વચ્ચે વેપાર કરાર થઇ શકે અને નવો ટેરિફ લાગુ કરી શકાય. આ દરમિયાન ઇટલીના વડા પ્રધાન જ્યોર્જિયા મેલોની હાલ અમેરિકાના પ્રવાસે છે. તેમણે વ્હાઇટ હાઉસમા અમેરિકાના રાષ્ટ્રપતિ ડોનાલ્ડ ટ્રમ્પ સાથે મુલાકાત કરી. તેમજ નવા ટેરિફની જાહેરાત બાદ અમેરિકાની મુલાકાત લેનારા પ્રથમ યુરોપિયન નેતા છે.

વિશ્વના શ્રેષ્ઠ નેતાઓમાંના એક

જોકે, આ દરમિયાન ડોનાલ્ડ ટ્રમ્પે મેલોનીના વખાણ કર્યા હતા. વ્હાઇટ હાઉસ ખાતે પત્રકારો સાથે વાત કરતા ટ્રમ્પે કહ્યું, મેલોની એક સક્ષમ પ્રધાનમંત્રી છે અને ખૂબ જ સારું કામ કરી રહ્યા છે. તેમણે કહ્યું કે મેલોનીમાં અદ્ભુત પ્રતિભા છે. તેઓ વિશ્વના શ્રેષ્ઠ નેતાઓમાંના એક છે. તેમનું વ્યક્તિત્વ પ્રભાવશાળી છે અને તેમના જેવું કોઈ નથી. અમારા સંબંધો ખૂબ સારા છે અને બંને દેશો આગળ વધી રહ્યા છે.

રાષ્ટ્રપતિ ટ્રમ્પે મેલોનીને એક મહાન વડા પ્રધાન ગણાવ્યા છે અને કહ્યું છે કે તેમણે સમગ્ર યુરોપમાં હલચલ મચાવી દીધી છે. હું તેને શરૂઆતથી જ ઓળખું છું અને હંમેશા માનતો આવ્યો છું કે તેની પાસે અદ્ભુત પ્રતિભા છે.વ્હાઇટ હાઉસ ખાતે, મેલોની અને ટ્રમ્પે વેપાર ટેરિફથી લઈને ઇમિગ્રેશન અને પશ્ચિમી રાષ્ટ્રવાદ જેવા મુદ્દાઓ પર પણ ચર્ચા કરી.

ઇટાલિયન કંપનીઓ અમેરિકામાં 10 અબજ યુરોનું રોકાણ કરશે

આ દરમિયાન ટ્રમ્પે કહ્યું કે તેઓ ઉતાવળમાં વ્યવસાયિક સોદા કરવા માંગતા નથી. અમેરિકાને ટેરિફથી ઘણો ફાયદો થઈ રહ્યો છે. જોકે, આ દરમિયાન ટ્રમ્પે યુરોપિયન યુનિયન સાથે કરારનો સંકેત પણ આપ્યો હતો. આ દરમિયાન મેલોનીએ કહ્યું કે ઇટાલિયન કંપનીઓ અમેરિકામાં 10 અબજ યુરોનું રોકાણ કરશે અને ઇટાલી અમેરિકાથી ઊર્જા આયાત વધારશે.

મેલોની અને ટ્રમ્પ ઘણા મુદ્દાઓ પર સમાન વિચારો ધરાવે છે

ઉલ્લેખનીય છે કે, મેલોની એકમાત્ર યુરોપિયન નેતા હતા જેમને 20 જાન્યુઆરીએ ટ્રમ્પના શપથ ગ્રહણ સમારોહમાં હાજરી આપવા માટે આમંત્રણ આપવામાં આવ્યું હતું. મેલોની અને ટ્રમ્પ ઘણા મુદ્દાઓ પર સમાન વિચારો ધરાવે છે. ઇમિગ્રેશનથી લઈને દાણચોરી સુધીની દરેક બાબતમા બંનેના વિચારો એક છે.