ઇન્ડોનેશિયાના સુમાત્રા ટાપુ પર વિનાશક પૂર અને ભૂસ્ખલનમાં 300 થી વધુ લોકોના મોત
સુમાત્રા : ઇન્ડોનેશિયાના સુમાત્રા ટાપુ પર છેલ્લા અઠવાડિયા દરમિયાન વિનાશક પૂર અને ભૂસ્ખલનમાં 303 લોકોના મોત થયા છે. આ પૂરના લીધે ઉત્તર સુમાત્રાના સિબોલ્ગા શહેર અને મધ્ય તપાનુલી જિલ્લામાં સૌથી નુકસાન થયું છે.
આ સમગ્ર વિસ્તારમાં કાદવ પથરાયો છે. તેમજ વિસ્તારના રસ્તો તૂટી ગયા છે. જયારે પુલ ધોવાયા અને મોબાઈલ અને વીજ પુરવઠો ખોરવાઈ ગયો છે. તેમજ આ સ્થિતીમાં લોકો ખોરાક અને પાણી જેવી જીવન જરૂરી વસ્તુઓ પણ વંચિત છે.
આપણ વાચો: પંજાબમાં વિનાશક પૂર: બોલીવૂડ અને પંજાબી સેલિબ્રિટીએ અસરગ્રસ્તો માટે કરી મદદની અપીલ…
ખોરાક અને પીવાના પાણીની તીવ્ર અછત
આ ભયાવહ સ્થિતીમાં ખોરાક અને પીવાના પાણીની તીવ્ર અછતના લીધે લોકો તેને લૂંટી રહ્યા છે. આ અંગે સોશિયલ મીડિયા પર ફરતા વીડિયોમાં સ્પષ્ટપણે જોવા મળે છે કે લોકો કમર સુધીના પાણીમાં બંધ દુકાનો અને ગોડાઉનમાં પ્રવેશીને અનાજ, દવાઓ, ગેસ સિલિન્ડર અને અન્ય આવશ્યક વસ્તુઓ લઈ જતા જોવા મળે છે.
લૂંટફાટની ઘણી ઘટનાઓ નોંધાઈ
આ અંગે ઉત્તર સુમાત્રા પોલીસ પ્રવક્તા સિનિયર કમિશનર ફેરી વાલિન્ટુકને રવિવારે જણાવ્યું હતું કે, શનિવાર સાંજથી લૂંટફાટની ઘણી ઘટનાઓ નોંધાઈ છે. લોકો ભૂખ અને તરસથી પીડાઈ રહ્યા છે. રાહત પુરવઠો હજુ સુધી અસરગ્રસ્ત વિસ્તારોમાં પહોંચ્યો નથી, તેથી લોકોને આ કરવાની ફરજ પડી છે.
અમે સમજીએ છીએ કે આ સ્થિતિમાં તેમને લાગે છે કે મદદ ક્યારેય નહીં પહોંચે. કાયદો અને વ્યવસ્થા જાળવવા માટે પોલીસે વધારાના દળો તૈનાત કર્યા છે, પરંતુ તેમણે એમ પણ કહ્યું કે પરિસ્થિતિ અત્યંત નાજુક હોવાથી હાલમાં કોઈકાર્યવાહી કરવામાં આવી નથી.
35,000 લોકો વિસ્થાપિત થયા
નેશનલ ડિઝાસ્ટર મેનેજમેન્ટ એજન્સીના જણાવ્યા અનુસાર, આશરે 35,000 લોકો વિસ્થાપિત થયા છે અને તેમને કામચલાઉ આશ્રય સ્થાનોમાં રહેવાની ફરજ પડી છે.
હેલિકોપ્ટર દ્વારા રાહત પુરવઠો પહોંચાડવામાં આવી રહ્યો છે, પરંતુ ખરાબ હવામાન અને વાદળો વચ્ચે બચાવ કામગીરીમાં ભારે અવરોધ ઉભો થઈ રહ્યો છે. રાષ્ટ્રપતિ પ્રબોવો સુબિયાન્ટોએ રવિવારે અસરગ્રસ્ત વિસ્તારોનું હવાઈ સર્વેક્ષણ કર્યું હતું અને વધારાના સૈનિકો અને રાહત ટીમો તૈનાત કરવાનો આદેશ આપ્યો હતો.
