ન્યુયોર્ક : ભારતે સંયુક્ત રાષ્ટ્ર મહાસભામાં પેલેસ્ટાઇનના પક્ષમાં રજૂ કરવામા આવેલા ઠરાવના તરફેણમાં મતદાન કરીને દુનિયાને ચોંકાવી દીધી છે. ભારતની રાજદ્વારી નીતિનો ઇઝરાયલ સતત વિરોધ કરી રહ્યું છે. ભારતે ઇઝરાયલ અને પેલેસ્ટાઇન ટુ સ્ટેટ થિયરીના પક્ષમાં મતદાન કર્યું છે.
193 દેશમાંથી 145 દેશે તરફેણમાં મતદાન કર્યું
યુએનમાં પેલેસ્ટાઇનના રાષ્ટ્રપતિ મહમૂદ અબ્બાસને સત્રમાં વિડીયો કોન્ફરન્સથી સંબોધિત કરવા દેવાનો ઠરાવ રજુ કરવામાં આવ્યો હતો. આ ઉપરાંત અમેરિકાએ પેલેસ્ટિનિયન અધિકારીઓને વિઝા આપવાનો ઇનકાર કર્યો હતો. જેના કારણે તેઓ સત્રમાં રૂબરૂ હાજરી આપી શકયા ન હતા. જયારે યુએન 80માં સત્રમાં પેલેસ્ટાઇન રાજ્યની ભાગીદારી નામનો ઠરાવ પસાર કરવામાં આવ્યો હતો. જેમાં કુલ 193 દેશમાંથી 145 દેશે તરફેણમાં મતદાન કર્યું હતું. જયારે પાંચ દેશે વિરુદ્ધમાં અને છ દેશ ગેરહાજર રહ્યા હતા.
પેલેસ્ટિનિયન રાષ્ટ્રપતિ 25 સપ્ટેમ્બરે વિશ્વ નેતાઓને સંબોધિત કરશે
જયારે આ ઠરાવ પર અમેરિકાએ ઇઝરાયલને સમર્થન આપ્યું હતું. અમેરિકા અને ઇઝરાયલ બંનેએ સંયુક્ત રીતે આ ઠરાવનો વિરોધ કર્યો હતો. જ્યારે ભારત તેને ટેકો આપનારા દેશોમાં સામેલ હતું.આ ઠરાવમાં પેલેસ્ટિનિયન પ્રતિનિધિઓને વિઝા નકારવા અને રદ કરવાના અમેરિકાના નિર્ણય પર દુઃખ વ્યક્ત કરવામાં આવ્યું હતું. યુએન જનરલ એસેમ્બલીના 80મા સત્રની સામાન્ય ચર્ચા 23 સપ્ટેમ્બરથી શરૂ થશે. જેમાં પેલેસ્ટિનિયન રાષ્ટ્રપતિ 25 સપ્ટેમ્બરે વિશ્વ નેતાઓને સંબોધિત કરશે.
